Arai pinang

Arai pinang adolah kue khas Minangkabau yang taraso rapuah, badaruak, sarato baaroma minyak karambia. Kue arai pinang tabuek dari tapuang bareh, garam, sarato kapua siriah. Dulu, kue arai pinang dicetak jo cetakan alami dari bungo batang pinang, sahinggo bantuaknyo manjadi bulek pipih, sarato bagarih-garih. Tapi kini arai pinang dicetak jo sendok garapu, sahinggo labiah praktis, indak paralu mancari bungo batang pinang talabiah dahulu. Kue Arai Pinang ko biasonyo disadioan urang katiko baralek, tapi kini lazimnyo urang mambuek kue Arai Pinang ko untuak pakulek di hari rayo gadang. Bahkan kini kue Arai Pinang alah banyak dijua urang di lapau maupun di pasa jo bungkuih yang menarik.

Bahan-Bahan yang Digunoan

Bahan-bahan yang digunoan untuak mambuek kue arai pinang:

• 250 gram tapuang bareh
• 350 ml santan dari satangah buah karambia
• ½ sendok teh garam
• 1 sendok teh aia kapua siriah
• Minyak goriang sacukuiknyo
• Bahan untuak sausnyo: 200 gram gulo merah, 100 ml ayia

Caro Mambuek Kue Arai Pinang

1.     Sangrai tapuang bareh sampai kariang, kurang labiah salamo 10 minik

2.     Didihan santan, garam, ayia jo ayia kapua siriah. Tuang ka tapuang bareh saketek-saketek sambia di-aduak rato.

3.     Bulekan sagadang kaleriang masiang-masiang 5 gram, tu pipihan jo sendok garapu.

4.     Goriang dalam minyak angek jo api sadang. Goriang sampai kariang.

5.     Untuak sausnyo, abuih gulo merah jo ayia manggalagak, tu sariang. Siap tu abuih liak sampai kental. Tarakhia, banaman arai pinang, aduak, tu sajian.

Rujuakan

1. https://www.saribundo.biz/4066.html Archived 2019-12-20 di Wayback Machine.
2. https://ramadhan.kompas.com/index.php/read/2017/06/28/130000627/kudapan.khas.padang.yang.wajib.jadi.oleh-oleh?page=all#page2
3. https://visitpariaman.com/ladu-arai-pinang/ Archived 2018-05-30 di Wayback Machine.
4. https://sajiansedap.grid.id/read/10757794/yuk-belajar-membuat-kue-arai-pinang-khas-minang-lezat-ini-di-rumah?page=all