Wikipedia

Moke

Minuman Tradisional dari Flores, NTT

Moke adolah minuman khas dari pulau Flores nan tabuek dari tanaman siwalan (pohon lontar) jo anau.[1] Minuman ko punyo banyak namo sarupo sopi, dewe, jo moke. [1] Tapi namo nan paliang akrab dan ciri khas Pulau Flores adolah Moke. [1] Moke adolah simbol adaik, pasaudaraan jo pagaulan bagi urang Flores.[2][3]

Moke di Pulau Flores

suntiang
 
Mayang/Batang dari batang Enau, salah satu bahan dari Moke

Moke adolah minuman tradisional nan tabuek dari panyulingan buah jo bungo palem. Proses pambuatannyo masih tradisional, diturunkan dari generasi ka generasi juo masih dilakukan sampai kini.[4] Mambuek moke dilakukan di kabun masyarakaik manggunoan wadah tradisional sarupo pariuak tanah untuak mamasaknyo.[4] Mambuek moke mamaralukan ketakunan, kasabaran jo kaahlian khusus untuak manghasilkan minuman nan bakualitas.[4] Saboto Moke mamakan wakatu 5 jam, karano manunggu titiak demi titiak dari alat penyulingan nan pakai buluah. [4] Moke nan paliang rancak kualitasnyo acok disabuik BM atau bahan bakar nyala. [4] Moke mampunyoi khasiat manyehatkan dan indak mambuek mabuak. [4] Moke kualitas paliang rancak biasonyo hanyo disajikan pado akhia pakan jo acara-acara tradisional sarupo pannikahan sabagai iringan hidangan utamo dan juo disajikan basamoan siriah jo pinang nan biasonyo dikonsumsi dek padusi.[5] Walaupun moke adolah minuman baalkohol, sangaik mudah untuak mandapekkannyo, di berbagai suduik kota dan di kampuang-kampuang tapancia moke salalu ado.[4] Di lua Kupang moke dapek ditamukan di kadai tapi jalan. [4] Haragonyo antaro Rp 15-20 ribu saboto aia kemasan sadang. [4] Arak tradisional ko marupoan minuman masyarakaik di Flores, tamasuak pajabat daerah. [4] Urang-urang di Flores acok mangkonsumsi Moke sacaro bakalompok atau dalam istilah daerah disabuik jo caro malingkar. [4] Konsumsi moke acok dilakukan basamo-samo jo babagai makanan atau lepeng dalam bahaso daerah.[4] Moke juo dikonsumsi jo makanan khas Flores sarupo lepeng ikan kuah asam, ikan baka, gulai kambiang, pisang baka/rebus jo samba lado limau atau tomat. Jamuan ko acok diadoan di lua ruangan, sarupo di tapi pantai, di laman rumah jo di bawah batang kayu.[4]

Mambuek Moke

suntiang
 
Mayang atau buah dari pohon Lontar, salah satu bahan pambuek Moke

Proses mambuek moke dimulai dari mangumpuakan aia dari tandan bungo dari pohon mike, juo disabuik moke putiah.[6] Paralatan nan digunoan adolah ladiang atau parang, sabuah tabuang buluah nan diameternyo 15 cm, panjang 1 meter jo sabuk pengaman.[6]Pamiliahan bungo adolah bagian nan paliang manantukan dalam manghasilkan aia mike nan bakualitas baiak jo dalam jumlah nan banyak.Putiak bungo anau dibukak elok-elok jo manggunoan ladiang atau parang.[6] Sasudah sadoalah tandan tabukak, tandan diturunkan manggunoan tali nan diikat pado palapah daun bagian bawah, dan dibiakan salamo 3-4 hari.[6] Mangumpuakan atau mandarehanan aia mike dapek dilakukan jo caro mangiris ujuang-ujuang tandan bungo.[6] Satiok kali aia diambiak, bungo dipotong labiah kurang 0,5. cm dan aia nan kalua ditampuang jo buluah.[6]

