Wikipedia

Universitas Andalas

paguruan tinggi di Sumatra Barat
(Dialiahkan dari Unand)

Universitas Andalas, biaso disingkek jo Unand adolah salah satu paguruan tinggi nagari di Kota Padang, Sumatera Barat, Indonesia. Universitas iko marupoan universitas paliang tuo di lua Jao di Indonesia nan didirian pado tanggal 23 Desember 1955 dek wakil Presiden Mohammad Hatta.

Universitas Andalas
Lambang Universitas Andalas
Lambang Universitas Andalas
MottoUntuk Kedjajaan Bangsa
TipePaguruan tinggi nagari
Didirian23 Desember 1955
RectorProf. Dr. Yuliandri, SH., MH.
Academic staff
2.600[1]
Students26.000 orang[1]
Lokasi
Padang
,
Sumatera Barat
,
Indonesia
KampusLimau Manih, Padang
ColorsHijau tuo
NicknameKampus hijau
Websiteunand.ac.id
Suasana di Minangkabau Corner Universitas Andalas

Universitas Andalas tadiri dari limo baleh fakultas, nan sabagian gadang talatak di Limau Manis, sakitar 12 km dari pusek Kota Padang. Rektor Universitas Andalas sajak taun 2011 adolah Dr. Werry Darta Taifur. Majalah Tempo pado taun 2009 manampekkan Unand di posisi ka-14 atau posisi patamo di lua Pulau Jao dalam analisisnyo tahadok kapasitas alumninyo nan diserap dek dunia usaha.[2] Webometrics juo manobatkan Unand sabagai 100 paguruan tinggi tabaiak di ASEAN (paringkek 26) atau paringkek 8 di Indonesia (tabaiak di lua Pulau Jao) pado bulan Januari 2011.[3]

Sijarah

suntiang

Pariode awal (1948-58)

suntiang
 
Peresmian Universitas Andalas pada tanggal 13 September 1956
 
Mohammad Hatta, pencetus nama Universitas Andalas

Kainginan masarakaik Sumatra Barat untuak mandirikan sabuah paguruan tinggi alah ado sajak mamasuki abaik ka-20. Hal itu dapek dipahami karano pado maso itu alah muncua golongan intelektual jo cendekiawan nan paduli jo pandidikan anak bangsa. Namun, Pamarintah Kolonial Balando indak maagiah kasempatan saketek jo untuak mawujudkannyo. Gagasan itu mangamuka baliak sairing diproklamasikannyo kamerdekaan Indonesia pado tanggal 17 Agustus 1945.

Kainginan untuak mandirikan sabuah janjang pandidikan tinggi di Sumatra Barat baru dapek diwujudkan pado tahun 1948 jo mandirikan anam akademi, yaitu: Akademi Pamong Praja, Akademi Pandidikan Jasmani, Akademi Kadet, Akta A Bahasa Inggris, jo Sakolah Inspektur Polisi. Kaanam akademi tu barado di Bukittinggi. Salanjuiknyo, kabahasilan pandirian akademi iko mandorong sabuah yayasan pandidikan banamo Yayasan Sriwijaya untuak mandirikan Balai Paguruan Tinggi Hukum Pancasila (BPTHP) di Padang pado tanggal 17 Agustus 1951.

Mangikuti langkah Yayasan Sriwijaya tu, kamudian pamarintah mandirikan Paguruan Tinggi Pandidikan Guru di Batusangkar pado tanggal 23 Oktober 1954, Paguruan Tinggi Nagari Patanian di Payakumbuah pado tanggal 30 November 1954, jo Fakultas Kadokteran sarato Fakultas Ilmu Pasti jo Ilmu Alam (FIPIA) di Bukittinggi pado tanggal 7 September 1955. Kaampek fakultas tu diresmikan dek Wakia Presiden Mohammad Hatta. Sairing jo itu, Yayasan Sriwijaya pun manyarahkan BPTHP kapado Pamarintah Provinsi Sumatra Tengah. Kamudian, sajak itu BPTHP baganti namo manjadi Fakultas Hukum jo Pangatahuan Masarakaik.[4]

Kalimo fakultas itu manjadi cikal bakal dalam mandirikan Universitas Andalas. Dek karano marupokan universitas partamo nan didirikan di Pulau Sumatra, mako Bung Hatta mangusuakan namo Universitas Andalas, nan marujuak ka namo Pulau Sumatra nan tanamo pulo jo Pulau Andalas.

