Wikipedia

Undang-undang nan Duo Puluah

undang-undang pidana Minangkabau

Undang-undang nan Duo Puluah adolah sarangkaian hukum adaik Minangkabau nan mangatur tantang katantuan pidana dalam masyarakat Minangkabau. Sacaro umum, Undang-undang ko tabagi pado duo bagian nan utamo: Undang-undang nan Salapan jo Undang-undang nan Duo Baleh.

Undang-undang nan Salapan suntiang

Undang-undang nan Salapan (disabuik juo sabagai undang-undang nan di ilie) adolah lapan macam paraturan nan mangatur tantang jinih-jinih kasalahan (cemo nan bakadaan) nan dapek kanai hukuman sapanjang adaik.[1][2] Macam-macam kasalahan nan diatur dek undang-undang ko adolah:

  1. Tikam bunuah padang badarah: tikam artinyo mambuek luko surang urang sacaro sangajo, ketek atau gadang. Bunuah dapek bamukasuik pambunuahan surang urang dek sangajo atau untuak alasan mambela diri. Hukuman kasalahan tikam bunuah adolah mambayia sajumlah ameh sabagai pangganti; untuak urang miskin nan indak mampu mambayia, bisa diganti jo kambiang, nasi kunyik, atau pakaian sapatagakan.[3]
  2. Samun saka tagak di bateh: samun aratinyo maambiak barang kapunyoan surang urang (pancurian), samantaro saka aratinyo samun nan ditambah pulo jo pambunuahan. Urang nan manyamun dihukum mambaliakkan barang-barang nan inyo ambiak pado tuan usalinyo dan diikek salamo tigo hari, sadang untuak urang nan manyaka hukumannyo samo jo pambunuah.[3]
  3. Upeh racun batabang sayak: upeh aratinyo maagiah sajinih racun dalam makanan surang urang; kok urang nan kanai upeh sampai mati, mako jatuah hukuman nan samo cando tikam bunuah. Hukuman untuak urang nan maupeh adolah 20 ameh, sadang untuak nan maracun samo jo paambunuah.[3]
  4. Kicuah kicang budi marangkak atau umbuak umbai: kicuah aratinyo mangurangi dari katarangan nan sabanyo; kicang aratinyo manipu tantang kualitas barang nan dijua (ameh basapuah dikato murni); umbuak jo umbai samo jo panipuan nan mampagunoan kato-kato nan manih tapi nyatonyo duto. Hukuman ateh kaampek macam pabuatan ko adolah sasuai karugian nan didapek dek urang nan takanai.[3]
  5. Dago dagi mambari malu: dago adolah pabuatan mambantah kato-kato kapalo adaik sainggo mangganggu tagaknyo undang jo adaik nan rasmi dan marusak kahormatan nagari; dagi adolah pabuatan mangganggu katantaraman jo kadamaian masyarakat, mambuek haru-biru dalam nagari, ampia sapangkek jo kagiatan subversif. Hukuman untuak pandago/pandagi bamacam-macam, dari dando satu tail ameh, saikua kabau, dijadian sandera di istano rajo, dibuang siriah, dibuang tangkarang, sampai dibuang putuih ka luar daerah.[3]
  6. Maliang curi taluang dindiang: maliang aratinyo maambiak arato urang lain dari tampek simpanannyo pado malam hari, sadang curi aratinyo maambiak barang urang nan talatak dima-dima sajo, indak tantu siang atau malam. Hukuman untuak maliang atau pancuri mulai dari dilapeh jo nasiaik sajo, dicukua rambuiknyo, diagiah conteang di mukonyo, atau diarak kaliliang nagari. Kok maliang atau pancuri ko dibunuah kutiko sadang malakukan pabuatannyo, nan mambunuah indak akan dituntuik dan si mati ko dianggap mati anjiang sajo.[3]
  7. Rabuik rampeh atau rabuik rompak: bantuak kasalahannyo ampia samo jo samun saka, dan hukumannyo samo pulo.[3]
  8. Sumbang salah laku parangai: sumbang adolah pabuatan nan indak patuik dan malangga kahormatan surang urang sapanjang adaik, cando maintai anak gadih mandi; salah adolah kasumbangan nan labiah barek, cando malakukan zina. Duo urang nan alun kawin dan babuek sumbang hukumannyo dikawinkan.[3]

Ado pulo salah satu macam kasalahan nan masuak dalam babarapo naskah adaik namun indak tamasuak dalam nan Salapan, namonyo siai baka sabatang suluah, yaitu mambakar rumah atau kabun urang, dan hukumannyo ampai samo jo samun saka jo rabuik rampeh.[3][2]

Undang-undang nan Duo Baleh suntiang

Undang-undang nan Duo Baleh (disabuik pulo sabagai undang nan di mudiak)[1] tabagi manjadi duo bagian: Undang-undang Anam nan Daulu maatur prosedur pambuktian palanggaran atau kajahatan nan tatangkok basah atau badasarkan kasaksian urang; jo Undang-undang Anam nan Kudian maatur prosedur pambuktian palanggaran atau kajahatan badasarkan tando atao katarangan.[2]

