Cang-cang andok an

Cang-cang andokan adolah pamainan nan ado di Nagari Salareh Aia, Kecamatan Palembayan, Kabupaten Agam, Sumatera Barat. Pamainan ko acok dimainan katiko siang hari jo sanjo ari, karano anak-anak rami katiko alah pulang sakolah atau pulang mangaji. Pado wakatu libur pamaian ko dapak dilakuan sapanjang ari, talabiah katiko ado acara baralek atau mandoa. Tampek pamaianan ko di lua rumah, aturan wilayahnyo ditantuan manuruik urang nan bamain. Biasonyo rumah-rumah, parak, batang kayu, paga, tapi aia, dan lain sabagainyo dijadian bateh wilayah pamainan.

Sketsa pamenan cang cang andokan

Pamainan ko dimainan duo urang atau labiah, dalam pamainan ko ado anak bawang. Anak bawangko iyolah nan hanyo ikuik bamain sajo nan ndak ado aturan untuaknyo karano inyo masih ketek kiro-kiro umuanyo 4-6 tahun. Pamaianan ko buliah dimainan dek laki-laki jo padusi nan masih anak-anak. Padusi nan alah gadih sarato urang nan lah manikah biasonyo indak ado nan mamainan cang-cang andokan karano dinilai indak patuik.

Pamainan ko mampunyoi aturan, dalam aturan sia nan kalah inyo nan mamiciang atau nan manjago tunggak (benteang) jo mancari kasadonyo pamain nan mandok . Untuak mancari panjago patamu diadoan simbang atau balasuik, nan kalah manjadi panjago patamu. Sasudah tu panjago ditantuan sia nan dapek patamo kali inyo nan manjago bentengnyo.

Pamainan cang-cang andok an ado pangajaan nan di dalam pamaianan diantaronyo, caro batangguang jawek jo basosialisasi jo kawan. Dalam pamaianan indak ado mambeda-bedaan antaro urang kayo atau bansaik, indak mamandang darajaik tinggi atau randah.

Pado urang-urang saisuak mampunyoi kayakinan baso pamainan ko indak buliah dimainan katiko sanjo. Kok pamaianan cang-cang andok an dimainan katiko sanjo, anak-anak ka dapek musibah. Musibah nan dipacayoi urang-urang saisuak iyolah anak-anak nan main tu hilang dibaok antu.