Hasyim Ning

Masagus Nur Muhammad Hasyim Ning atau Hasyim Ning (laia di Nipah, Padang, Sumatera Barat, 22 Agustus 1916 – maningga Desember 1995 pado umua 79 taun) adolah surang pajuang kamardekaan nan kudian manjadi pangusaha sarato konglomerat sasudah Indonesia mardeka.

Hasyim Ning
Berkas:Hasjim ning.jpg
Lahia	22 Agustus 1916 Nipah, Padang, Sumatera Barat, Hindia Balando
Maningga	Desember 1995 (umua 79) Jakarta
Kabangsaan	Indonesia
Karojo	Pangusaha, pajuang kamardekaan Indonesia
Dikana dek	Konglomerat Indonesia

Kahidupan

Hasyim adolah surang parantau Minangkabau nan datang ka Jakarta pado taun 1937. Tapi, duo taun kudian, baliau alah ditunjuak sabagai pawakilan NV Velodrome Motorcars di Tanjung Karang, Lampung. Sasudah itu, manjadi pamborong tambang batu bara di Tanjung Enim taun 1941. Hasyim Ning baliak ka Jawa, manjadi administratur pakabunan teh jo kina di Cianjur katika tajadi parang. Karano bacito-cito manjadi tantara walaupun indak direstui urangtuo, baliau pun sato maangkek sanjato di Cianjur, Bandung Selatan, pado taun 1945. Limo taun kudian, baliau pansiun jo pangkaik tarakhia letnan kolonel.

Hasyim ketek mandapek pandidikan cukuik kareh dari urangtuanyo. Pulang sakola baliau harus mangaji jo guru nan dipanggia ka rumah. Kini baliau mancontoh caro tu untuak mandidik anak-anaknyo. Pangusaha nan mandapek gala Dr.H.C. untuak Ilmu Manajemen dari Universitas Islam Sumatera Utara ko pernah giat bapolitik. Taun 1971 baliau manjabat Katua Umum IPKI, kudian sato malaiaan fusi PDI. Taun 1978 baliau maunduran diri dari PDI lalu manjalang Pamilu 1982 bagabuang jo Golkar.

Usaho

Sasudah pansiun dari tantara jo pangkek tarakhia Letnan Kolonel di taun 1951, Hasyim badagang oto sarato mandirian Djakarta Motor Company. Sasudah duo taun, usaho itu bakambang manjadi usaho parakitan oto nan partamo di Indonesia, Indonesian Service Station. Baliau kudian labiah dikana sabagai pangusaha parakitan oto, maskipun bagarak pulo dalam babagai bidang, sarupo ekspor-impor, bank, biro pajalanan, pabrik kosmetik, sarato konsultan rekayasa nan manyerap indak kurang dari 3.000 karyawan. Salain itu baliau manjadi anggota dewan komisaris PT Jaya, Daha Motor, Jakarta Motor, Hotel Kemang, Asuransi Sriwijaya, PACTO, dan Central Commercial Bank.

Pado taun 1981, baliau manjua 49% saham Bank Perniagaan Indonesia punyonyo, kapado Mochtar Riady. Salapan taun kudian bank iko mangganti namanyo manjadi Lippo Bank, lalu malakuan merger jo Bank Umum Asia.

Di awal taun 1984, Hasyim diwawancarai majalah Perancis, Paris Match. Di sinan baliau mangatoan, usaho parakitan oto di Indonesia indak talalu baiak karano basaiang jo Japang. Oto-oto nan dirakiknyo memang buatan Eropa jo Amerika. Parusahaan Eropa jo Amerika maikuti birokrasi, sadangkan Japang langsuang mampakenalan macam-macam oto mareka. Sukses usahanyo manyababan Hasyim dipacayo manjabat Katua Umum Kadin pariode 1979-1982.

Rujuak-an

• (Indonesia) Hasyim Ning @ tokohindonesia.com Archived 2009-08-26 di Wayback Machine.
• (Indonesia) Tokoh-tokoh Swasta Berbicara @ Majalah Tempo 26 Juni 1976 Archived 2016-03-04 di Wayback Machine.