Djohan Sjahroezah

Djohan Sjahroezah (laia di Muaro Enim, Sumatera Salatan, 1912 - maningga di Jakarta, 2 Agustus 1968 pado umua 56 taun) adolah surang tokoh pagarakan bawah tanah dalam zaman revolusi kamardekaan Indonesia. Baliau adolah salah surang anggota Badan Pekerja KNIP sarato anggota parlemen dari Partai Sosialis Indonesia.

Djohan Sjahroezah
Lahia	1912 Muara Enim, Sumatera Selatan, Hindia Balando
Maningga	2 Agustus 1968 (umua 56) Jakarta
Kabangsaan	Indonesia
Karojo	Pajuang Kamardekaan
Dikana dek	Tokoh Partai Sosialis Indonesia
Pasangan	Violet Hanifah (Yoyet)

Riwayat

Djohan Sjahroezah malalui maso pandidikannyo di Medan (ELS), Bandung (MULO), Jakarta (AMS), sarato maikuti macam-macam kursus mandiri nan disalanggaroan dek Golongan Merdeka di babagai kota.

Katika manjadi panggiat PPPI, baliau manulih artikel di majalah Indonesia Raya nan mangecam kareh karajo samo jo Balando. Akibaiknyo baliau ditangkok lalu dituduah mahasuik untuak babuek kakacauan. Baliau diadili sarato dihukum panjaro salamo 1,5 taun di panjaro Sukamiskin, Bandung. Salapeh dari panjaro, baliau manjalin pagarakan jo kawan-kawannyo nan indak dibuang ka Digul untuak malanjuik-an PNI-Pandidikan. Pado taun 1937, basamo Adam Malik jo Pandoe Kartawiguna mandirian KB Antara nan kudian manjadi kantua barito nasional sampai kini.

Pado maso pandudukan Japang, baliau mandirian babarapo sarikaik buruh, tarutamo di industri paminyakan. Sasudah kamardekaan, basamo jo Sutan Sjahrir baliau mambantuak Paras jo Parsi nan kudian bagabuang manjadi Partai Sosialis Indonesia. Dalam partai tu baliau duduak sabagai sekretaris jenderal, sarato mawakili partai dalam parlemen.

Pado taun 1960, PSI dibubaran lalu babarapo pimpinannyo dipanjaroan. Katiko otoriterisme Soekarno marajalela, PSI di bawah komandonyo tatap manjadi organ politik nan kritis sarato diparetongan. Djohan marupoan pribadi nan cukuik pandai dalam mambaco situasi, baik pado maso panjajahan Balando, Japang, maupun Orde Lamo. Baliau adolah pamimpin nan mangaka kapado rakyatnyo, sarato dihormati baiak dek kawan maupun lawan.

Kaluarga

Djohan adolah putra Minangkabau asa Koto Gadang, Agam, Sumatera Barat. Bininyo, Violet Hanifah (Yoyet) nan dinikahinyo pado taun 1937 adolah putri Haji Agus Salim. Dari panikahan tu baliau dikaruniai limo urang putra jo putri. Djohan adolah kamanakan pulo dari Sutan Sjahrir.

Pautan lua

• Kesabaran Revolusioner - Djoeir Moehamad Archived 2013-07-10 di Wayback Machine.