Wikipedia

Urang Dayak Modang

Urang Dayak Modang adolah bagian dari suku Dayak nan mauni kawasan Kabupaten Kutai Kartanegara jo Kabupaten Kutai Timur, Provinsi Kalimantan Timur. Suku Dayak Modang tarutamo manampeki Kecamatan:

  1. Kembang Janggut (desa Long Beleh Modang)
  2. Muara Ancalong
  3. Muara Wahau
Litografi bajudua Orang-Boekit uit de Afdeeling Amoentai en Dajaksche vrouw uit Longwai ("Urang Bukik/Dayak Meratus dari afdeeling Amuntai jo padusi Dayak Modang dari Long Wai") badasarkan gambar oleh Carl Bock (1887)

Y. Mallinckrodt mangamukokan bahwo masyarakaik Dayak Modang adolah sub kalompok urang Bahau. Tetapi, kini ko Dayak Modang dianggok sabagai kalompok surang lo atau lapeh dari kalompok Bahau.[1] Jumlah populasi suku Dayak Modang sakitar 15.000 (1981 Wurm and Hattori).[2]

Asa usua suntiang

Urang Dayak Modang barasa dari daerah Apo Kayan, nan marupokan daerah nan saolah-olah manjadi pusek pulau Kalimantan. Daerah iko babatehan dengan Sarawak, Malaysia Timur. Kini ko, daerah Apo Kayan manjadi bagian kawasan Kabupaten Bulungan, Provinsi Kalimantan Utara. Masyarakaik Modang manjadi kalompok mulo nan maninggakan Apo Kayan dibandiang sub kalompok Bahau lainnyao. Kamudian, urang Modang mauni kawasan di sakitar aliran Sungai Belayan, Sungai Kelinjau, jo Sungai Telen. Katigo sungai tasabuik adolah anak Sungai Mahakam. Salamo pajalanan dalam migrasi tasabuik inyo bajumpo dengan budayo lain jo mambantuak budayo nan bavariasi atau mambantuak budayo nan babedo dari kalompok asanyo (kalompok Bahau).[1]

Kahidupan suntiang

Urang Dayak Modang pado umumnyo mamanfaaikkan aliran sungai sabagai sarana prasarana pahubuangan dengan mambaok sampan onda atau sampan dayuang. Masyarakaik iko hiduik dari baladang dengan tanaman padi dan sistem nan digunokan adolah ladang bapindah. Inyo juo mamanuahi keabutuahan dengan mangumpuakan hasil utan, sarato manangkok lauak dari sungai di sakitar pamukiman.

Kakarabaikan nan dianuik suku Dayak Modang adolah bilateral, nan artinyo maambiak garih katurunan pado pihak ayah maupun induak. Sasudah manikah, sapasang pangantin babeh manantukan tampek tingga, apokah di lingkuangan karabaik laki atau bini.[1]

Kasenian suntiang

Hudoq suntiang

Tari Hudog adolah tarian nan manggunokan topeang jo tadapek kapicayoan bahwo katiko malaksanokan tari Hudoq para dewa utuihan Sang Pancipta tibo ka dunia untuak manoloang kahidupan manusia, manoloang mausia hamo panyakik padi jo sagalo hal buruak nan akan manimpo kampuang. Panari Hudoq manggunokan kostum nan barasa dari daun pisang hinggo manutuik mato kaki jo mamakai topeang kayu nan manggambarkan ekspresi tokoah-tokoah nan bapangaruah dalam kahidupan masyarakaik Dayak.[3] Hudoq dimulai dengan Sakaeng Ngaweit, yoitu ritual monolog nan mampunyoi tujuan untuak manyampaikan pamohonan. Sasudah itu, sakalompok induak-induak manari jo malantunkan syair, mambantuak arak-arakan di sapanjang jalan manuju rumah adaik (lamin adaik atau Maeso Puen).[4] Pado jaman dahulu, sabagian masyarakaik picayo bahwo urang nan sakik akan lakeh cegak apobilo kanai kibehan kostum dari panari Hudoq tasabuik.[3]

Ngewae suntiang

Ngewae adolah tari untuak manyambuik kalahiran anak bangsawan.[1]

Njiek Hapoi suntiang

Njiek Hapoi marupokan tarian sabagai wujuik panghormaikkan tahadok rajo atau tamu tahormaik.[1]

Njiek Tewea suntiang

Tarian ini adolah tari marumpuik padi atau satalah mamotoang padi nan basipek hiburan.[1]

