Musajik Nurul Iman Koto Gadang
Musajik Nurul Iman Koto Gadang atau Musajik Tapi Koto Gadang talatak di Nagari Koto Gadang, Kecamatan IV Koto, Kabupaten Agam, Sumatra Barat. Musajik iko merupoan musajik paliang gadang di Koto Gadang.
Samanjak didirian partamo kali pado taun 1856, musajik iko alah mangalami parubahan bantuak dan babarapo kali perbaikan. Musajik paliang partamo kali, dikana sabagai Musajik Jamik Tuo, bamodelkan khas Minangkabau jo bantuak atok-atok nan lancip babantuak karucuik. Namun, bangunan musajik rusak parah akibaik gampo bumi Padang Panjang pado taun 1926.
Babarapo bulan sasudah gampo, musajik nan baru disagarokan dibangun ateh prakarso Yahya Datuk Kayo—saurang anggota Volksraad nan mawakili Minangkabau—dan diresmiaan pamakaiannyo pado 5 Februari 1932. Diarsiteki dek Yazid Rajo Mangkuto, bantuak bangunan musajik barubah total dari sabalumnyo. Namun, bangunan musajik kambali hancua akibek gampo pado Maret 2007. Sasudah direnovasi, musajik iko alah tagak baliak jo bantuak nan hampie samo sarupo sabalum gampo 2007.
Latak
suntiangKoto Gadang adolah nagari nan talatak di sabalah barat Kota Bukittinggi. Jaraknyo hanyo babarapo kilometer sajo dari kota, tatapi dipisahan dek Ngarai Sianok nan curam. Nagari iko cukuik tanang dan langang. Banyak urang alah pindah ka kota-kota gadang. Hanyo pado hari libur dan parayoan sarupo hari rayo gadang, urang-urang pado pulang kampuang . Sasudah hari rayo gadang, Koto Gadang akan langang baliak, sabagaimano banyak nagari lainnyo di Minangkabau nan ditingga pai marantau dek masyarakaiknyo ka babagai panjuru dunia.[1][2]
Laweh Koto Gadang hanyo sakitar 600 hektare. Namun, karano lataknyo nan babatehan jo lembah, akses untuak masuak jo kalua ka nagari iko hanyo dapek dilalui malalui ciek jalan sajo. Di ujuang paliang mingko jalan ikolah tagak sabuah musajik nan kini dikana sabagai Musajik Nurul Iman Koto Gadang.
Sijarah
suntiangMusajik Jamik Tuo dibangun pado taun 1856.[3][4] Tabuek dari kayu, bangunannyo bagaya arsitektur Minangkabau bebantuak pasegi baukuran 20 × 20 meter.[2] Pado bagian atok, tadapek menara nan indak talampau tinggi.[5] Atoknyo indak mampunyoi kubah, tatapi tadiri dari babarapo gonjong nan tabuek dari ijuak. Ciek gonjong di tangah, diapik dek salapan gonjong nan labiah ketek di sakaliliangnyo.[6]
Pado 28 Juni 1926, gampa bumi bakakuatan 7,6 SR nan bapusek di Padangpanjang mangakibaikan karusakan pado dindiang-dindiang musajik.[7] Saparoh dindiangnyo rubuah dan bagian nan lain walaupun masih tagak tetapi alah rangkah-rangkah.[lower-alpha 1][2] Karano dikhawatiran mandatangkan bahayo, bangunan musajik akhirnyo dibongka.[8] Dalam sabuah rapek nan dihadiri dek sajumlah tokoh masyarakaik satampek pado 18 Juli 1926, disapakatilah untuak sagaro mandirian musajik nan baru jo mambantuak komite nan diketuai dek Yahya Datuk Kayo.[8]
Pambangunan baliak
suntiang"Gampo partamo pukua sapuluh, musajik batu jadi luluah, isi nagari banyak mangaluah, laksano malam kepadaman suluah... Musajik batu bagai ditimpo, pacah dan hancua merusakan limpo... Guncang kaduo pukuanyo satu, tigo jam antaranyo..., musajik hancua kayu dan batu, demikian halnyo musajik itu..."[4]
— Syair Mohammad Syarif Sutan Maruhum, 1929.[4]
Sasudah mufakaik tacapai, Yazid Rajo Mangkuto—nan sabalumnyo alah marancang Jam Gadang pado taun 1926—sagaro mambuek gambar rancangan musajik nan baru.Salamo ampie limo tahun, panitia pambangunan musajik nan diketuai dek A.M. Sutan Maharaja dapekt manghimpun pitih sabanyak 848,50 gulden. Namun, kakurangan pitih nan cukuik banyak dicarian jo maminjam pitih 2.000 gulden. Musajik nan baru dapek dibangun dalam tempo nan relatip singkek, dan akhirnyo diresmian pamakaiannyo pado Jumat, 5 Februari 1932.
Sasudah badiri sakian lamo, gampo bumi pado bulan Maret 2007 baliak mambuek bangunan musajik rusak. Dengan bantuan para parantau Minang dan masyarakaik satampek, dalam babarapo bulan musajik iko dapek dibangun baliak.[1]
Rujuakan
suntiang- Katarangan
- ↑ Teks asli: "... sebahagian dindingnja soedah roeboeh, dan bahagian jang lain meskipoen masih berdiri djoega tetapi soedah rengkah2 ..."
- Catatan kaki
- ↑ a b Ramadan Kareem 2012.
- ↑ a b c Sura Kota Gadang Tahun X/No.8/Augustus 1926.
- ↑ Azizah, dkk 2012, hlm. 9.
- ↑ a b c Azizah, dkk 2012, hlm. 142.
- ↑ Surya Suryadi 28 April 2013.
- ↑ Azizah, dkk 2012, hlm. 53.
- ↑ Azizah, dkk 2012, hlm. 164.
- ↑ a b Azizah, dkk 2012, hlm. 214.
- Daftar pustaka
- Azizah Etek; Mursjid A.M; Arfan B.R. Koto Gadang Masa Kolonial[pranala nonaktif permanen] (2007). PT LKiS Pelangi Aksara. ISBN 979-1283-29-X.
- Surya Suryadi. "Sebuah Mesjid di Koto Gadang" Archived 2013-08-08 di Wayback Machine.. Harian Singgalang. 28 April 2013.
- "Gempa 1926 Bag. 4". Soera Kota Gedang Tahoen X/No.8/Augustus 1926.
- Ramadan Kareem. "Nurul Iman Mosque, Koto Gadang - West Sumatra" Archived 2011-10-01 di Wayback Machine.. 2012.