Wali nagari

Wali nagari adolah sabuah jabatan politik untuak mamimpin sabuah nagari di provinsi Sumatera Barat, Indonesia. Jabatan wali nagari iko samo jo kapalo desa, pambedonyo hanyo dari namonyo sajo.

Sajarah

Sabalunnyo jabatan wali nagari iko masih asiang dalam struktur pamarintahan nagari di masyarakaik Minangkabau. Kamudian satalah dikaluakannyo tantang ordonansi nagari (undang-undang nagari) pado taun 1914 dek pamarintah Hindia-Balando, dima para panghulu nan dulunyo mamimpin nagari secaro basamo-samo, diharuskan untuak mamilih ciek di antaro mareka sabagai kapalo nagari atau wali nagari, sahingga posisi panghulu suku lah hilang fungsi lamonyo. Namun sajalan jo wakatu, jabatan iko dapek ditarimo dan manjadi tradisi adat dima jabatan iko juo diwariskan kapado kaponakan pamegang jabatan sabalunnyo. Salain itu efek dari aturan iko juo mambatasi anggota kerapatan nagari, nan hanyo pado panghulu nan diakui dek pamarintah Hindia Belando sajo. Hal iko dikarajoan jo asumsi untuak mandapekkan sistem pamarintahan nan taratik.

Satalah kemerdekaan Indonesia, dikeluarkannyo undang-undang No. 5 Taun 1974 tantang Pamarintahan di Daerah dan kamudian Undang undang No. 5 Taun 1979 tantang Pamarintahan Desa, jabatan wali nagari iko turuik dihapiuh dan disaragamkan jo jabatan kapalo desa.

Kamudian pangaruh dari reformasi pamarintahan di Indonesia, dan wacana akan otonomi daerah, mako kalualah undang-undang Nomor 22 Taun 1999 tantang Pamarintahan Daerah, untuak manggantikan UU No 5 Taun 1974 dan UU No 5 Taun 1979.

Pado taun 2004, untuak maningkekan efisiensi dan efektivitas dalam penyelenggaraan pamarintahan daerah, dan UU No 22 Taun 1999 dianggap alah indak sesuai lai jo pakambangan keadaan, ketatanegaraan, dan tuntutan penyelenggaraan otonomi daerah, kudian Presiden Indonesia jo persetujuan Dewan Perwakilan Rakyat sacaro bersama, disahkanlah Undang undang Nomor 32 Taun 2004 tantang Pamarentahan Daerah untuak mengantikan undang undang UU No 22 Taun 1999. Dan dari undang-undang baru iko diharapkan munculnya pamarentahan daerah nan dapaik mangatua dan mengurus surang urusan pemerintahannya manuruik asas otonomi dan tugeh pembantuan.