Musajik Tuanku Pamansiangan
Musajik Tuanku Pamansiangan talatak di Nagari Koto Laweh, Kecamatan X Koto, Kabupaten Tanah Datar, Sumatra Barat, Indonesia. Musajik iko dipakirokan alah tagak sajak 1800-an dan dinamokan manuruik namo pandirinyo, yakni Tuanku Pamansiangan.[1] Bangunannyo tabuek dari kayu baatokan seng. Musajik iko alah ditatokan sabagai cagar budaya nan dilinduangi dek pamarintah pado 2008.
| Musajik Tuanku Pamansiangan | |
Mausajik Tuanku Pamansiangan pado Februari 2020 | |
| Latak | Nagari Koto Laweh, Kecamatan X Koto, Kabupaten Tanah Datar, Sumatra Barat, Indonesia |
| Afiliasi agamo | Islam |
| Kapamimpinan | Wakaf |
| Deskripsi arsitektur | |
|---|---|
| Jinih arsitektur | Surau |
| Gaya arsitektur | Minangkabau |
| Pambukoan tanah | 1800-an |
| Spesifikasi | |
| Panjang | 15,3 meter |
| Leba | 15,3 meter |
Kondisi Musajik Tuanku Pamansiangan masih tarawat baik sampai kini ko. Tiang-tiang panyangga nan tabuek dari kayu masih utuah sabagaimano aslinyo. Musajik iko mamiliki ciri khas barupo ornamen ukiran Minangkabau nan mahiasi tiang, jendela, jo dindiang musajik.[1]
Sajarah
suntiangMulo tabantuaknyo kabaradoan musajik iko bamulo dari sabuah surau di lokasi nan samo nan didirian dek Tuanku Mansiangan, saurang ulama Minangkabau nan mandakwahkan agamo Islam di Tanah Datar. Lahia pado 1771, Tuanku Pamansiangan banamo asli Abdullah. Inyo mulonyo baraja agamo kapado Syekh Kapeh-kapeh Paninjauan, murid dari Syekh Burhanuddin di Ulakan. Satalah salasai baraja, Abdullah baliak ka Koto Laweh dan mandirian surau untuak mandukuang kagiatan dakwahnyo. Lokasi badirinyo surau marupoan tanah rawa nan banyak tumbuah mensiang, nan salanjuiknyo malakek sabagai julukan Abdullah sahinggo inyo dikana jo namo Tuanku Mansiangan.[2]
Sairiang patambahan jumlah murid, mako Tuanku Mansiangan maluehan suraunyo manjadi musajik. Namun, indak dikatahui bilo pastinyo surau Tuanku Mansiangan baganti manjadi musajik. Dalam buku bajudul Masjid-masjid Bersejarah di Indonesia nan ditulih Abdul Baqir Zien, Musajik Tuanku Pamansiangan dipakirokan alah tagak sajak 1800-an.[3] Adapun badasarkan panalusuran Balai Pelestarian Peninggalan Purbakala (BP3) Batusangkar, Musajik Tuanku Pamansiangan didirian pado 1870.[4]
Katiko patamo kali dibangun, bangunan Musajik Tuanku Pamansiangan tabuek dari bambu beratapkan ijuk. Abdul Baqir Zien mencatat, Musajik Tuanku Pamansiangan alah maalami tigo kali direnovasi sajak didirian dan kini ko bangunannyo alah manggunoan kayu jo atok dari seng.[3] Pagantian material bangunan dipakiroan balangsuang pado 1903 sampai 1905, marujuak pado kaligrafi Arab-Melayu nan tadapek pado bagian mihrab batulihkan: "Mulai memahat tahun 1323 pado 14 Shafar mulai salasai tahun 1325".[4] Pangambilan bahan bangunan yakni kayu diparoleh dari hutan. Kayu-kayu digunoan sabagai tiang jo dindiang. Sajak didirian, tiang jo dindiang Musajik Tuanku Mansiangan masih utuh jo tarawat sampai kini ko.[3] Adopun pangarajoan pambangunan malibatkan tukang-tukang Chino.[5]
Ide pamugaran musajik sempat muncua pado 1967, yakni mangganti bangunan musajik manjadi permanen dan maubah bantuak nan ado kini. Mulonyo, rencana tasabuik mandapek dukuangan dari sabagian masyarakaik, tatapi indak jadi dikaranokan ka mailangan nilai sijarah nan ado pado musajik.[6]
Sajak didirian, musajik iko indak maalami parubahan bararti, kacuali pabaikan pado babarapo bagian saparti: atok nan dulunyo ijuk alah diganti jo atok seng dan papan lantai nan alah lapuak diganti jo nan baru.[6]
