Tari buai buai

Tari Buai-Buai adolah tari tradisional Minangkabau nan barasa dari Nagari Pauh IX, Padang. Tari Buai-Buai ditampilan di acara-acara adat sarupo urak balabek, batagak panghulu jo acara penikahan masyarakat nagari Pauh. Tari iko diperkenalkan ka masyarakat di tahun 1970-an jo panari laki-laki, tapi di tahun 1980 sampai kini panarinyo banyak nan padusi supayo manjago kelestarian Tari Buai-Buai. Tari Buai-Buai mancaritoan tentang saurang amak nan bahusaho mananangan anaknyo nan sadang manangih. Sacaro harafiah, tarian iko malambangkan proses pambarian nasehat dari orang tuo ka anak anaknyo. Tari Buai-Buai pado upacara Panghulu ado kaitannyo jo proses panggantian regenerasi untuak maso nan akan tibo. Sifatnyo tajadi pambarian nasehat untuak anak ketek (anak nan di buai-buai). Salain itu, tari Buai-Buai manggunoan dama sabagai properti yang dilatakkan diateh kapalo. Dama tasabuik sajenis lampu yang tabuek dari boto, barisi minyak tanah dan diagiah sumbu kompor nan dipasangan pado tutuik boto tu kamudian diagiah api. Dama yang dijadian sabagai properti dalam tari Buai-Buai tu manjadian keunikan tasendiri tahadok tari tasabuik.

Tarian ko mancaritokan tentang baa proses saurang ibu nan nio maagiah nasehat kapado anaknyo nan ka baranjang gadang. Pado awalnyo Tari Buai-Buai ko barasa dari Pasisia Salatan, munculnyo tarian ko awalnyo diparagoan dek pangasuah anak rajo yang akhirnyo bakambang sampai di Kota Padang dek dibaok oleh seseorang yang sampai kini indak diketahui latar belakangnyo. sampai hari ko Tari Bua-buaipun hanyo ado di Pauah IX Kacamatan Kuranji sajo.

Tarian ko biasonyo ditampilan pado acaro upacara adat atau upacara batagak panghulu, upacara-upacara tasabuik batujuan untuak maagiahtau baa proses pagantian dari yang tuo ka yang mudo sabagai generasi untuak maso yang akan datang. Biasonyo, tarian ko dimainan bapasangan dengan durasi 5-10 menit yang diiringi oleh tapuak tangan, namun sairiang bajalannyo waktu tarian tu kini diiiriangan dek gandang, pupuik batang padi, talempong, dan saluang pauah. Diliek dari penyajiannyo tarian ko sangek sederhana, bantuak geraknyo barasal dari silek yang bakambang di daerah Pauah itu surang.

Tari Buai-Buai mampunyoi beberapo namo gerak kayak gerak tari langsuang manumbuak padi, gerak malunyah, gerak barabah pulang mandi, gerak barabah bagaluik, gerak mangirai, gerak malipek, gerak rantak kudo, gerak alang malayok, gerak maiisi parian, dan gerak mainjak. Namo-namo gerak tari tasabuik berkaitan dengan kegiatan petani yang sadang berado disawah. Isi dari tari Buai-Buai merupoan carito tentang kehidupan keluarga yang bekarajo disawah sabagai petani. Katiko ibu sadang batani disawah dan disaat anaknyo manangih mako sang ibu akan bausaho mandiamkan anaknyo dengan caro membuaikannyo atau meninabobokannyo, dan kamudian sang ayah akan menyanyikannyo dengan nyanyian tradisional Minangkabau yang disabuikk dengan dendang yang baisian akan nasehat untuak anak. Suasano yang tagambar pado tari Buai-Buai ko taliek tanang dan basemangaik.

Ciri khas pado tarian ko iolah dima para penari menggunoan “dama”, marupokan lampu tradisional yang tabuek dari kaco dan didalamnyo barisikan minyak tanah dan sumbu yang dibaka, digunoan diateh kapalo sahinggo saat manari panari harus bisa menjago kaseimbangan dalam manggarik agar yang diateh kapalonyo indak jatuah, biasanyo tari Buai-Buai ko dimainan dek pasilek dan dimainan pado malam hari.

Dicaliak dari perkembangan pemikiran dan caro pandang masyarakat yang samakin maju, hal iko badampak pado eksistensi Tari Buai-Buai tasabuik, dima akhir-akhir ko keberadaan Tari Buai-Buai sangaik memprihatinkan karano tarian ko alah mulai punah, kok dibiaan bisa sajo tarian ko hilang. Sampai kini hanyo Pauah IX Kecamatan Kuranjilah yang masih manarian tarian Tari Buai-Buai.