Abubakar Ayyub

Abubakar Ayyub adolah saurang Minangkabau nan manyabaran ajaran Ahmadiyah Qadian ka ranah Minangkabau pado awal abad ka-20, basamo kawannyo Ahmad Nuruddin jo Zaini Dahlan. Pado mulonyo, Abubakar jo kawan-kawannyo itu adolah murid dari Sumatera Thawalib Padang Panjang, sikolah Islam modern patamo di Indonesia nan didirikan dek tokoh-tokoh ulama Minangkabau, sarupo Abdul Karim Amrullah, Zainuddin Labai el-Yunusiyah jo babarapo tokoh ulama lainnyo.

Abubakar Ayyub
Abubakar Ayub (tangah)
Kabangsaan	Indonesia
Alma mater	Sumatra Thawalib, Padangpanjang
Karojo	Ulama
Dikana dek	Pandakwah Ahmadiyah di Hindia Balando (Indonesia)

Kaji Agamo

Pado mulonyo, Abubakar Ayyub jo kawan-kawannyo sasudah baraja di Sumatera Thawalib ka malanjuikan kaji agamonyo ka perguruan Al-Azhar Kairo, Mesir, tapi dek gurunyo disarankanlah untuak malanjuikan ilmu agamo ka India, karano pado wakatu itu India sadang bakambang pulo manjadi pusek pamikiran modernisasi Islam. Inyo tibo di Lahore, nan pado maso itu manjadi pusek bakambangnyo Ahmadiyah Lahore (oleh limbago Anjuman Isyaati Islam), dan dari situlah inyo mandapek pangaruh Ahmadiyah.

Abubakar Ayyub baraja ka Malulana Abdulsattar dan mandapek banyak ilmu ajaran Ahmadiyah, tapi masih kurang paham jo masalah Isa Almasih. Maulana Abdulsattar mambaritahu murid-muridnyo itu untuak manambah kaji agamonyo di Qadian, tampek asal, mangaja, dan basimayamnyo Mirza Ghulam Ahmad. Dek itu, pailah inyo ka negeri itu, biapun dilarang dek Anjuman Isyaati Islam. Paralu diketahui baso Ahmadiyah Lahore adolah revisi dari Ahmadiyah pado masalah Mirza Ghulam Ahmad sabagai nabi atau mujaddid (pambaharu). Nan manarimo inyo sabagai nabi disabuik Ahmadiyah Qadian, sadang nan manarimonyo hanyo sabagai mujaddid iolah Ahmadiyah Lahore. Sasudah lamo kaji agamo di Qadian, di baiatlah (caro rasmi masuak ajaran Ahmadiyah) Abubakar Ayyub sarato 23 murid dari Sumatra Thawalib nan datang sasudah inyo masuak dalam Ahmadiyah Qadian.

Kiprah di Jemaat Ahmadiyah

Duang tahun sasudah inyo dibaiat, Abubakar Ayyub diutus oleh Mirza Basyiruddin Mahmud Ahmad, Khalifah Ahmadiyah kaduo, untuak manyabaran ajaran Ahmadiyah ka kampuang halamannyo, Hindia Balando, sasudah dimintak oleh Abubakar Ayyub surang, sapulangyo khalifah Ahmadiyah itu dari Konferensi Agama-agama di Wembley pado taun 1924.

Dalam usahonyo manyabaran Ahmadiyah di Hindia Balando, inyo dikawanan jo saurang syekh Ahmadiyan nan banamo Maulana Rahmat Ali. Maulana Rahmat Ali partamo kali balabuah di Tapaktuan, Aceh Selatan dan sampek manyabaran jo mambaiat babarapo urang di sinan. Indak lamo sasudah tu, pado bulan Januari 1926 pailah inyo ka Padang. Di kota Padang ko, ajaran Ahmadiyah mandapek panarimoan labiah banyak dari nan di Tapaktuan, anggotanyo pulo dari pabagai kalangan mulai dari cadiak pandai, datuak hinggo rakyat jelata. Pado taun 1926 Komite Pencari Haq Penolak Subhat dibantuak bagi urang nan tatarik jo Ahmadiyah hinggo dibubaran pado tanggal 27 Juli 1927 dan baralih manjadi jemaat Ahmadiyah di Padang. Dari Padang itulah, Ahmadiyah Qadian akhirnya mulai bakambang ka wilayah lain di Hindia Balando. Maulana Rahmat Ali akhirnyo pai ka Batavia pado taun 1931 dan indak lamo sasudah itu Pengurus Besar Ahmadiyah didirikan di Jakarta dengan R. Muhyiddin sabagai ketuanyo nan patamo.

Mandanga bakambangnyo Ahmadiyah di Padang, banyaklah ulama lain nan bareaksi kareh, tarutamo di darek tampek bakambangnyo gerakan Kaum Mudo jo Kaum Tuo. Haji Abdul Karim Amrullah dari Kaum Mudo manulih kitab khusus, Al Qaul ash-Shahih, nan manjalehan baso ajaran Ahmadiyah nan dibao Maulana Rahmat Ali murid-muridnyo dari Qadian (nan murid-murid Sumatra Thawalib binaan Abdul Karim Amrullah) barado di lua Islam, dianggap sabagai "kafir", sadang Abdullah Ahmad manyanggah paham itu malalui surek kaba nan inyo punyo. Syekh Sulaiman ar-Rasuli dari Kaum Tuo mambantah pulo ajaran Ahmadiyah. Hamka manulih pulo caro Abubakar Ayyub, kawan-kawan sarato gurunyo dalam manyabaran Ahmadiyah di Padang dan tampek lainnyo di Minangkabau. Mereka suko berdebat dan indak akan salasai sabalun lawannyo manarimo pikirannyo. Inyo nan kenal jo babarapo kawan lulusan Thawalib itu manulih bahwa banyak parubahan, di antaronyo Zaini Dahlan nan dikenal tukang pagarah, sasudah baraja ka Qadian sifatnyo manjadi tanang. Ahmadiyah Padang dalam manangkih ulama Minangkabau mangandalkan Komite Pencari Haq Penolak Subhat.

Dakwah Ahmadiah balanjuik juo, satalah cukuik gadang di Padang bakambang sayoknyo ka tampe lain sarupo Bukittinggi. Abubakar Ayyub mangawanan Maulana Rahmat Ali mangambangan Ahmadiyah di tanah Jawo, dengan Batavia sabagai basisnyo. Kegiatan mereka di Jawo pun mandapek reaksi, hinggo Ahmad Hassan dari Persis mambantuak lombago Pembela Islam dan mangundang debat Maulana Rahmat Ali jo muridnyo itu sajak taun 1932 hinggo 1934. Pado taun 1935 Abubakar Ayyub baliak jo gurunyo dek diundang Ahmadiyah Padang manyalenggarakan tabligh akbar. Inyo sempat pulo basobok jo Hamka untuak mandebat pamikirannyo tentang Ahmadiyah pado taun 1937. Kaba tarakhia dari inyo adolah katiko Mirza Basyiruddin Mahmud Ahmad mamarintahkan inyo ka Den Haag pado taun 1950.