Undang-undang Anam nan Daulu suntiang

  1. Tatumbang taciak: aratinyo surang urang ko indak dapek mailak dari tuduahan atau mangaku surang ateh pabuatannyo.[2]
  2. Tatando tabukti: aratinyo alah basuo jajak atau tando baso urang ko lah nan ado di tampek tajadinyo kajahatan atau basuo bukti nan mambarekkan kapado surang urang ko.[2]
  3. Tacancang tarageh: aratinyo tampak bakeh barang nan punyo surang urang ko di tampek tajadinyo kajahatan atau di badannyo surang.[2]
  4. Taikek takabek: aratinyo urang ko taintai atau tasuo dek urang lain kutiko sadang babuek kajahatan.[2]
  5. Talala takaja: aratinyo urang jaek ko ditamuan di tampek inyo mailak atau bisa tatangkok dek urang rami sasudah dikaja.[2]
  6. Taambek tapukua: aratinyo urang jaek ko bisa taambek dek urang rami salapeh dikapuang atau tapaso inyo dipukua dek sabab malawan.[2]

Undang-undang Anam nan Kudian suntiang

  1. Basuriah bak sipasan, bajajak bak bakiak: aratinyo jajak urang ko ditamuan di tanah dan kok diikuik-an maarah pado inyo.[2]
  2. Anggang lalu atah tajatuah: aratinyo urang ko ditamuan kutiko sadang barado di tampek kajadian kajahatan.[2]
  3. Condong mato urang banyak: aratinyo urang ko manarik paratian urang rami dek tingkah lakunyo.[2]
  4. Bajua bamurah-murah: aratinyo pabuatan jaek tacium dek manjau sasuatu nan aragonyo murah atau di bawah arago pasa, dek sabab barasa dari tampek nan inyo punyo.[2]
  5. Bajalan bagageh-gageh: aratinyo urang ko dicurigai urang rami karano kutiko bajalan inyo tagageh-gageh dan indak wajar.[2]
  6. Dibaok pikek, dibaok langau: aratinyo urang ko dicurigai dek inyo galisah ilia-mudiak indak bakatantuan.[2]

Jinih-jinih hukuman suntiang

Ganti rugi suntiang

Sasuai prinsip bangkak didamak luko ditaweh atau bongkak didiang, luko diubek, kok kajahatan surang urang mambuek sakik urang nan jadi korbannyo, si urang jaek wajib mambiayai ubek korbannyo.[2]

Dando suntiang

Dando adolah jinih hukuman nan paliang umum dalam pidana adaik di Minangkabau,[4] sasuai prinsip adaik diisi limbago dituang sarato kaki tataruang inai padahannyo, lidah tadorong ameh padahannyo. Dando dapek dijatuahkan sabagi hukuman pangganti nan basipaik material atau untuak palanggaran nan basipaik immaterial, cando sumbang salah.[2]

Buang suntiang

Dibuang atau dikuciakan (di Silungkang disabuik dikuruang di lua)[2] dijatuahan mamakai banyak prinsip. Pado dasarnyo, urang nan dibuang di kaba baiak indak diimbauan, di kaba buruak indak diiambauan dan indak ditapuak banduenyo, indak ditingkek-i janjang rumah gadangnyo. Hukuman buang dianggap sabagai hukuman nan paliang barek, dek sabab baabu bagantiak, kumuah basasah. Jinih-jinih buang nan lazim antaro lain:[2]

  1. Buang biduak, buang siriah atau dikuciekan: dibuang dan diasiangan dari kaumnyo surang;
  2. Buang daki: dibuang dari nagarinyo dan aratonyo dirampeh untuak mangganti rugi korban kajahatannyo;
  3. Buang tingkarang atau buang bidal: dibuang dari nagarinyo, namun buliah pulang salapeh maisi adaik jo caro mandabiah kabau, jawi, atau kambiang;
  4. Buang puluik: dibuang dari nagarinyo dan indak buliah pulang mamakai alasan apo pun.

Rujuakan suntiang

  1. ↑ a b A. Damhoeri (ca. 1970), "Hukum Pidana Menurut Adat".
  2. ↑ a b c d e f g h i j k l m n o p q r s Hasanuddin (2013). "UNDANG DAN PELEMBAGAAN MAHKAMAH ADAT MINANGKABAU". Disampaikan dalam Seminar Internasional dan Festival Tradisi Lisan ke-X di Mataram, NTB, pado 25-28 Oktober 2017.
  3. ↑ a b c d e f g h i A. Damhoeri (ca. 1970), "Undang-undang Hukum Pidana Adat".
  4. ↑ Ali Akbar Navis (1984). Alam Takambang Jadi Guru. Jakarta: Grafiti Pers.

Sumber suntiang

Diambiak dari "https://min.wikipedia.org/w/index.php?title=Undang-undang_nan_Duo_Puluah&oldid=2047686"