Mangumpuakan atau mandarehan aia mike dapek dilakukan jo caro mangiris ujuang-ujuang tandan bungo.[7] Sabalunnyo, buluah tu diisi jo kapua siriah atau daun khusus untuak mancegah aianyo manjadi asam.[7] Pangumpuaan aia dilakukan duo kali sahari, yaitu pagi jo patang. Duo kali sahari awak harus mamanjek batang anau nan tingginyo sakitar 19 meter.[7] Pohon ko labiah kurang umua 15 tahun.[7] Satiok pohon mike dapek mangaluaan 8-10 liter.[7] Aia Mike nan alah dikumpuakan salamo labiah kurang sahari, kamudian diagiah irisan bawang merah, daun kemangi jo daun lainnyo.[7] Sasudah itu, moke lah siap untuak dihidangkan sabagai minuman.[7] Minuman ko mampunyoi aroma nan khas, jo raso nan agak asam bacampua jo raso nan agak paik katiko diminum.[7]

Kalau pohon tu indak banyak babuah, ado caro tradisional dari niniak moyang nan bisa banyak babuah.[7] Masalah iko diatasi dek tukang-tukang manyadap indak hanyo jo keahlian teknis tapi juo jo caro upacara manyadiokan pasambahan, sarupo mambantai ayam.[7] Karano tukang sadap picayo kalau batang anau tu punyo 'roh'.[7] Satiok tukang sadap pasti tahu tantang sisi 'gaib' dari pohon ko. Karano itu, tukang irih manyadiokan pasambahan.[7] Biasonyo, sajikan bahan-bahan saji sabalun iris bungo anau bakarajo.[7] Doa mantra mangiringi pasambahan.[7] Niniak moyang alah bapasan bahaso batang anau adolah bagian dari kahidupan. Pohon ko mambarikan barakaik untuak maso kini jo maso datang.[7]

Jiniah-jiniah Moke

suntiang

Moke Putiah

suntiang

Moke putiah adolah niro nan didapek dari batang lontar atau batang anau.[8] Caro mambueknyo adolah manggunokan buluah nan sarueh,kamudian dibasuah samppai barasiah dan dikariangkan, lalu digantuang di ujuang mayang nan alah disapik atau dipukul-pukul atau ujuangnyo dipotong.[8] Dari proses iko, akan kalua cairan bening manitiak dari ujuang mayang, cairan tasabuik adolah moke putiah.[8] Moke putiah nan manih bisa dimasak dan dijadikan gulo pasia.[8] Samantaro moke putiah nan diminum adolah moke nan disimpan dalam wadah buluah nan indak barasiah, sahinggo tajadi fermentasi dan minuman iko rasonyo paik.[8] Moke putiah iko dapek langsuang diminum, tapi kabanyakan digunoan untuak mamasak atau manyuling dan mangasilkan moke hitam atau tuak.[8]

Moke Hitam

suntiang

Moke Hitam ko sabananyo indak hitam. Warnonyo bantuak aia putiah agak kuniang saketek.[9] Iko adolah sulingan dari moke putiah [9] Moke putiah disuling di pabrik penyulingan tuak nan dalam bahaso Nagekeo disabuik Kuwu tua [9] Moke hitam acok disajikan pado alek-alek adaik.[9]

Palakuan Patani di Flores

suntiang

Palakuan patani pado batang anau agak babeda jo batang alami lainnyo.[10] Umumnyo, patani mambiakan batang anau (mike) tumbuah jo bakambang sacaro alami di kabun tanah kariang.[10] Biasonyo, inyo indak mamusnahkan saat mambariahan lahan siap tanam.[10]Tanaman ko indak ditabang.[11] Hanyo sakali sajo di barasiahan pado musim tanam.[11] Tumbuhan ko ditinggakan iduik.[11] Indak ado usaho maagiah pupuak atapun mambudidayakanyo.[11]

Moke untuak Upacara Adaik Flores

suntiang

Upacara Tua Kalok

suntiang

Upacara tua Kalok adolah upacara tradisional untuak basamo-sasmo minum moke sabagai simbol manyatoan kasapakatan. Upacara nan biaso dibukak dek "Tana Puan" (kapalo suku) dari Talibura jo Tanarawa. [12] Salamo upacara tu, bakumpua 11 urang Tana Puan jo pamimpin masyarakaik satampek, sarato anak mudo.[12] Saboto moke jo galeh lah disiapkan di ateh meja tapek di muko tampek pasangan An-Sar duduak.[12] Tana Puan Talibura jo Tanarawa mamimpin ritual adaik tradisional dalam bahaso-bahaso satampek nan mampunyoi makna nan dalam.[12] Sasudah tu, galeh nan baisi moke tu diminum dek si Tana Pu'an dan galeh nan masih baisi moke tu disarahkan ka pasangan An-Sar untuak diminum sampai abih.[12] Ritual iko dilakukan sabagai bantuak pangukuhan tekad jo pernyataan dukuangan[12]