Njiek Kenkah Gundea suntiang

Njiek Kenkah Gundea adolah tari nan basipek hiburan.[1]

Njiek Ndaae Tegun suntiang

Njiek Ndaae Tegun atau biaso disabuik dengan tarian buruang enggang marupokan tari nan baguno juo untuak hiburan.[1]

Ding Wuk suntiang

Nyayian iko mangiriangi tarian Ding Wuk, nan digunokan sabagai hiburan pado malam ado karamaian, manyambuik tamu, pesta makan nasi baru, jo sabagainyo. Tarian Ding Wuk bakaikkan dengan legenda dari carito parkawinan anak rajo Modang dengan putri rajo lain.[1]

Dung suntiang

Dung marupokan nyanyian para laki-laki katiko pulang baparang nan banada sadiah manganang anggotanyo nan gugua. Katiko manyanyikannyo, para kalaki itu duduak malingka dalam rumah panjang samalaman. Dini hari, inyo turun dari rumah dan bajalan hilia mudiak dalam kampuang sambia banyanyi sampai siang hari.[1]

Netna suntiang

Netna adolah nyanyian hiburan pado katiko mamotoang padi untuak mandoroang samangaik dalam bakarajo.[1]

Ngen Jiu Hen Ie suntiang

Ngen Jiu Hen Ie marupokan lagu hiburan katiko duduak basamo manikmati sinar bulan purnamo. Nyanyian iko dilakukan oleh urang kalaki jo padusi dengan saliang basahuikan dengan liriak nan panjang.[1]

Jong Nyelong suntiang

Jong Nyelong adolah nyanyian sabagai pangiriang tari untuak ungkokan raso syukua karano kabarhasilan panen di ladang. Jong Nyelong dibaokkan oleh urang kalaki jo padusi tanpo iriangan musik.[1]

Jantung Utang suntiang

Jantung utang artinyo adolah kayu nan ditokok. Jantung Utang adolah sajenis alaik musik tokok nan tadiri dari bilah-bilah kayu. Alaik musik iko dipunyoi oleh suku Dayak Kenyah, tetapi sairiang dengan papindahan suku Dayak Kenyah dari padalaman ka daerah lain, Jantung Utang dapek disobokkan pado suku Dayak Modang, Bahau, Segai, Tumbit, Kayan, Brusu, dan lain-lain.[5]

Ritual suntiang

Ritual Palakekan Namo suntiang

Doa jo harapan tacamin pado namo sasaurang, artinyo sasaurang nan manyandang namo tasabuik diharokkan akan mamparoleah hal-hal nan elok dalam kahidupan. Pambarian namo pado suku Dayak Modang disaratoi dengan prosesi palakekan namo. Ritual Nen Kaeg Heig Metaeyang (nan mawujuikkan pamohonan kapado Nan Maho Kuaso) manjadi pamuloan dari prosesi palakekan namo pado suku Dayak Modang. Sasudah salasai marapalkan mantra atau doa-doa dengan posisi manghadok ka sungai Mahakam, pimpinan upacara adaik malatakkan sambilan talua ayam kampuang ka ujuang satiok tongkaik buluah nan alah ditancapkan dengan bajejer, nan pado bagian bawahnyo tadapek siriah, bareh, jo rokok. Satalah itu, dilakukan panyambaliahan saikua ayam jantan nan bawarna sirah, darah ayam tasabuik disangga dalam piriang putiah nan barisi bareh jo talua, nan kamudian akan dilatakkan di Mahakam. Bunyi gandang jo tabuhan gong mangiriangi saluruah rangkaian ritual palakekan namo.

Kamudian, urang tuo mambaok anak laki-lakinyo nan akan diagiah namo manuju ka tampek palaksanoan adaik atau tampek iko disabuik dengan Hewat nan baralehkan tikar purun. Induak mamasang galang maniak pado anak tasabuik. Pamasangan iko bamakna sabagai ikekan hubuangan. Salanjutnyo, dilaksanokan prosesi Me et Jiem atau pamotoangan rambuik anak oleh tatuo adaik, nan mampunyoi arti panataan awal tata adaik kahidupan atau marupokan ungkokan proses patumbuahan. Satalah prosesi Me et Jiem usai, dilakukan ritual Net Leug atau mamohon calon namo untuak anak malalui parantaro daun pisang ambon nan alah dibantuak manjadi kotak dengan ukuran 3x4 cm sabanyak tigo rangkok.

