Iwan Tirta
Iwan Tirta (lahia 18 April 1935 – maningga 31 Juli 2010 pado umua 75 taun) adolah saurang parancang busana batiak Indonesia. Iwan awalnyo dididiak untuak manjadi saurang pangacara, tapi akhianyo inyo manjadi parancang nan tanamo di dunia internasional. Inyo dianggap sabagai urang partamo nan mamulai kabangkitan desain batiak pado taun 1970-an jo 1980-an.[1] Salain sabagai parancang, inyo dikana juo sabagai advokat budayo Indonesia jo Jawa, sarato pangamat kuliner.
Iwan Tirta | |
|---|---|
| Lahia | 18 April 1935 |
| Maningga | 31 Juli 2010 (umua 75) |
| Kabangsaan | Indonesia |
| Karojo | Parancang busana |
Biografi
suntiangKahidupan awal
suntiangIwan Tirta lahia jo namo Nusjirwan Tirtaamidjaja pado tanggal 18 April 1935 di Blora, Jawa Tengah. Iwan adolah anak paliang ketek di kaluarganyo, inyo punyo tigo kakak padusi. Apaknyo, Mohamad Husein Tirtaamidjaja, adolah saurang hakim di Mahkamah Agung Republik Indonesia dari taun 1950 sampai 1958, sadangkan amaknyo badarah Minangkabau nan barasa dari Sumatra Barat.[1][2]
Iwan awalnyo nio manjadi diplomat katiko ketek, tapi apaknyo manyuruahnyo untuak baraja hukum. Iwan mandapek gala sarjana hukum dari Universitas Indonesia pado taun 1958. Inyo manjadi dosen hukum internasional satalah lulus. Iwan kamudian pindah ka Inggirih untuak manaruihan pandidikannyo di London School of Economics jo School of Oriental and African Studies.[3]
Inyo mandapek beasiswa Adlai Stevenson Fellowship untuak baraja di Yale Law School di Connecticut pado taun 1964. Iwan kamudian pindah ka New York City satalah manyalasaian gala sarjana di bidang hukum pado taun 1965. Di sinan, inyo bakarajo di markas besar PBB salamo babarapo taun.[1]
Desain batiak
suntiangIwan babaliak ka Indonesia dari New York City pado taun 1970.[4] Bukannyo mamanfaatkan gala sarjananyo untuak bakarajo di bidang hukum, inyo malah mamulai kariernyo sabagai parancang busana, nan mamanfaatkan kain batiak tradisional buatan tangan. Inyo mulai mampalajari desain, motif, jo proses pambuatan batiak.[1]
Iwan manulih sajumlah buku tanamo manganai batiak. Sabagai urang partamo nan mamopulerkan batiak, desain inyo mandapek paratian, baiak di Indonesia maupun internasional. Inyo marancang pakaian batiak untuak Presiden Amerika Sarikek Ronald Reagan jo ibu negara Nancy Reagan katiko bakunjuang ka Indonesia pado taun 1980-an. Karya Iwan mandapek pangakuan dunia pado taun 1994 katiko inyo mandesain kameja batiak nan dipakai dek pamimpin dunia pado KTT Kerjasama Ekonomi Asia-Pasifik di Bogor, Indonesia. Salah saurang kliennyo manuruiknyo adolah Nelson Mandela.[5][6]
Inyo dikana sabagai urang nan mampromosian batiak ka industri mode internasional, tamasuak ka majalah-majalah jo paragaan busana.[4] Maskipun baitu, Iwan mangkritik kabangkitan batiak pado abad ke-21. Inyo amek kritis tahadap pangusaho batiak cap nan mamproduksi batiak sacaro massal, bukannyo dibuek jo tangan.[1] Iwan mangambangkan usahonyo dari pakaian batiak ka produk batiak lainnyo pado taun-taun tarakhia hiduiknyo. Inyo mamparkenalkan produk karamik jo paralatan perak nan dihieh jo motif batiak tradisional.[1] Iwan bakarajo pulo sabagai konsultan jo pangamat kuliner untuak restoran-restoran kelas ateh di Indonesia.[7]
