Tulak bala

Tulak bala adolah tradisi nan dilakuan dek masyarakaik di Sumatera Barat, salah satunyo di Solok Selatan tapeknyo di Nagari Lubuk Gadang Timur. Tulak bala batujuan untuak mancampakkan bala nan adoh jo manolak bala nan katibo. Tradisi iko dilakuan pado hari Sinayan partamo sasudah tanggal 12 Rabiulawwal, yoitu sasudah maulid nabi Muhammad  SAW. Masyarakaik satampek picayo bahwa tradisi tulak bala tajadi karano dahulunyo adoh binatang ganas nan manyarang kampuang.

Rombongan masyarakaik sedang malakuan tradisi tulak bala di Nagari Lubuk Gadang Timur, Solok Selatan.

Sajarah

Masyarakaik Nagari Lubuk Gadang Timur mempacayoi bahwa zaman dahulu ado binatang ganas nan manyarang kampuang, nan datang dari arah timur, sahinggonnyo binatang itu lah marusak tanaman masyarakaik. Urang kampuang tagaduah dek ulah binatang itu, sahinggonyo niniak mamak, alim ulama jo tokoh masyarakaik maadoan acara tulak bala. Dari situlah asa mulo tulak bala nan dilakuan sampai kini ko.

Caro malakuan

Tulak bala dilakuan mulai pagi-pagi, dimulai dari Jorong Malus, disinan masyarakaik bakumpua untuak mamulai acara tulak bala, jo mambaok alat pangareh suaro, jo diiringi salawat, nan mambaco salawat adolah para ulama satampek jo diikuti dek saluruah masayarakaik nan ikuik dalam acara tulak bala. Tradisi tulak bala dilakuan jo bajalan kaki jo mambaok bungo. Bungo nan dibaok buliah bungo mawar, bungo melati, dan jenis bungo-bungo lainnyo. Bungo nan dibaok itu ndak harus bungo nan ditanam surang, bisa bungo nan dimintak di sepanjang jalan manuju ka sungai tampek manyampak an bala.

Sasudah dari Malus mako akan sampai di Kampung Tangah jo masyarakaik nan ikuik acara tulak bala baranti sajanak di tampek nan alah disepakati, sambia manunggu rombongan tulak bala nan adoh di Kampung Tangah. Rombongan tulak bala dari kampuang Tangah indak mambaok alat pangareh suaro, tapi cukuik bagabuang jo rombongan nan dari Malus tadi. Sasudah malapehan panek, mako sadonyo bagabuang dan samo-samo barangkek untuak manyampak an bala. Sasudah malewati Kampuang Tangah mako sampai lah di Tanjuang Harapan, samo jo di Kampuang Tangah tadi, masyrakaik sadang manunggu rombongan dari Malus jo Kampuang Tangah.

Sadonyo bagabuang dan malanjuik an perjalanan. Zikir dan Salawat taruih dikumandangkan. Indak jauah dari Tanjuang Harapan,sampai lah di Sungai Lingkitang. Sungai nan dituju barado di Sungai Lingkitang dan masyarakaik di sinan alah manunggu juo kedatangan rombongangan tadi. Satalah bagabuang barulah sadonyo manuju sungai. Sasampai di sungai saluruah lapisan masyarakaik baranti di sinan. Acara nan dilakuan adolah berzikir,katam Al-quran, badoa, azan nan mangadok ka arah tibonyo binatang ganas itu dulu, dan juo manyampaikan sajarah tentang tulak bala. Sasudah tu barulah bungo tadi dihanyuik kan ka aia sungai itu agar supayo bala nan adoh pai sarupo bungo nan hanyuik lamo-kalamoan manjauh. Salasai itu sadonyo rombongan tulak bala pulang ka rumah masiang-masiang dan tulak bala salasai dilakuan.