Pamimpin upacara mamacik duo potoang daun pisang ambon itu dalam posisi tagak. Daun tasabuik dilemparkan kaateh jo dibiarkan jatuah ka tanah sambari mangucok doa. Posisi daun nan baru jatuah tasabuik dilihek, apobilo kaduo daun talantang atau tatungkuik bararti tadapek patando Tidak, sahinggo prosesi haruih dilaksanokan lagi. Apobilo posisi daun pisang nan dijatuahkan salah satu talantang jo nan lainnyo tatatungkuik, itu bararti namo nan alah diajukan pihak kaluargo mandapek jawaban Yo dari leluhur inyo atau alah mandapek pasatujuan.

Kamudian dilaksanokan ritual Ensoet Kenean atau mamakaikan pakaian adaik jo pusako warisan kapado anak nan dilakukan oleh para tatuo. Ritual tasabuik malambangkan hubuangan kakarabaikkan turun tamurun nan mampunyoi makna panguekan identitas. Untuak mawujuikkan raso syukua, dilangsuangkan ritual Newag Jip Edat atau pamotoangan binatang barupo babi jantan nan diganti dengan duo ikua ayam jantan. Ritual Newag Jip Edat iko marupokan panghantar adaik nan alah ditatokkan kapado Nan Maho Kuaso jo leluhur. Darah dari ayam tasabuik akan dioleskan ka tangan, kaki, jo kapalo pado anak jo urang tuonyo, sarato dioleskan pulo ka benda-benda pusako kaluargo, antaro lain Mandau, sabagai lambang pangukuahan sacaro spiritual.

Satalah ritual Ensoet Kenean salasai, akan dilaksanokan tarian adaik Ngewai, yoitu para tatuo jo saluruah kaluargo manari mangaliliangi tampek ritual adaik sabanyak salapan kali putaran. Tarian tasabuik manggambarkan tahap-tahap proses kahidupan alam fana hinggo alam baka. Ritual penetral lingkungan (nan dimaksudkan untuak manghilangkan hal-hal nan akan mangganggu kahidupan) akan manjadi panutuik prosesi pambarian namo. Pado prosesi iko sausai mambaco mantra, saurang tatuo adaik mangibeh-ngibehkan rangkaian daun buluah, daun temali, peredang jo anak ayam ka lingkuangan sakitar, tamasuak kapado kaluargo nan hadir pado ritual itu. Satiok anggota kaluargo juo diminta untuak maludahi daun-daun tasabuik. Barikuiknyo, anak ayam itu disambaliah di bawah tongkaik buluah, lalu tatuo adaik malihek isi paruiknyo untuak mangatahui apokah para leluhur bakanan indak ateh upacara adaik nan alah dilaksanokan.[6]

Rujuakan suntiang

  1. ↑ a b c d e f g h i j k l m Melalatoa, M. Junus (1995). Ensiklopedi Suku Bangsa di Indonesia Jilid L-Z. Jakarta: Departemen Pendidikan dan Kebudayaan RI. hlm. 578-579.
  2. ↑ Hidayah, Zulyani (2015). Ensiklopedi Suku Bangsa di Indonesia. Jakarta: Yayasan Pustaka Obor indonesia. hlm. 264.
  3. ↑ a b Herjayanti, Risna (2014). "MAKNA SIMBOLIK TARI HUDOQ PADA UPACARA PANEN BAGI MASYARAKAT SUKU DAYAK GA'AY KABUPATEN BERAU KALIMANTAN TIMUR". Universitas Negeri Yogyakarta.
  4. ↑ "HUDOQ". Direktorat Warisan dan Diplomasi Budaya (dalam bahasa Indonesia). 2015-12-17. Diarsipkan dari versi asli tanggal 2023-02-07. Diakses tanggal 2023-02-16. 
  5. ↑ Achmat, Hasjim (1986). Peralatan hiburan dan Kesenian Trasisional Daerah Kalimantan Timur. Samarinda: Departemen Pendidikan dan Kebudayaan. hlm. 50-53.
  6. ↑ "Ritual Pelekatan Nama Dayak Modang, Meriahkan EIFAF - Protokol dan Komunikasi Publik Kabupaten Kutai Kartanegara". web.archive.org. 2019-04-10. Diarsipkan dari versi asli tanggal 2019-04-10. Diakses tanggal 2023-02-16. 
Diambiak dari "https://min.wikipedia.org/w/index.php?title=Urang_Dayak_Modang&oldid=3150372"