Manjalang

Manjalang nan aratinyo bakunjuang atau disabuik pulo Bararak marupoan acara puncak di rumah marapulai. Karabaik marapulai bakumpua mananti anak daro nan datang manjalang. Wakatu barangkek dari rumah anak daro jo marapulai bajalan badampiangan diapik dek sumando jo pakaian nan rancak. Sanak padusi anak daro mangiriangi dari balakang sambia manjunjuang jamba di kapalo.Arak-arakan manjalang dari rumah anak daro ka rumah urang tuo marapulai diikuikan dek padusi-padusi babaju adaik atau baju kuruang sarato diiriangan pulo dek niniak mamak nan manggunokan pakaian adaik langkok nan sasuai jo fungsinyo dalam kaum. Barisan ko disumarakkan dek iriangan musik tradisional sarupo talampong pacik, gandang, jo pupuik sarunai.

Marapulai jo anak daro di antaro sanak padusi nan manjunjuang jamba.

Di rumah marapulai rombongan nan tibo disambuik sacaro adaik. Salain jo siriah dalam carano adokalanyo disambuik jo tari galombang sarato pasambahan. Anak daro dipasandiangkan baliak jo marapulai di palaminan nan sangajo dipasang dek kaluarga marapulai.