Tari perintang

Tari Perintang marupoan sabuah tari kreasi baru nan diangkek dari kesenian indang jo pancak nan barasa dari daerah Pariaman, pasisia barat Pulau Sumatera. Tari ko dilakuan dek pamuda-pamuda untuak kagembiraan atau perintang-rintang hari atau wakatu. Tari perintang ditarian sacaro basamo-samo atau saurang diri jo iringan bunyi-bunyian, saroman telempong, gandang, adok, jo ado juo diikuti jo pupuik batang padi. Gerakannyo bebas, dinamis jo irama 4/4 tanpa terikat pado bunyi-bunyian nan mangiringinyo. Satiok panari bebas berimprovisasi sesuai jo kamahiran masiang-masiang kacuali gerakan nan alah mampunyoi bantuak saroman maniruan gerakan tupai, alang terbang, kabau marabo, jo babagai tingkah laku manusia nan sadang bakarajo. Tarian iko biasonyo dilakukan di sawah pado musim panen atau dalam babagai keramaian. Jinih tari nan tamasuak ka dalam tarian iko adolah Tari Piriang, iyolah tari nan dimainkan sacaro tunggal atau basamo. Di talapak tangan ado piriang porselen sarato di ujuang jari tangah di pasang cincin. Cincin di jantikkan pado piriang sampai mambuek bunyi. Salanjuiknyo Tari Galuk, iyolah tari nan mamakai galuk (tempurung) di kaduo belah tangan. Katiko manari, kaduo galuak itu dilaga-lagakan sasuai jo irama. Benturan kaduo galuak itu mambuek irama surang nan mengasyikan penonton. Salanjuiknyo Tari Kabau Jalang, iyolah tarian nan mengimprovisasi kabau lia nan manggilo. Untuak maniruan tanduak kabau, pamain mangacungan kaduo tangannyo di ateh kapalo. Nafas panari mendengus-dengus saroman kabau jalang. Ado pulo tadapek panari kesurupan sabagai puncak tarian. Katiko itu kadang-kadang panari mandudu panonton. Kadang-kadang panonton pun ikuik aktif malakuan garakan tari itu. Kamudian panari berguling-guling saroman kabau di kubangan.