Danau Dal

Danau Dal adolah salah ciek danau nan barado di negara India. Danau iko tapeknyo barado di kota Srinagar, propinsi Jammu Khasmir, India. Danau ko manjadi tampek tujuan wisata dek para wisatawan baiak dari India maupun dari lua India. Pamarintahan satampek mandukuang pangambangan wisata jo rekreasi di danau ko sahinggo danau ko mandapek julukan sabagai sarugo nan barado di bumi. Indak hanyo itu, tadapek namo lain dari danau ko antaro lain mahkota dan perhiasan dari Khasmir, dan disabuik juo sabagai danau bungo. Salain untuak pariwisata, danau ko dimanfaaikan juo dek panduduak satempek untuak mancari nafkah jo caro manjua hasia manongkok ikan di danau atau manjua hasia tanaman-tanaman nan bakambang di dalam danau.

Pamandangan danau dal jo kaindahan bukik nan banamo Char Chinar di sakitarnyo

Lokasi	Srinagar, Jammu dan Kashmir, India
Koordinat	34°07′N 74°52′E
Jinih danau	Danau basuhu aia angek Warm monomictic
Aliran masuak utamo	Aliran aia sungai nan masuak ka danau barasa dari sungai Telbal Nallah dari Danau Marsar +−291.9 juta meter kubik aia
Aliran kalua utamo	Aliran aia kalua dari danau mangalia malalui sungai (Dal Gate dan Nalla Amir) +– 275.6 juta meter kubik aia
Talatak di nagara	India
Panjang maks.	7.44 km (4.62 mi)
Leba maks.	3.5 km (2.2 mi)
Laweh pamukoan	18–22 kilometer persegis (6.9–8.5 sq mi)
Kadalaman maks.	3 meters (9.8 ft)
Volume aia	983 juta meter kubiks (34.7×10^9 cu ft)
Wakatu kadiaman (aia danau)	22.16 days
Panjang tapi danau1	15.5 km (9.6 mi)
Katinggian pamukoan	1,583 m (5,194 ft)
Pulau	Duo (Sona Lank dan Rupa Lank (atau Char Chinar))
Pamukiman	Hazratbal, Srinagar
1 Panjang tapi danau indak baitu jaleh definisinyo.

Lokasi

Danau dal ko barado di pusek kota Srinagar. Kota Srinagar ko lataknyo di India bagian utara atau labiah tapeknyo di subalah utara dari ibu kota negara India, New Delhi. Jarak danau ko dari kota New Delhi kiro-kiro 800 km, kalau di tampuah jo kandaraan kiro-kiro maabihan wakatu salamo 18 jam pajalanan untuak sampai ka danau dal ko. Subaliaknyo, jarak danau ko dari kota Srinagar hanyo lah 5 Km dari pusek kota, 14 Km dari stasiun kereta api Srinagar, jo bajarak kiro-kiro 17 Km dari lapangan kapatabang nan barado di Srinagar.

Gambaran danau

Danau Dal ko mampunyoi laweh sakitar 18 kilometer persegi. Panjang danau ko kiro-kiro 7 kilometer jo leba nyo kiro-kiro 3, 5 kilometer. Panjang pinggia-pinggia atau tapian danau ko kalau di jumlahan panjangnyo mancapai 15 kilometer. Dalam danau dal ko rato-rato 3 meter, namun ado di babarapo titiak dalam danau dal ko mancapai 6 meter. Di tangah-tangah danau ko tadapek duo buah pulau nan banamo pulau Sona Lank jo pulau Rupa Lank. Danau ko marupoan sumber aia dek 60.000 panduduak kota Srinagar. Salain itu, masyarakaik dapek juo mamanfaikan hasia dari danau ko sarupo ikan dan tumbuhan-timbuhan danau laninyo. Sapanjang di pinggia-pinggia danau ko dapek di caliak kabun - kabun, dermaga parahu, jo ado pulo hotel-hotel nan disadioan untuak para wisatawan. Di sakiran hotel Mughal pangunjuang dapek mancaliak kabun - kabun nan rancak nan banamo taman Shalimar Bagh dan Nishat Bagh. Kabun - kabun tasabuik di buek pado maso pamarintahan Kaisar Mughal Jahangir. Salain taman, pangunjuang dapek mancaliak babarapo rumah tarapuang nan ado di pinggia-pinggia danau. Rumah tarapuang ko marupoan perahu-perahu nan agak gadang nan di rubah atau di permak mambantuak manyarupoi rumah. Panduduak satampek manyewakan perahu-perahu tarapuang atau rumah tarapuang ko untuak manjadi panginapan dek pangunjuang nan bakunjuang ka danau ko. Indak jauh dari pinggia danau ko tadapek juo bukik-bukik nan rancak nan banamo Char Chinar. Bukik tasabuik puncak nyo dapek tatutuik dek salju pado musim dingin. Katiko tibo musim dingin suhu udaro kadang-kadang bisa mancapai −11 ° C atau 12 ° F nan mambuek aia danau manjadi baku.

Tumbuahan jo Binatang

Tumbuahan atau tanaman nan banyak tumbuah di danau iko adolah bungo taratai. Bungo taratai ko biasonyo tumbuah rancak pado Juli jo bulan Agustus. Salain bungo taratai to, tadapek juo tumbuahan-tumbuhan lain nan iduik di aia danau ko sarupo tumbuahan-tumbuahan baaka-aka nan namo latinnyo makrophyte, Nelumbo nucifera, Nymphaea alba, dan tumbuahan-tumbuahan nan lainyo. Di tapian-tapian danau tumbuah babagai macam batang kayu, diantaronyo adolah batang pinus, salain itu ado pulo ladang-ladang masyarakaik satempak nan di tanam gandum, sarato jo sayua-sayua sarupo tomaik, mantimun, jo buah melon.

Ikan ameh marupoan binatang nan banyak iduik di aia danau ko. Ikan ameh ko alah di budidayaan di danau ko samanjak taun 1957, sahinggo kabaradoan ikan ameh di siko sabanyak tujuah puluah persen dari kasadoe binatang nan tingga di danau ko.

Kagiatan wisata

Danau dal ko manjadi salah ciek tujuan wisata, tarutamo pado musim paneh. Kagiatan liburan nan bisa dilakuan di siko diantaronyo adolah mamancing, babiduak-biduak. Di danau tasabuik pangunjuang dapek bakaliliang sarato jo mancaliak rancaknyo alam jo manggunoan biduak dayuang nan atoknyo dari kain, sarato bangkunyo nan sarupo jo banta. biduak ko disabuik dek panduduak satempej jo namo Shikara. Di sapanjang tapian danau dal ko tadapek dermaga nan marupoan tampek barantinyo Shikara. Di dermaga ko pulo pangunjuang bisa manyewo biduak tasabuik ka juragannyo untuak ka di pakai. Namun, kalau tibo musim dingin atau musim salju, danau ko masih juo manjadi tujuan wisata jo malakukan kagiatan ba ski salju. Kagiatan ski salju ko dapek dilakuan di ateh aia danau nan alah mambaku.

Poto-poto Danau Dal

• 
  Pamandangan danau dal katiko musim paneh.
• 
  Pamandangan danau dal katiko musim dingin. Bukik-bukik nan barado di tapian danau tatutuik dek salju.
• 
  Pangunjuang sadang babiduak di danau dal