Urang Muna

Urang Muna adolah masyarakaik Suku Banso Muna, nan mandiami saluruah Pulau Muna, jo pulau-pulau ketek disakitarnyo, sarato sabagian gadang Pulau Buton khususnyo bagian Utaro, Utaro Timua Lauik, salatan jo Baraik Dayo Pulau Buton, Pulau Siompu, Pulau Kadatua jo Kepulauan Talaga (kawasan administrasi Kabupaten Buton Salatan jo Buton Tangah) Sulawesi Tenggara. Manurik Sarasin basaudara jo Bernhard Hagen, Urang Muna nan inyo sabuik sabagai Tomuna marupokan pauni patamo Kapulauan Muna bahkan tamasuak pauni patama Kapulauan Nusantara. Baik Sarasin maupun Bernhard bapandapek bahwo Tomuna di Pulau Muna jo Tokea di Sulawesi Bagian Tenggara (Konawe Utaro kini ko) basamo Toala di Sulawesi Salatan jo Urang Kubu di Sumatra, adolah migran dari benua Afrika malalui Saylon nan masuak di Nusantara sakitar 60.000 – 50.000 SM.

Urang Muna mulai mauni Pulau Muna sajak jaman purba tapeknyo sakitar era mesolitikum (50.000 SM). Namun Urang Muna kini ko bukanlah asli dari katurunan imigran nan patamo kali (60.000 – 50.000 SM), tetapi alah tajadi pacampuran dengan ras Austronesia – nan tibo pado era barikuiknyo (7.000- 5.000 SM) jo ras Melanosoid (Deutro Malayu dan Proto Malayu) sarato Mongoloid nan tibo sakitar 4000 – 2000 tahun SM. Iko didasarkan pado fakta dimano Bahaso Muna marupokan lingua franca Urang Muna masih ciek rumpun Bahaso Austronesia).

Demografi

Jumlah urang Muna manuruik sensus panduduak tahun 1930 sagadang 16.000 jiwa. Kini jumlah inyo indak diketahui sacaro pasti. Mampakirokan di antaro panduduak kawasan itu nan bajumlah 163.646 jiwa pado tahun 1976, dan 174.2 12 jiwa pado tahun 1980, sabanyak 87 persennyo adolah urang Muna. Urang Muna nan mauni di Pulau Muna bagian salatan nan tamasuak Kabupaten Buton balum tamasuak ka dalam jumlah tasabuik. Sajak lamo urang Muna dikenal sabagai kalompok nan mampunyoi mobilitas tinggi. Hal iko tabukti dari pasebaran kalompok iko. yoitu di sampiang di daerah lain dalam Propinsi Sulawesi Tenggara, urang Muna jugo manyebar di Luwu, Kalimantan Timua, Ambon, Ternate, lrian Jaya. Sebaliaknyo, misalnyo dalam periode 1980-1988, Kabupaten Muna manarimo 10.422 jiwa atau 2.589 KK transmigran dari Jawa. Bali. jo Nusa Tenggara Barat.

Urang Muna masih dapek dikalompokkan manjadi babarapo sub-suku banso, misalnyo sub-suku banso Ghoera, Siompu, Katobengke, Lakudo, Kadatua. Bahaso Muna tabagi dari babarapo dialek, nan namonyo samo dengan namo sub-suku banso panggunonyo. Bahaso Muna pado umumnyp mangenal tingkek-an pamakaian sasuai dengan lapihan atau goloangan masyarakik, misalnyo Pogau-Lele. Pogau-Kabhala, dan Pogau-Kamali. Kosa kato bahaso Muna manunjuakkan banyak pasamoan dengan bahaso Buton.

Agamo

Sabagian gadang urang Muna adolah urang baragamo Islam. Hubuangan antaro anggota karabaik dalam kaluargo inti atau kaluargo gadang ditato badasarkan nilai-nilai ajaran agamo.

Adaik istiadaik

Pado maso lalu, urang Muna umumnyo mauni di daerah padalaman, jarang sakali nan mauni di daerah pantai. Urang Muna biasonyo bakalompok antaro sasamo karabaik jo kalompok iko biaso disabuik tombu. Kalompok-kalompok iko mambantuak ciek komunitaih barupo sabuah kampuang (kampo). Latak ciek kampuang dengan kampuang lain acok bajauhan jo dipisahkan oleh faktor-faktor alam, misalnyo lakuak, lembah, gunuang, sungai, atau taluak. Dalam hal sistem kakarabaikkannyo manarik garih katurunan dari pihak laki-laki (patriIineal).

Upacara Karia

Pado Masyarakaik Muna tadapek upacara lingkaran hiduik dalam kahidupan individunyo, nan dimulai dari upacara kalahiran sampai pado upacara kamatian. Untuak malaksanokan upacara tasabuik saurang individu haruih malalui tahap-tahap. Salah satu tahap tasabuik adolah tahap paralihan maso kanak-kanak ka maso dewasa khusuihnyo padusi ado upacara nan inyo sabuik upacara Karia.

Upacara karia marupokan upacara nan sangaik pantiang dalam rangko upacara-upacara adaik disapanjang hiduik individu pado masyarakaik Muna. Upacara karia marupokan upacara inisiasi nan dilakukan kapado satiok padusi nan mamasuaki usia dewasa. Manuruik pamahaman Masyarakaik Muna, bahwo saurang padusi indak buliah manikah jikok alum malalui proses upacara Karia. Jikok dilangga, akan maraso tasisiah jo akan dikucilkan dalam masyarakaiknyo.

Tradisi Kasambu

Tradisi Kasambu marupokan tradisi turun tamurun nan diadokan oleh masyarakaik suku Muna, Sulawesi Tenggara. Tradisi iko marupokan bantuak syukuran tahadok kasalamaikkan saurang bini nan akan malahiakan anaknyo. Tradisi iko biaso diadokan manjalang kalahiran, biasonyo pado bulan ka-7 atau bulan ka-8. Prosesi kasambu dimulai dengan kaduo pasangan laki-bini saliang manyuapi. Sakali manyuap haruih dimakan satu kali atau dihabisi, bilo indak mako sisonyo diagiahkan kapado anak disakitarnyo nan alah dipasiapkan. Anak nan dipasiapkan iko diambil dari keluarga dekat. Pekerjaan manyuapi kamudian dilanjuikkan oleh anggota kaluargo lain kapado pasangan tasabuik. Makna lahiriah prosesi iko, yoitu manyatukan kaduo kaluargo pihak laki jo bini, sadangkan makna batiniyah marupokan wahana pakanalan bagi si janin tahadok lingkuangan kaluargo kalak inyo akan dilahiakan. Tradisi iko ditutuik dengan pambacoan doa salamaik nan dipimpin oleh saurang pajabaik agamo satampek/pamuko agamo/imam.

Mato pancaharian

Sabagian gadang urang Muna hiduik dari hasil bacocok tanam dengan tanaman pokok jaguang jo padi. Tanaman lain adolah ubi, tabu, jo sayua-mayua. Kini inyo jugo alah mananam jenis tanaman pakabunan, seperti cokelat, jambu mete, kopi, kapuak, dsb. Utan daerah pulau iko manyimpan kakayoan nan dapek diolah, misalnyo jati, rotan, kayu basi, kayu angsano, jo kayu bakau. Hasil lauik saperti cumi-cumi, taripang, jo mutiaro, balum diolah sacaro elok. Kini di antaro inyo ado nan bakarajo sabagai pagawai, padagang, buruah, pangrajin, nalayan, dan lain-lain.