Upacara Roko Molas Poco

suntiang

Roko Molas Poco adolah tradisi adaik untuak mamulai pambangunan Mbaru Tembong, rumah adaik masyarakaik Manggarai Raya, baiak nan tingga di kabupaten Manggarai, Manggarai Barat maupun Manggarai Timur.[13] Roko dalam bahaso daerah artinyo manjalankan gotong royong.[13] Samantaro molas artinyo rancak dan poco artinyo rimbo.[13] Jadi kato roko molas poco artinyo maambiak atau mambao basamo-samo kayu nan paliang rancak dari rimbo.[13] Dalam rangkaian ritus Roko Molas Poco, kawajiban pamimpin adaik sarupo tu'a golo (kapalo kampuang), tu'a teno (kapalo adaik) adolah maajak kasado panduduak kampuang untuak maadoan lonto leok (musyawarah jo warga kampuang) di rumah adaik lamo atau di Natas (halaman kampuang).[13]

Salanjuiknyo, anggota masyarakaik jo pamimpin adaik dibagi manjadi duo kalompok, yaitu kalompok Roko Molas Poco (kalompok nan ka pai ka rimbo untuak manjapuik kayu) jo kalompok Curu Molas Poco (kalompok nan ka manjapuik Molas Poco ).[13] Upacara adaik Roko Molas Poco dimulai jo acara teing hang atau maagiahan pasambahan di altar sasajian (compang) nan dipimpin dek tu'a golo.[13] Sasudah upacara teing hang (maagiah pasambahan kapado arwah niniak muyang) salasai, rombongan Roko Molas Poco barangkek ka rimbo (puar) mambao manuk (ayam), moke, cola (kapak), kope (parang), sarato alat-alat. apo sajo nan diparalukan salamo upacara.[13]

Tibo di rimbo, rombongan Roko Molas Poco jo tu'a golo duduak maadok batang kayu nan ka dijadikan Molas Poco atau Siri Bongkok . [13] Kamudian tu’a golo, manyampaian kandak atau kepok atau torok tae (Manggarai bahaso kiasan) ka roh-roh niniak moyang.[13] Sasudah torok tae salasai, kayu potong dan Molas Poco dibao ka kampuang dek rombongan Roko.[13] Tibo di dakek kampuang (Pa'ang Beo), rombongan Roko Molas Poco dijapuik (sundung / curu) dek rombongan panjapuik nan diiriangi jo tari dan diikuti jo torok atau kepok sundung atau curu.[13] Ritus "Roko Molas Poco" dilakukan untuak malanjuikan warisan budayo niniak moyang jo supayo rumah adaik atau Mbaru Tembong nan ka dibangun tatap kokoh, sarato mambarikan katanangan bagi panduduak nan tingga di kampuang tasabuik.[13]

Marayoan Natal

suntiang

Di Flores, Natal identik jo badia batuang nan malatuih di ampia sadoalah suduik kota pado malam Natal. Anak mudo di Flores biasonyo bajago sapanjang malam pado tanggal 24 Desember bamain kambang api jo minum moke.[13]

Upacara Teing Hang

suntiang

Upacara Teing Hang pado akhir taun baru marupokan bantuak syukur kapado arwah-arwah niniak moyang nan lah maningga pado taun nan lamo dan mamintak barakaik pado taun baru.[14]

Moke sabagai panopang ekonomi untuak masyarakaik Flores

suntiang

Ampia mayoritas panduduak di Flores Timur manggantuangkan ekonomi rumah tanggonyo dari pakabunan jo produksi moke.[15] Anak-anak warga bisa sikola sampai ka universitas karano didukuang dek usaho moke. Di sisi lain, pamarintah Kabupaten Flores Timur mangaluaan sabuah parnyataan nan kontroversial. [15] Pamarintah ingin manutuik sadoalah kagiatan produksi moke nan dilakukan dek panduduak jo alasan konsumsi alkohol nan tinggi alah mambuek situasi jo kondisi lingkuangan nan indak baiak.[15] Parnyataan iko dilawan dek warga karano akan maagiah dampak untuak mangurangi pandapatan ekonomi rumah tanggo.[15] Masyarakaik manyatoan baso pamarintah harus batarimo kasih kapado panduduak karano produksi moke alah mambantu anak-anak Flores Timur pai sikola jo universitas, lagi pulo moke juo marupoan salah satu syarat dalam proses ritual adaik tradisional.[15]

