Urang Ngalum
Urang Ngalum adolah kalompok etnis nan mandiami Pulau Papua bagian tangah, Provinsi Papua, Indonesia, tamasuak juo di sabagian provinsi dari negara Papua Nugini. Di Provinsi Papua tasabuik, urang Ngalum tingga atau bamukim di Kabupaten Pagunuangan Bintang, samantaro untuak di bagian Papua Nugini, urang iko tingga di Provinsi Sandaun dan Provinsi Barat.[3][5] Dalam sensus penduduk, urang Ngalum di Indonesia dimasuakan kadalam kategori "Suku Asal Papua".[6]
| Total populasi | |
|---|---|
| 53.116 | |
| Kawasan jo populasi nan signifikan | |
 Indonesia
 Papua New Guinea | |
| Papua Pegunungan, Indonesia | 29.116[1][2] |
| Sandaun | 24.000[3][1] |
| Bahaso | |
| Ngalum | |
| Agamo | |
| Kristen 84,63%[3] | |
| Kalompok etnis takaik | |
| Suku Murop, Suku Kupol[4] | |
Sijarah
suntiangKato Ngalum adolah panyabutan tahadok kalompok masyarakaik nan tingga di lereng Puncak Mandala hinggo ka arah timur sampai di Distrik Telefomin di Papua Nugini.[7] Istilah lain nan digunoan dek antropologis adolah "Ok" nan aratinyo aia dalam bahaso Ngalum. Hal iko karano masyarakaik Ngalum salalu tingga di tampek nan dakek jo mato aia sarupo di sungai. Banyak tampek di Pagunuangan Bintang diagia namo mamakai awalan ok.[8] Urang iko adolah mayoritas di Pagunuangan Bintang, mancakup 42,61% total panduduak.[2]
Manuruik mitos Aplim Apom Sibilki, leluhua urang Ngalum diciptaan dek Atangki di Puncak Mandala sahinggo gunuang tasabuik manjadi sakral dek masyarakaik. Laki-laki dilambangkan dek Aplim samantaro padusi dilambangkan dek Apom. Atangki dipicayo sabagai roh nan hiduik basatu jo alam sarato jo makhluk hiduik di sakitarnyo. Babarapo suku lain di Pagunuangan Bintang mampicayoi pulo mitos iko ko.[7][9] Pado maso kiniko, Atangki dipadankan jo Allah dalam Kekristenan.[10]
Kapicayoan
suntiangKapicayoan tradisional urang Ngalum bapusek pado panciptaan manusia Aplim Apom nan manganduang nilai filosofis jo ideologis sabagai landasan kahidupan nyo. Urang Ngalum mampunyoi bando-bando karamaik nan disimpan dalam iwol. Di iwol pulo, urang Ngalum malakuan upacara-upacara relilgi. Mereka mayakini kahadiran pencipta (Atangki), palinduang (Onkor dan Kakalakonaki), jo roh-roh haluih (Kaseng) nan jaek.[11]
Di maso kini, sabagian gadang urang Ngalum manganuik agamo Katolik dan sabagian ketek lainnyo baragamo Protestan. Hal iko dimulai samanjak misi Katolik pado tahun 1956 di daerah mereka.[12] Indak ado catatan resmi tentang agamo nan dianuik saluruah anggota suku tatapi di daerah Oksibil nan didominasi dek urang Ngalum, 80% panduduaknyo baragamo Katolik.[13]
Kahidupan sosial
suntiangMasyarakaik Ngalum manganuik sistem iwolmai nan basifiak patrilineal. Iwolmai tadiri dari babarapo kaluarga dalam ciek desa nan dipimpin dek saurang iwolmai ngolki. Iwolmai marupoan bagian dari iwol atau kumpulan desa. Pado maso kini tacatat tadapek 417 iwolmai di Pagunuangan Bintang.[14]
Dalam palaksanaan upacara adaik, tadapek pambagian paran pamimpin (ngolki), yaitu osangki baparan pado tari-tarian, om bonengki pado pangalolaan pakabunan jo bahan makan, ap iwol ngolki pado rumah adaik pria, kaka nalkonki pado paparangan, jo jebulki pado panyimpanan barang warisan leluhua. Paran iko dapek diparoleh malalui babarapo proses, diawali jo inisiasi adaik (tena kamil). Urang nan alah mangikuti inisiasi tasabuik dinamoan tukon.[15]
