Alam Minangkabau

Alam Minangkabau marupokan konsep wilayah ateh budayo jo adat Minangkabau, manuruik Tambo Minangkabau. Kasadoalahannyo, wilayah ko tadiri ateh daerah darek jo rantau di mano kaduonyo saliang tajalin hubuangan nan indak tapisahkan. Dalam konsep ko indak dapek disamoan antaro wilayah Sumatera Barat kini jo Alam Minangkabau, karano Alam Minangkabau indak hanyo tadiri ateh Sumatera Barat sajo. Alam Minangkabau, kok dibandiangan jo geografi kini, tadiri ateh Sumatera Barat (indak tamasuak Mentawai), barat Riau, barat Jambi, utara Bengkulu, barat Sumatera Utara, barat Aceh, inggo Nagari Sambilan, Malaysia. Namun, bateh-bateh wilayah ko alun sapanuahnyo jaleh sacaro empiris.

Barih balabeh

Alam Minangkabau dijalehan dalam barih balabeh Tambo Alam Minangkabau. Wilayah jo bateh-bateh nan disabuik dalam barih balabeh, babunyi:

Nan salilik Gunuang Marapi,

saedaran Gunuang Pasaman,

sajajaran Sago jo Singgalang,

saputaran Talang jo Kurinci.

Dari Sirangkak nan badangkuang,

Siluluak punai mati,

inggo buayo putiah daguak,

sampai ka pintu Rajo Ilia,

taruih ka Durian ditakuak rajo.

Dari Sipisau-pisau anyuik,

sampai ka Sialang balantak basi,

inggo aia babaliak mudiak,

sailiran Batang Bangkaweh

sampai ka ombak nan badabua.

Sailiran Batang Sikilang,

inggo lauik nan sadidiah,

Sampai ka timua ranah Aia Bangih,

taruih ka Rao jo Guguak Malintang.

Pasisia Banda Sapuluah,

inggo taratak Aia Itam,

sampai ka Tanjuang Simalidu,

Pucuak Jambi Sambilan Lurah