Pado tanggal 13 September 1956, Wakia Presiden Mohammad Hatta maresmikan pambukaan Universitas Andalas di Bukittinggi. Salanjuiknyo, pado tahun 1958, untuk partama kalinyo Universitas Andalas mulai mamatiak hasia jo lulusnyo Mr. Rudito Rachmad sabagai Sarjana Hukum partamo kali. Satahun barikutnya, Fakultas Hukum jo Pangatahuan Masarakaik mawisuda pulo ampek mahasiswanyo, yaitu Mr. Herman Sihombing, Mr. Zawier Zienser, Mr. Eddy Ang Ze Siang, jo Mr. Djalaluddin Ilyas.[5]

Era pagolakan (1958-61)

suntiang

Babarapo bulan sasudah maresmikan Unand, Bung Hatta nan indak sapaham lai jo Presiden Soekarno malatakkan jabatannyo sabagai Wakia Presiden. Sahinggo barakhialah Dwi Tunggal Soekarno-Hatta. Babarapo tokoh militer jo politik pun kamudian basapakaik untuak "manegur" pusat jo mandirikan Pamarintahan Revolusioner Republik Indonesia (PRRI) sarato manjadikan Sumatra Tengah, khususnyo Sumatra Barat sabagai basisnyo.[6]

Dek karano itu, banyak dosen jo mahasiswa Unand nan manunjukkan kasepahamannyo jo PRRI. Akibaiknyo, Tantara Nasional Indonesia nan ditugaskan untuak manumpas PRRI juo mamporakporandakan kampus Unand nan tasebar di babarapo kota: Padang, Bukittinggi, Batusangkar, jo Payakumbuah sarato nan baru dibangun pulo di Baso.

Situasi politik pado wakatu itu bana-bana indak kondusif untuak malaksanakan aktivitas pakuliahan. Dosen-dosen nan didatangkan dari lua nagari, tarutamo dari Eropa, ado nan pulang ka nagarinyo masiang-masiang sarato ado pulo nan pindah ka Universitas Gadjah Mada, Universitas Indonesia, jo Institut Pertanian Bogor. Pado masa PRRI dapek dikatokan sabagai maso kamunduran Universitas Andalas.[7]

Orde Baru jo Reformasi (1961-kini)

suntiang

Sairiang jo barakhianyo PRRI, Unand baliak manata pakambangannyo. Pado tahun 1961, Unand mambukak baliak Fakultas Patanian, Fakultas Kadokteran, jo Fakultas Kaguruan jo Ilmu Pandidikan (FKIP) jo mamindahkannyo ka Padang. Sadangkan Fakultas Ilmu Pasti jo Ilmu Alam (FIPIA) baru bisa dibukak satahun kamudian, itupun hanyo bisa jo ciek jurusan, yaitu Biologi. Salanjuiknyo, Paguruan Tinggi Ekonomi nan didirikan dek Yayasan Paguruan Tinggi Pancasila pado tanggal 7 September 1957 manggabungkan diri jo Unand. Pado tanggal 9 Oktober 1963, Unand mambukak Fakultas Paternakan. Fakultas iko marupakan Fakultas Paternakan partamo nan didirikan di Indonesia. Jo damikian, sampai tahun 1963 Unand alah mamiliki tujuah (7) fakultas, namun pado tahun berikuiknyo FKIP mamisahkan diri nan kamudian bakambang manjadi Institut Kaguruan jo Ilmu Pendidikan (IKIP) nan salanjuiknyo barubah namo manjadi Universitas Negeri Padang (UNP).[8]