Konstruksi
suntiangDenah bangunan Musajik Tuanku Pamansiangan baukuran 15,3 x 15,3 meter. Sabagaimano musajik baarsitektur Minangkabau lainnyo, atok musajik iko barupo tajug, yoitu bantuak limas bujur sangkar berundak-undak jo permukaan malangkuang ka dalam. Atok ditopang dek sambilan tiang. Tiang utamo musajik mamiliki diameter 64 cm, labiah gadang daripado tiang lainnyo nan badiameter 30 cm.[4]
Musajik iko mamiliki lantai nan ditinggian dari permukaan tanah satinggi satu satangah meter dan bisa dinaiki malalui anak-anak tangga. Lantai tabuek dari papan nan sabagian gadang alah diganti jo bahan baru.[4]
Bukaan barupo jendela bajumlah anam nan tiok tiok nyo tadapek ukiran pado bagian ateh langkungannyo.[4]
Ornamen
suntiangMusaijk Tuanku Pamansiangan mamiliki ornamen barupo ukiran Minangkabau. Motif dari ukiran tasabuik di antaronyo barupo pola geometris dan tumbuhan-tumbuhan jo warna tadiri dari sirah, ijau, putiah, jo coklat kaamehan.[7]
Bagian ateh tiang utamo mamiliki motif pucuak rabuang, motif sikambang manih, dan motif sakek tagantuang. Adopun tiang lainnyo hanyo mamiliki satu jenis motif, yoitu pandan tajulai. Pucuak rabuang merupakan motif nan diambiak dari bantuak pucuak rabuang yoitu sajinih Rabuang nan masih kuncup dan alun mampunyoi daun. Sikambang manih babantuak saparti bungo nan sadang kambang. Pandan tajulai yoitu bantuak manyarupoi dauan pandan.[6]
Pado bidang dindiang di bagian ateh musajik nan maarah ka mihrab, motifnyo maisi bidang babantuak persegi. Di dalamnyo, tadapek motif saik galamai dan bungo di bagian pinggia sarato motif mangkuto dan kuciang lalok di bagian tangah. Di tangah-tangah, tadapek pulo kaligrafi nan batulihan tahun renovasi musajik.[8]
Motif mangkuto yoitu bantuak mahkota sabagai pangaruah nan dibaok dek bangsa Balando.[6]
Pado jendela musajik, motifnyo maisi bidang babantuak satangah lingkaran barupo babarapo motif mangkuto jo motif kuciang lalok. Di pinggia jendela, dihiasi motif saik saik galamai dan bungo, sadangkan di bagian bawah dihiasi motif limpapeh. Motif limpapeh mamiliki bantuak rama-rama atau kupu-kupu.[9]
Rujuakan
suntiang- ↑ a b Abdul Baqir Zein 1999.
- ↑ Abdul Baqir Zein 1999, hlm. 61-63.
- ↑ a b c Abdul Baqir Zein 1999, hlm. 62.
- ↑ a b c d e Masjid-masjid Kuno... 2006, hlm. 16-17.
- ↑ Abdul Baqir Zein 1999, hlm. 61.
- ↑ a b c d Fauziana Izzati, dkk 2018.
- ↑ Fauziana Izzati, dkk 2018, hlm. 106.
- ↑ Fauziana Izzati, dkk 2018, hlm. 103-104.
- ↑ Fauziana Izzati, dkk 2018, hlm. 104-106.
Daftar pustaka
suntiang- Abdul Baqir Zein (1999). Masjid-masjid Bersejarah di Indonesia. Jakarta: Gema Insani. ISBN 979-561-567-X. https://books.google.co.id/books?id=-NnF9Ryal0IC&printsec=frontcover&dq. Diakses pado 25 April 2019.
- Masjid-masjid Kuno di Sumatra Barat, Riau, dan Kepulauan Riau. Batusangkar: Balai Pelestarian Peninggalan Purbakala (BP3) Batusangkar. 3 Desember 2006. https://kebudayaan.kemdikbud.go.id/bpcbbatusangkar/wp-content/uploads/sites/28/2015/04/Masjid-Kuno-Sumbar-Riau-Kepri-Sugi-2006-Cet.-2-Rev.pdf. Diakses pado 25 April 2019.
- Rujukan kosong (bantuan)
- Rujukan kosong (bantuan)
- Joni S. Abenk (27 November 2016). "Masjid Tuanku Pamansiangan Koto Laweh, Mesjid Cagar Budaya Yang Harus Dijaga". Pasbana.com. Diakses tanggal 25 April 2019.
- 4 Februari 2015 (27 November 2016). "Masjid Tuanku Pamansiangan Sumatera Barat". situsbudaya.id. Diakses tanggal 25 April 2019.