Kontroversi

suntiang

Salah satu kontroversi manganai minuman ko di pulau Flores adolah pamarintah daerah (Pemda) indak mandukuang adonyo moke sabagai aset daerah.[16] Pamerintah daerah sabananyo mangaluakan peraturan daerah (perda) no. 8 tahun 2011 manganai perizinan, pangawasan jo kontrol minuman beralkohol, paraturan daerah ko ditulak dek urang Flores.[16] Masyarakaik Flores maraso nan paralu dilakukan pamarintah daerah adolah malegalisir moke pado tingkek tatantu, mandukuang pelabelan, jo malatiah pambuek moke untuak maningkekan kualitas.[16] Karano, mareka maanggap moke alah manjadi ikon Pulau Flores nan alah tanamo baiak dek wisatawan lokal maupun lua nagari.[16] Mereka manyayangkan kalau katiko wisatawan kalua dari Flores dan mancari oleh-oleh, mereka hanyo akan mandapekkan tenun ikat jo saketek makanan , moke alun bisa masuak daftar untuak dijadikan oleh-oleh. [16]

Rujuakan

suntiang
  1. ↑ a b c "Moke". Kompasiana. Diarsipkan dari versi asli tanggal 2014-05-04. Diakses tanggal 10-12-2024. 
  2. ↑ "Moke". Backpackerborneo. Diakses tanggal 10-12-2024.  [pranala nonaktif permanen]
  3. ↑ "Moke". Tempoo. Diarsipkan dari versi asli tanggal 2014-05-04. Diakses tanggal 10-12-2024. 
  4. ↑ a b c d e f g h i j k l m "Moke". Tempoo. Diarsipkan dari versi asli tanggal 2014-05-04. Diakses tanggal 10-12-24. 
  5. ↑ "Moke". Femina. Diakses tanggal 10-12-2024. 
  6. ↑ a b c d e f "Moke". Flores Bangkit. Diarsipkan dari versi asli tanggal 2013-05-26. Diakses tanggal 10-12-2024. 
  7. ↑ a b c d e f g h i j k l m n o "Moke". Flores Bangkit. Diarsipkan dari versi asli tanggal 2013-05-26. Diakses tanggal 10-12-2024. 
  8. ↑ a b c d e f "Moke". Orangflores. Diarsipkan dari versi asli tanggal 2014-05-05. Diakses tanggal 10-12-2024. 
  9. ↑ a b c d "Moke". Orangflores. Diarsipkan dari versi asli tanggal 2014-05-05. Diakses tanggal 10-12-2024. 
  10. ↑ a b c "Moke". Flores Bangkit. Diarsipkan dari versi asli tanggal 2013-05-26. Diakses tanggal 10-12-2024. 
  11. ↑ a b c d "Moke". Flores Bangkit. Diarsipkan dari versi asli tanggal 2013-05-26. Diakses tanggal 10-12-2014. 
  12. ↑ a b c d e f "Moke". Tribun News. Diakses tanggal 4 Mei 2014. 
  13. ↑ a b c d e f g h i j k l m n "Moke". Flores Bangkit. Diarsipkan dari versi asli tanggal 2013-05-26. Diakses tanggal 10-12-2024. 
  14. ↑ "Moke". Kebudayaan Indonesia. Diarsipkan dari versi asli tanggal 2014-02-09. Diakses tanggal 10-12-2024. 
  15. ↑ a b c d e "Moke". Suara Komunitas. Diarsipkan dari versi asli tanggal 2014-05-17. Diakses tanggal 10-12-2024. 
  16. ↑ a b c d e "Moke". Suryainside. Diarsipkan dari versi asli tanggal 2023-05-19. Diakses tanggal 10-12-2024. 
Diambiak dari "https://min.wikipedia.org/w/index.php?title=Moke&oldid=3159393"