Yusaf Rahman

Yusaf Rahman, adolah salah satu musisi, komponis sarato panata musik nan barasal dari Muaro Labuah, Kabupaten Solok, nan lahia pado tanggal 4 Juni 1933. Yusaf Rahman tutuik usia dalam usia 72 tahun pado tanggal 1 Oktober 2005 di Banduang. Di Sumatera Barat, indak talalu banyak saniman nan mamiliki talenta jo ilimu pangatahuan , namun Yusaf Rahman ado di dalam nan indak banyak nantu. Walau hanyo baraja sacaro otodidak, baliau pun mampu mambuek aransemen jo partitur yang ka diamainan dek orkestra.

Adopun karyanyo tarungkap dalam musik Sendratari " Imam Bonjol" dan Operet " Baralek Gadang" karya Nazif Basir. Salain itu baliau mampu pulo bamain alat musik jo samporono,baiak alaik musik moderen sarupo biola, piano,saxaphone, klarinet, akordeon, maupun alaik musik taradisional sarupo talempong, saluang, bansi rebab, sarato gandang.

Dalam papaduan karyanyo basamo bininya, baliau alah mambuek iriangan musik nan sangaik ,monumental nan sampai kini sarupo tari piriang, tari payuang, tari saputangan, tari pasambahan. salah satu jaso baliau nan paliang mangagumkan adolah pado tahun 1968. baliau barhasil marubah nada talempong nan samulo banada pentatonis manjadi nada diatonis, sahinggo alat musik tradisional bisa dimainkan salaras jo alat musik moderen lainyo.

barikuik buah karya baliau nan alah direkam baulang kali dek panyanyi mudo minang diantaronyo, "Rusuah Hati"," Indak kabarulang"," Kelok Sembilan", "Perak-perak", "Lindok-lindok". salah satu blagu nan paliang tanamo nan dijadian RBT di hape adolah lagu " Usah Diratok-i".