Tadapek tigo golongan dalam masyarakaik Ngalum, yaitu golongan ngolki, urang biaso, jo non-Ngalum. Pambagian golongan iko baru taliek jaleh dalam palaksanaan upacara adaik. Jiko saurang warga malakuan palanggaran, inyo akan diadili dek para tetua adaik di bawah pimpinan Iwolmai-ngolki. Hukuman nan diagia cukuik barek sarupo pamotongan tangan untuak tukang maliang. Hal iko manyababkan tingkek kajahatan di daerah kadiaman urang Ngalum ketek.[16]
Pakampuangan
suntiangPakampuangan tradisional urang Ngalum babantuak lingkaran atau bundar nan barado di pabukitan. Tadapek babarapo jinih rumah, yaitu rumah khusus untuak para laki-laki disebut bokam iwol jo rumah khusus untuak padusi disabuik abib atau jingilabib (rumah inti). Acokkali jingilabib dihuni juo dek ciek kaluarga inti. Tadapek pulo rumah sukam, dikhususkan untuak padusi nan sadang haid atau malahiakan. Pado umumnyo, rumah-rumah tradisional hanyo mampunyoi ciek pintu sarato indak ado jendela. Pola pakampuangan iko mulai ditinggaan dan rumah-rumah dibangun mamanjang mangikuti pola jalan.[1][4]
Mato pancaharian
suntiangMato pancaharian utamo suku Ngalum adolah berkebun. Tanaman nan biaso masyarakaik olah adolah talas, batatas, ubi rambat, sayua lilin, sayur yamen, jo sayur gedi. Babarapo tanaman lain sarupo kacang merah, kedelai, wortel, kubis, jo tomat nan ditanam pulo sasudah dipakenalkan dek para misionaris ka daerah Urang Ngalum.[17]
Kabudayaan
suntiangPadagangan
suntiangKagiatan padagangan di daerah pagunuangan Papua sulik dilakuan padp zaman dahulu karano katabatasan akses hinggo pamuloan abaik ka-20. Kagiatan padagangan nan dilakukan dek suku Ngalum dahulu hanyo bajalan jo suku-suku di daerah-daerah pesisir. Urang Ngalum manggunoan mato uang tradisional barupo kulik kerang nan disabuik siwol. Mereka mandapekan siwol dari pantai selatan Papua di wilayah Merauke. Nilai siwol bagantuang pado warna jo ukurannyo.[12]
Komoditas nan dipadagangkan jo panduduak di sakitar pabatasan Papua Nugini maupun panduduak di sakitar hulu Sungai Digul adolah babi (kang), anak panah (ara), busua (ebon), kapak batu (papie), gigi anjiang (anoniji), noken (men), bulu cenderawasih (kulep) sarato hasia kabun. Apobilo mereka badagang ka selatan di Mindiptana jo Merauke, mereka mamparoleh garam jo siwol.[12]
Sistem ekonomi jo alaik pambayaran modern barupo ptih mulai dikenal dek urang Ngalum sasudah masuaknyo pangaruah-pangaruah dari pihak gereja, diawali dek misi Katolik pado tahun 1956.[1]
Panikahan
suntiangDalam panikahan tradisional, panikahan diawali dek paminangan. Paminangan dapek dilakuan ateh pamintaan langsuang urang tuo, pamintaan petatas dek laki-laki, atau panggunoan patanyaan kiasan, “Mena puka yepki nek ne nere” nan bararti noken muda itu bagus, berikan ke saya?. Noken malambangkan padusi karano padusi salalu mamegang noken katiko malakuan pakarajoan atau sadang pai. Jiko pinangan bahasi, pihak laki-laki akan mangumpuan mahar untuak dibayian kapado pihak padusi. Dahulu, jinih barang nan buliah dijadian mahar adolah gigi anjing (anon ningil), kapak