Kuburan Panjang Pariangan
Kuburan Panjang Tantejo Gurhano marupokan sabuah makam tuo nan panjangnyo labiah kurang 25 meter jo lebar 1,2 meter. Namun, ukuran tasabuik 25 dapek babedo-bedo apabilo diukua barulangkali sahinggo indak akan samo panjangnyo, itulah nan manjadi kaunikan dari kuburan panjang ko. Tantejo Gurhano dipicayo sabagai tokoh arsitektur partamo rumah gadang. Kasaluruhan ukuran situs cagar budayo Kuburan Panjang ko adolah 25,5 meter x 7 meter talatak di tapi jalan utamo Pariangan[1], sahinggo sangaik mudah untuak mancarinyo. Tadapek anam pohon kamboja nan ditanam di ateh makam sahinggo mambuek tanah di ateh makam tasabuik manjadi taduah. Sabalah timur bagian kawasan makam iko tadapek kursi batu nan disusun salapan buah nan manandokan jumlah niniak mamak nan salapan (ninik mamak yang delapan), tampek tasabuik disabuik jo balai panjang.
Di lokasi ko juo tadapek tumpuakan tanah nan tingginyo labiah kurang 2,1 meter jo diameter 10 meter, tumpuakan tanah ko dipicayo sabagai galian dari makam tasabuik nan akhirnyo dipagunokan sabagai tampek pamujaan dewa wakatu itu. Dipuncak tumpuakan tanah tasabuik tadapek sabuah batu nan marupokan candi nan paliang lamo nan tadapek di Pariangan, Kabupaten Tanah Datar.
lokasi kuburan panjang ko juo sangaik barasiah jo sajuak karano ditumbuhi dek padang rumpuik ilalang nan ditanami batang-batang nan taduah sahingo taliek kaeksotisan. lokasi ko rami dikunjungi dek wisatawan walaupun hanyo jo mangabadikan gambar atau poto. Jadi, nan ingin bakunjuang ka nagari budayo iko jan lupo singgah ka kaburan panjang ko. kuburan panjang ko harus dijago kabarasihanyo jo haruih dirawek untuak ganarasi salanjuik supayo dapek manggali ilmu nan bakaitan jo budayo nan lah lamo dari niniak moyang.Dikawasan wisata budayo kuburan panjang ko juo tadapek prasasti ; prasasti Batu Basurek, Kubu Rajo dan lain sabagainyo, disinan juo tadapek pamandian ayia angek , jo masajik (mesjid) tuo Pariangan atau namo lain masajik Ishlah Pariangan.