Kue Singgang

Kue Singgang, Kue bika, atau kue baka marupuoan makanan tradisional Minangkabau, Sumatera Barat. Walaupun disabuik jo kue bika namun kue bika asa Minangkabau ko bebeda jo kue bika nan ado di kota Medan. Pambedanyo talatak pado caro pangolahannyo, kalau kue bika asa Sumatera Barat diolah jo caro dipanggang sadangkan kue bika di Medan diolah jo diaduak dari babagai bahan, sahinggo kue bika asa medan disabuik juo jo kue bika ambon. Kue singgang atau bika ko cocok untuak dipakulek. Kue ko dimasak jo caro dibaka jo baro. Banamo singgang dek caro mamasaknyo. Adonan dibaka di tangah-tangah baro. Kue singgang di babarapo daerah ado kamiripan bahan ataupun bantuaknyo. Kue singgang ko manjadi kue khas Padang atau Sumatera Barat pado umumnyo. Kue ko marupokan salah ciek bantuak wisata makanan nan ado di Sumatera Barat salain randang.

Kue Singgang atau kue bika

Bahan-bahan

Bahan-bahan nan digunoan iyolah tapuang bareh, tapai parancih, garam, gulo pasia, santan karambia, dan parutan karambia mudo, samantaro untuak mambungkuih bahan-bahannyo di butuahan sahalai daun contohnyo daun waru dan ado juo urang manggunoan daun jati. Jadi bilo bahannyo alah cukuik, diaduaklah hinggo sadoalah bahan manjadi manyatu, kamudian sahalai demi sahalai daun dimasuakan ka dalam cetakan, salanjuiknyo baru dituangan ka dalam cetakan nan ado tadi.

Caro mambuek

Untuak mamasak kue singgang iko indaklah dibaka di ateh api ataupun manggunoan pamasak oven malainkan di panggang di ateh baro sabuik karambia nan alah di baka. Wakatu untuak manunggu kue singgang masak indak talalu lamo, hanyo paralu manunggu kuenyo taliek agak mangguniang dan indak lai bantuknyo basah.

Rasonyo

Wakatu nan tapek untuak mamakan kue singgang iolah katiko kue ko masih angek-angek, karano untuak mandapekan raso nan lamak, makanan dalam kondisi angek akan sangaik taraso papaduan bahan-bahan nan digunoan saroman kue singgang nan manggunoan bahan tapuang, tapai parancih dan parutan karambia. Mako raso asam tapai dan kaseknyo raso paruikan karambia akan mambuek raso kue singgang sangaik lamak dimakan. Maingek bahan-bahan dan caro mamasaknyo masih sangaik tradisional, sahinggo aroma dan raso kue singgang memang tiado tandiangannyo. Kue singgang raso dan aromanyo lamak dan juo masakan tradisional labiah aman dari pado makanan modern, kue singgang dapek juo mailangan raso lapa.