Matematika

Matematika (dari bahaso Yunani: μαθημα - mathēma, "pangatahuan, pamikiran, pambalajaran") atau sabalumnyo disabuik ilimu hisab adolah ilimu nan maajaan besaran, struktur, ruang, jo parubahan. Para matematikawan marangkai jo manggunoan babagai pola,[2][3] kamudian manggunoannyo untuak marumuihan konjektur baru, dan mambangun kabanaran malalui metode deduksi nan kuaik diturunan dari aksioma-aksioma jo definisi-definis nan basasuaian.[4]

Euklides, matematikawan Yunani, abaik ka-3 SM, sarupo nan dilukisan dek Raffaello Sanzio di dalam ditail iko dari Sakolah Athena.[1]

Tajadi silang pandapek apokah objek-objek matematika sarupo bilangan jo titiak alah ado di semesta, ataukah disarobokan dan diciptoan dek manusia.

Saurang matematikawan banamo Benjamin Peirce manyabuik matematika sabagai "ilimu nan manggambaran simpulan-simpulan pantiang".[5] Walau matematika pado kanyataannyo sangaik bamanfaaik untuak kahidupan urang banyak, pakambangan sains jo teknologi, sampai upayo malestarian alam, matematika iduik di alam gagasan, indak dalam realita atau kanyataan. Albert Einstein manyatoan sacaro tapek bahwa "sajauah hukum-hukum matematika marujuak kapado kanyataan, inyo indaklah pasti; dan sajauah inyo pasti, inyo indak marujuak kapado kanyataan."[6]

Manuruik Max Tegmark, makna dari "Matematika indak marujuak kapado kanyataan" manyampaian pasan bahwasanyo gagasan matematika itu ideal jo steri atau tahinda dari pangaruah manusia. Uniknyo, kabebasan dari kanyataan jo pangaruah manusia iko nantiknyo justru mamungkinkan panyimpulan parnyataan bahwa semesta iko marupokan sabuah struktur matematika. Jikok kito pacayo bahwa realita di lua semesta ko haruslah bebas dari pangaruah manusia, makonyo semesta haruslah bastruktur matematika.

Malalui panggunoan panalaran logika jo abstraksi, matematika bakambang dari pancacahan, pahituangan, pangukuaan, jo pangkajian sistematis tahadok bangun jo pagerakan benda-benda fisika. Matematika praktis tawujuik dalam kegiatan manusia sajak adonyo rekaman tatulih. Argumentasi matematika nan kuaik partamo kali muncual didalam Matematika Yunani, tautamo didalam karya Euklides, Elemen

Matematika salalu bakambang, misalnyo di Cino pado taun 300 SM, di India pado taun 100 M, jo di Arab pado taun 800 M, hinggo jaman Renaisans, katiko tamuan baru matematika bainteraksi jo panamuan ilmiah baru nan ma arah pado paningkatan nan capek di dalam laju panamuan matematika nan balanjuik hinggo kini.[7]

Kini, matematika digunoan di saluruah dunia sabagai alaik pantiang di babagai bidang, tamasuak ilimu alam, teknik, kedokteran/medis, jo ilimu sosial sarupo ekonomi, jo psikologi. Matematika terapan, cabang matematika nan malingku'i panerapan pangatahuan matematika ka bidang lainyo, mailhami jo mambuek panggunoan tamuan-tamuan matematika baru, dan kadang maarah ka pagambangan disipilin-disiplin ilimu nan sapanuahnyo baru, sarupo statistika jo teori pamainan.

Matematikawan jugo bagaluik jo matematika murni, atau matematika untuak pagambangan matematika itu surang. Inyo baupayo manjawek patanyaan-patanyaan nan muncua di dalam pikirannyo, walaupun alum diketahui panerapannyo. Namun, kanyataanyo banyak sakali gagasan matematika nan sangaik abstrak nan tadinyo indak diketahui relevansinyo jo kehidupan sahari-hari, mandadak ditamuan panarapannyo. Pangambangan matematika (murni) dapek mendului atau didului kabutuhannyo dalam kahidupan. Panarapan praktis gagasan matematika nan manjadi lata balakang muncuanyo matematika murni acok kali ditamuan kudian.[8]

Liek puloSuntiang

RujuakanSuntiang

  1. Indak ado parupoan atau panjalehan tantang wujuik fisik Euklides nan dibuek salamo maso hiduiknyo nan masih batahan sabagai kakunoan. Dek sabab tuh, panggambaran Euklides di dalam karya seni bagantuang pado daya khayal saurang seniman (liek Euklides)
  2. Lynn Steen (29 April 1988). The Science of Patterns Science, 240: 611–616. dan diikhtisarkan di Association for Supervision and Curriculum Development., ascd.org
  3. Keith Devlin, Mathematics: The Science of Patterns: The Search for Order in Life, Mind and the Universe (Scientific American Paperback Library) 1996, ISBN 978-0-7167-5047-5
  4. Jourdain
  5. Peirce, hal.97
  6. Einstein, hal. 28. Kutipan ini adalah jawaban Einstein terhadap pertanyaan: "betapa mungkin bahwa matematika, di samping yang lain tentunya, menjadi ciptaan pemikiran manusia yang terbebas dari pengalaman, begitu luar biasa bersesuaian dengan objek-objek kenyataan?" Dia juga memperhatikan Keefektifan tak ternalar Matematika di dalam Ilmu Pengetahuan Alam.
  7. Eves
  8. Peterson

PustakaSuntiang

Pautan LuaSuntiang