Pado taun 2007, Iwan bakarajo samo jo Lydia Kusuma Hendra, katua parusahaan karamik PT. Tri Marga Jaya Hutama untuak maluncuaan PT. Pusaka Iwan Tirta, janamo paralatan makan karamik nan tarinspirasi dari batiak. Merek karamik tu diagiah namo Pusaka Maha Karya, nan tabagi manjadi duo koleksi, yaitu Hokokai jo Modang. Koleksi Hokokai tarinspirasi dari batiak Hokokai, bantuak batiak nan diciptaan pado awal taun 1940-an pado maso panduduakan Japang, nan dibuek dek palukis dari Pekalongan, Jawa Tengah, sadangkan koleksi Modang tarinspirasi dari motif batiak nan dipakai dek kaluarga Kasultanan Yogyakarta.[6]
Dalam wawancara pado taun 2009 jo Majalah Time, Iwan manyabuik urang-urang nan bapangaruah bagi inyo, tamasuak Pakubuwono X jo sajumlah bangsawan Jawa lainnyo, novelis Pramoedya Ananta Toer, palukis Raden Saleh jo Srihadi, Yves Saint Laurent, Halston, Ludwig van Beethoven, Johann Sebastian Bach, sarato Wolfgang Amadeus Mozart.[4]
Kamatian
suntiangIwan Tirta maningga dunia pado tanggal 31 Juli 2010 di Rumah Sakit Abdi Waluyo di Menteng, Jakarta Pusat, pado umua 75 taun.[1][3] Inyo mangidap diabetes jo stroke bataun-taun sabalumnyo.[7] Inyo dikubuan di TPU Karet Bivak, Jakarta, di sabalah kubua ibunyo.[3]
Mamparingati 1.000 hari kamatiannyo pado taun 2013, panghormatan diadokan untuak manganang inyo, di antaronyo mamamerkan koleksi seni instalasi bajudul Hasta Brata di Senayan City, nan diadokan dek PT. Iwan Tirta.[8]
Rujuakan
suntiang- ↑ a b c d e f g Emond, Bruce (1 Agustus 2010). "Iwan Tirta, a man of many talents". Jakarta Post (dalam bahasa Inggris). Diakses tanggal 9 Januari 2024.
- ↑ "Iwan Tirta Meninggal Karena Sakit". Antara. 31 Juli 2010. Diakses tanggal 9 Januari 2024.
- ↑ a b c "Top batik Fashion Designer Iwan Tirta dies". Antara. Bali Post hlm. 7. 2 Agustus 2010. Diakses tanggal 9 Januari 2024.
- ↑ a b c Tedjasukmana, Jason (12 Oktober 2009). "Iwan Tirta's Short List". Time Magazine (dalam bahasa Inggris). Diarsipkan dari versi asli tanggal 6 Oktober 2009. Diakses tanggal 9 Januari 2024.
- ↑ "A tribute to Iwan Tirta's legacy". Jakarta Post (dalam bahasa Inggris). 28 Juli 2013. Diakses tanggal 9 Januari 2024.
- ↑ a b Hamdani, Sylviana (19 Februari 2010). "Get Back to Batiks With Iwan Tirta's Tableware". Jakarta Globe. Diarsipkan dari versi asli tanggal 25 Juli 2010. Diakses tanggal 9 Januari 2024.
- ↑ a b "Mataguru: A tribute to batik maestro Iwan Tirta". Jakarta Post (dalam bahasa Inggris). 12 Desember 2019. Diakses tanggal 9 Januari 2024.[pranala nonaktif permanen]
- ↑ "Misi Bangun Luxurious Batik House, Ekspansi Ritel Iwan Tirta Tak Tergesa". swa.co.id. 4 Juni 2013. Diakses tanggal 9 Januari 2024.