Karano kapindahan kampusnyo kaa Padang, Unand mulai mambanahi diri saacaro manyaluruah, baiak dari segi organisasi, dosen, maupun infrastruktur. Kampus Air Tawar dibangun untuak Fakultas Patanian, FIPIA, Fakultas Paternakan, jo FKIP (kini manjadi kampus UNP). Adopun Fakultas Ekonomi dibangun di kampus Jati, Padang (kini kampus Fakultas Ekonomi Program Reguler Mandiri jo STIE Dharma Andalas). Sadangkan Fakultas Kadokteran ado di duo lokasi, yaitu Kampus Jati jo Pondok. Fakultas Hukum tatap barada di kampusnyo nan lamo di Parak Karambia (kini kampus Fakultas Hukum Program Reguler Mandiri). Adapun rektorat Unand barado di kampus Jati basabalahan jo Fakultas Ekonomi. Pado tahun 1962, jumlah dosen Unand alah mancapai 261 urang, tamasuak 180 urang dosen luar biaso jo "dosen tabang". Adopun jumlah mahasiswanyo alah mancapai 3920 urang.[9]

Pado tahun 1982, Fakultas Sastra didirikan jo mulai manarimo mahasiswanyo untuak angkatan partamo. Pado awalnyo fakultas iko banamo Fakultas Sastra jo Sosial Budaya kamudian baganti namo manjadi Fakultas Sastra karano Jurusan Sosiologi sarato Program Studi Sosiologi jo Antropologi nan baru dibuka "dititipkan" di fakultas iko. Kaduo program studi tu manjadi cikal bakal untuak mandirikan Fakultas Ilmu Sosial jo Ilmu Politik (FISIP) pado tahun 1993. Fakultas Sastra kamudian baganti namo manjadi Fakultas Ilmu Budaya pado tahun 2011. Kampus kaduo fakultas iko talatak di Jl. Situjuh, Jati, Padang, nan sabalumnyo marupokan Labor Fisiologi Fakultas Kedokteran (kini rumah dinas rektor jo gaduang pacetakan Unand). Barikutnya, Unand mambukak pulo duo program studi Teknik Masin jo Teknik Sipil pado tahun 1985, nan marupokan cikal bakal tabantuaknyo Fakultas Teknik. Pado awalnyo pangalolaan kaduo program studi ko barado di Fakultas Matematika jo Pangetahuan Alam (FMIPA), sadangkan dalam palaksanaan pakuliahannyo Unand bakarajo samo jo Institut Teknologi Bandung (ITB). Pandirian Fakultas Teknik iko baru disatujui dek Dirjen Dikti pado tanggal 13 Mei 1993.[10]

Fakultas

suntiang

Sajak mulo tagaknyo inggo kini, Universitas Andalas alah punyo limo baleh (15) fakultas dan ciek program pascasarjana, nan tadiri dari 44 program studi sarjana, 38 program studi magister (S2), 8 program studi doktor (S3), 12 program pandidiakan dokter spesialis, 5 program profesi, dan 4 program studi D3.[11]

Fakultas Dies Natalis Warno panji Program studi Sumber
Fakultas Hukum 17 Agustus 1951 Sirah tuo Ilmu Hukum, Pendidikan Profesi Kenotariatan [12]
Fakultas Pertanian 30 November 1954 Ijau mudo Agribisnis, Agroekoteknologi, Ilmu Tanah, Proteksi Tanaman [13]
Fakultas Kedokteran 7 September 1955 Ijau tuo Pendidikan Dokter Umum, Psikologi, Kebidanan [14]
Fakultas MIPA 7 September 1955 Kuniang mudo Kimia, Matematika, Fisika, Biologi [15]
Fakultas Ekonomi 7 September 1957 Abu-abu Ekonomi Pembangunan, Manajemen, Akuntansi, program DIII (Pemasaran, Akuntansi, Kesekretariatan & Manajemen Perkantoran, Keuangan Perbankan, Keuangan Nagaro & Daerah), Kampus II Payakumbuh (Manajemen, Ekonomi Pembangunan) [16]
Fakultas Peternakan 9 Oktober 1963 Ungu Ilmu Peternakan, Ilmu Peternakan (Kampus III Dharmasraya) [17]
Fakultas Ilmu Budaya 7 Maret 1982 Putiah Ilmu Sejarah, Sastra Inggris, Sastra Indonesia, Sastra Jepang, Sastra Minangkabau [18]
Fakultas Teknik 13 Mai 1993 Biru tuo Teknik Industri, Teknik Elektro, Teknik Mesin, Teknik Lingkungan, Teknik Sipil [19]
Fakultas Ilmu Sosial dan Ilmu Politik 13 Mai 1993 Oranye Ilmu Politik, Sosiologi, Antropologi Sosial, Ilmu Administrasi Negara, Ilmu Hubuangan Internasional, Ilmu Komunikasi [20]
Fakultas Farmasi 15 Mei 2008 Ameh Farmasi, Pendidikan Profesi Apoteker [21]
Fakultas Teknologi Pertanian 15 Mei 2008 Biru lauik Teknologi Hasil Pertanian, Teknik Pertanian [22]
Fakultas Kesehatan Masyarakat 13 Juli 2012 Indigo Ilmu Kesehatan Masyarakat, Ilmu Gizi [23]
Fakultas Teknologi Informasi 13 Juli 2012 Perak Sistem Komputer, Sistem Informasi [24]
Fakultas Keperawatan 13 Juli 2012 Kombinasi warno aia lauik (Aqua Marine) Ilmu Keperawatan [25]
Fakultas Kedokteran Gigi 13 Juli 2012 Ungu Pendidikan Dokter Gigi
Program Pascasarjana 17 September 1984 Biru langik Liek daftar Archived 2016-08-19 di Wayback Machine.

