Abdul Rivai

Abdul Rivai (lahia di Palembayan, Agam, Sumatera Barat, 13 Agustus 1871 – maningga di Bandung, Jawa Barat, 16 Oktober 1937 pado umua 66 taun) adolah surang dotor sarato wartawan Indonesia. Baliau adolah urang Indonesia partamo nan manabik-an surek kaba babahaso Malayu dari Eropa. Rivai dianugerahi gala sabagai Perintis Pers Indonesia pado taun 1974 dek Pamarentah Indonesia.

Abdul Rivai

Biografi
Lahia	13 Agustus 1871 Palembayan
Kamatian	16 Oktober 1937 (66 tahun (id) terjemahkan)
Kalompok etnis	Urang Minangkabau
Almamater	Universitas Ghent (id) School tot Opleiding van Inlandsche Artsen
Kagiatan
Karajo	Wartawan
Kaluarga
Mande	Siti Kemala Ria (id)

Kahidupan

Abdul Rivai laia dari pasangan Abdul Karim jo Siti Kemala Ria. Ayahnyo bakarajo sabagai guru di sakola Malayu. Rivai mampunyoi watak nan kareh, ulet, sarato utak nan cemerlang. Pado taun 1886, katiko masih baumua 15 taun baliau ditarimo basakola di STOVIA. Satamat dari STOVIA pado taun 1894, baliau ditugehan manjadi dotor di Medan. Diakhia taun 1899, Rivai malanjuik-an pandidikan ka Balando sambia mambantu babagai surek kaba di Indonesia. Rivai adolah urang Hindia partamo nan basakola kadotoran di Balando.

Pado awal abaik ka-20 Rivai talibat padebatan jo A.A Fokker, pajabaik Balando nan mangklaim labiah fasiah babahaso Malayu dibandiang urang Malayu sandiri. Dalam padebatan tu, Fokker berang karano ado urang inlander nan barani manantangnyo. Akibaik kagamilangannyo dalam badebat, Rivai dibuliahan sakola di Utrecht.

Wartawan

Pado taun 1900 Rivai mamprakarsai surek kaba Pewarta Wolanda. walaupun tabik dari Amsterdam, Pewarta Wolanda tabik dalam bahaso Malayu. Salain maurusi Pewarta Wolanda, Rivai acok mangiriman tulisannyo ka babagai media massa nan tabik di Balando ataupun Hindia. Dek karano katajaman tulisannyo, Rivai labih dikana sabagai surang wartawan dibandiang dotor. Basamo Henri Constant Claude Clockener Brousson, Rivai manabik-an Bendera Wolanda pado 15 April 1901. Basamo Brousson pulo, baliau mandirian usaho panabik-an Bintang Hindia pado Juli 1902. Bintang Hindia jo warna nasionalismenyo mulai puda katiko Rivai maunduran diri pado taun 1907, sampai akhianyo pado taun 1910 media nan pernah manggebrak dunia pers Balando jo Hindia tu barakhia. Baliau mambantu pulo di Bintang Hinen West jo Alegemeen Handelsblad di Amsterdam. Katiko maadoan pajalanan ka babagai nagaro di Eropa jo Amerika pado kurun 1919-1921, baliau mangiriman karangannyo ka babagai surek kaba di Indonesia.

Kagiatan Politik

Satibonyo dari Balando pado taun 1911, Rivai sato mandukuang pambantuak-an Indische Partij (IP) di Sumatera. Taun 1913 IP dibubaran karano dianggap mambahayoan pamarentah kolonial. Mantan aktivisnyo kudian mandirian Insulinde. Pado taun 1918, inyo diangkek sabagai anggota Volksraad (Dewan Rakyat) mewakili Insulinde. Baliau kudian manatap di Jakarta, sabagai pambantu utamo surek kaba Bintang Timur. Samantaro itu surek kaba Pewarta Deli, Medan manyabuiknyo sabagai Bapak dalam golongan Jurnalistik.

Pautan lua

• Profil di PWI Archived 2009-10-05 di Wayback Machine.
• Melayu Online Archived 2016-04-11 di Wayback Machine.