batu (takol papi), babi (kang), noken, jo siwol wan (kulit kerang). Pambayaran mahar taruih balanjuik katiko anak lahia. Mahar iko dinamoan tena sibi dan wajib diagian satiok kali saurang anak lahia. Pasangan nan nio manikah tanpa paksaan urang tuo dapek pulo malakuan kawin lari (namal). Prosesnyo adolah katiko para laki-laki manari, padusi manonton dan mamiliah panari nan inyo sukoi kamudian mangikutinyo ka rumah sasudah tarian usai. Namal biaso dilakuan pado tarian oksang, yimne, bar, jo jambir.[18]
Pangobatan
suntiangUrang Ngalum mamanfaatkan bahan alam untuak dijadian ubat. Bahan nan umum dipakai adolah sayur yamen, daun gatal, jo buah merah. Fungsinyo bamacam-macam, yaitu untuak mambantu proses kalahiran, damam, indak lamak badan, dan juo untuak katahanan badan jo paningkatan kasuburan.[19]
Babi sebagai simbol status
suntiangSacaro kasaluruahan di daerah Papua, babi marupoan simbol status. Samakin banyak babi nan dipunyoi dek sasaurang atau sabuah kampuang, samakin tinggi pulo statusnyo. Pamotongan jo panjamuan babi biaso dilakuan dalam upacara-upacara adaik. Babi marupoan pulo sala satu jinih mahar. Di daerah Oksibil, ibu kota Pagunuangan Bintang, harago ciek ikua babi hiduik bakisar antaro Rp10 sampai 40 juta per ikua dengan harago per kilogramnyo sakitar Rp100.000.[20]
Upacara kamatian
suntiangUpacara kamatian urang Ngalum dibedaan badasarkan status, yaitu upacara untuak ngolki jo upacara untuak urang biaso. Saurang ngolki nan maningga dunia ditampekan di dalam bangunan bokam iwol nan hanyo buliah dimasuki dek urang-urang tatantu. Bokam iwol indak buliah dimasuki dek padusi jo anak muda nan alum diinisiasi. Sasudah pakabuangan, diadoan pajamuan makan babi nan disadioan dek kaluarga jo masyarakaik. Ciek kapalo babi kamudian dilatakkan ka dalam tampek jenazah basamo kaladi. Kapalo babi dilatakan di sisi suok mayat dan kaladi pado sisi kida mayat. Saluruah masyakaik nan hadir dalam upacara mambantuak iringan manuju ka tampek pamakaman. Di sapanjang jalan mereka maratok diikuti jo lagu-lagu kamatian. Sahari sasudah pamakaman, bibit keladi ditanam di kabun punyo kaluarga. Pakarajoan mananam dilakuan dek pihak kaluarga, biasonyo salah satu saudara laki-laki atau anak laki-laki nan tuo.[21]
Pamakaman untuak urang biaso indak dikuti jo acara palatakkan babi jo kaladi di sabalah mayat. Tando kadukaan dinyatokan jo caro mancukua atau maambiak babarapo halai rambuik dari urang nan alah maningga, kamudian disimpan pado sabuah tampek khusus. Hari bakabuang balangsung salamo tigo hari sasudah pamakaman.[22]
Pamakaman urang Ngalum pado zaman dahulu adolah mayat dibaluik jo daun markon kamudian ditutupi jo kulik kayu nan alah dirajuik, lalu diikek jo tali rotan. Dalam babarapo wakatu, tampek tasabuik akan lapuak sahinggo tasiso karangko mayat dengan posisi talantang nan dilatakan di lantai guo. Panggunoan peti kayu mulai dikenal katiko misionaris masuak ka daerah iko sakitar tahun 1956 dan balanjuik hinggo maso kiniko.[23]
Rujuakan
suntiang- ↑ a b c d Papua Penghubung.
- ↑ a b Ananta Utami.
- ↑ a b c Project Joshua.
- ↑ a b Melalatoa 1995.
- ↑ Sitokdana Hiktaop.
- ↑ Na'im Syaputra.
- ↑ a b Mimin 2019.
- ↑ Sitokdana Hiktaop, hlm. 60-61.