Rujuakan

suntiang
  1. ↑ a b Staf & Mahasiswa[pranala nonaktif permanen]
  2. ↑ http://www.gatra.com/universitas-andalas
  3. ↑ Unand di webometrics Archived 2012-03-18 di Wayback Machine. Diakses 17 Juli 2012.
  4. ↑ Salingka Unand. Unand Publisher. 28 Nopember 2010. ISBN 0-465-02328-2.  hal. 6
  5. ↑ Zulqayyim, hal. 6.
  6. ↑ Asnan, Gusti, (2007), Memikir ulang regionalisme: Sumatra Barat tahun 1950-an, Yayasan Obor Indonesia, ISBN 978-979-461-640-6.
  7. ↑ Zulqayyim, hal. 8.
  8. ↑ Sejarah UNP Archived 2021-01-14 di Wayback Machine..
  9. ↑ Zulqayyim, hal. 9.
  10. ↑ Zulqayyim, hal. 10.
  11. ↑ [1] Archived 2015-06-01 di Wayback Machine..
  12. ↑ Fakultas Hukum
  13. ↑ "Fakultas Pertanian". Diarsipkan dari versi asli tanggal 2016-07-12. Diakses tanggal 2016-08-19. 
  14. ↑ "Fakultas Kedokteran". Diarsipkan dari versi asli tanggal 2013-03-06. Diakses tanggal 2016-08-19. 
  15. ↑ "Fakultas Matematika dan Ilmu Pengetahuan Alam". Diarsipkan dari versi asli tanggal 2016-08-16. Diakses tanggal 2016-08-19. 
  16. ↑ "Fakultas Ekonomi". Diarsipkan dari versi asli tanggal 2016-08-25. Diakses tanggal 2016-08-19. 
  17. ↑ "Fakultas Peternakan". Diarsipkan dari versi asli tanggal 2013-01-27. Diakses tanggal 2016-08-19. 
  18. ↑ "Fakultas Sastra". Diarsipkan dari versi asli tanggal 2014-01-04. Diakses tanggal 2016-08-19. 
  19. ↑ "Fakultas Teknik". Diarsipkan dari versi asli tanggal 2016-08-13. Diakses tanggal 2016-08-19. 
  20. ↑ "Fakultas Ilmu Sosial dan Politik". Diarsipkan dari versi asli tanggal 2010-07-30. Diakses tanggal 2016-08-19. 
  21. ↑ "Fakultas Farmasi". Diarsipkan dari versi asli tanggal 2016-09-04. Diakses tanggal 2016-08-19. 
  22. ↑ "Fakultas Teknologi Pertanian". Diarsipkan dari versi asli tanggal 2016-08-13. Diakses tanggal 2016-08-19. 
  23. ↑ Program Studi Ilmu Keperawatan
  24. ↑ "Fakultas Teknologi Informasi". Diarsipkan dari versi asli tanggal 2016-08-25. Diakses tanggal 2016-08-19. 
  25. ↑ "Fakultas Keperawatan". Diarsipkan dari versi asli tanggal 2020-03-01. Diakses tanggal 2016-08-19. 
Diambiak dari "https://min.wikipedia.org/w/index.php?title=Universitas_Andalas&oldid=2499498"