- ↑ Kurniawan Ayomi, hlm. 27.
- ↑ Kurniawan Ayomi, hlm. 123.
- ↑ Sitokdana Hiktaop, hlm. 135-136.
- ↑ a b c Maryone 2010.
- ↑ Kurniawan Ayomi, hlm. 25-26.
- ↑ Kurniawan Ayomi, hlm. 31.
- ↑ Kurniawan Ayomi, hlm. 32-33.
- ↑ Kurniawan Ayomi, hlm. 34.
- ↑ Kurniawan Ayomi, hlm. 63.
- ↑ Kurniawan Ayomi, hlm. 38-39.
- ↑ Kurniawan Ayomi, hlm. 44-48.
- ↑ Kurniawan Ayomi, hlm. 48-49.
- ↑ Maryone 2012, hlm. 31.
- ↑ Maryone 2012, hlm. 13-14.
- ↑ Maryone 2012, hlm. 14.
Daftar bacoan
suntiang- Ananta, Aris; Utami, Dwi Retno Wilujeng Wahyu; Handayani, Nur Budi (2016). "Statistics on Ethnic Diversity in the Land of Papua, Indonesia". Asia & the Pacific Policy Studies (dalam bahasa Inggris). 3 (3): 458–474. doi:10.1002/app5.143. ISSN 2050-2680.
- Hylkema, S. (1974) (dalam bahaso nl). Mannen in het draagnet. Internet Archive. 's-Gravenhage: M. Nijhoff. http://archive.org/details/manneninhetdraag0000hylk.
- Kurniawan, Aan; Ayomi, Ivon; et al. (2012). Buku Seri Etnografi Kesehatan Ibu dan Anak 2012 Etnik Ngalum Distrik Oksibil Kabupaten Pegunungan Bintang, Provinsi Papua. Jakarta: Badan Penelitian dan Pengembangan Kesehatan, Kementerian Kesehatan RI. ISBN 978-602-235-228-0.
- Maryone, Rini (2010). "FUNGSI SIWOL BAGI KEHIDUPAN SUKU NGALUM". Jurnal Penelitian Arkeologi Papua dan Papua Barat (dalam bahasa Inggris). 2 (1): 45–53. ISSN 2580-9237. Diarsipkan dari versi asli tanggal 2023-02-04. Diakses tanggal 2023-02-04.</ref>
- Maryone, Rini (2012). "TRADISI PENGUBURAN PRASEJARAH SUKU NGALUM DI KABUPATEN PEGUNUNGAN BINTANG". Jurnal Penelitian Arkeologi Papua dan Papua Barat. 4 (1): 9–17. ISSN 2580-9237. Diarsipkan dari versi asli tanggal 2023-02-04. Diakses tanggal 2023-02-04.
- Melalatoa, M. Junus (1995). Ensiklopedi Suku Bangsa di Indonesia Jilid L-Z. Jakarta: Departemen Pendidikan dan Kebudayaan RI. pp. 632.
- Mimin, Imanuel H. (8 Juni 2019). "Mengenal Suku Ngalum Ok di Pegunungan Bintang". suarapapua.com. Diakses tanggal 2020-06-10.
- Na’im, Akhsan; Syaputra, Hendry (2010). Kewarganegaraan, Suku Bangsa, Agama, dan Bahasa Sehari-hari Penduduk Indonesia. Jakarta: Badan Pusat Statistik. pp. 27. ISBN 978-979-064-417-5.
- Papua, Peghubung. "Kabupaten Pegunungan Bintang". Badan Penghubung Daerah Provinsi Papua (dalam bahasa Inggris). Diarsipkan dari versi asli tanggal 2020-06-09. Diakses tanggal 2020-06-09.
- Project, Joshua. "Ngalum | Joshua Project". joshuaproject.net. Diakses tanggal 2020-06-09.
- Sitokdana, Melkior N.N; Hiktaop, Kristianus; et al. (2020). Perdamaian Pegunungan Bintang [Untuk Membangun Peradaban Manusia Aplim Apom]. Salatiga: Satya Wacana University Press. ISBN 978-602-5881-68-8.