Taman Nasional Redwood

Taman Nasional Redwood adolah taman nasional nan talatak di Kota Humboldt, sapanjang pantai utara California. Taman ko panuah dek batang Redwood barono sirah nan tinggi sarato tamasuak batang paliang gadang di bumi. Di taman ko indak hanyo ado batang Redwood, tapi tadapek pulo baragam tumbuhan, hewan, jo padang rumpuik nan masih alami. Lueh taman nasional ko mancapai 133.000 hektar.

Taman Nasional Redwood
Taman Nasional Redwood
Dakek dari	Crescent City
koordinat	41.3°N 124°W / 41.3; -124
Wilayah	133.000 hektar
Ditetapkan pado	2 November 1968
Pangunjuang	482,536 (in 2018)
Pangalola kawasan	National Park Service
Situs web resmi

Sijarah

Salamo ribuan taun, panduduak usali wilayah Pantai Utara California manjadian kayu sirah sarato ekosistem lainnyo sabagai rumahnyo. Urang-urang ko biasonyo dikana jo namo Indian Amerika nan sampai kini katurunannyo tingga di wilayah redwood. Urang Indian Amerika ko punyo kayakinan mandalam tantang pangatahuan dunia alami, bahaso, jo adaik istiadaik, sahinggo manjadi ciri khas surang diantaro suku-suku lain nan ado di dunia ko. Sumber makanan panduduak usali Pantai Utara ko barupo rusa, ikan lauik, kacang-kacangan, beri-berian sarato biji-bijian. Untuak caro batahan iduiknyo jo mamanciang, baburu jo mangumpuan bahan-bahan makanan nan bamanfaaik. Rumah-rumah tradisional urang Indian Amerika ko dibuek dari papan nan dipisahan dari kayu sirah nan alah tumbang. Rumah tu diyakini dek panduduak usali ko sabagai mukaluak iduik, sahinggo kayu sirah nan manjadi papannyo tu dianggok sabagai mukaluak roh. Mukaluak roh ko diyakini pulo sabagai ras ilahi nan ado sabalun manusia di wilayah redwood ko ado jo nan maajaan caro untuak tingga disiko.

Katiko ameh ditamuan di sapanjang batang Trinity California pado taun 1850, banyak urang lua nan pindah kasitu sahinggo mambuek panduduak usali tagaduah. Urang nan baru tu mandorong urang Indian Amerika kalua dari wilayahnyo, mamburunyo, maino, sarato mampabudaknyo, sahinggo tajadi palawanan dari panduduak usali nan barakhia pambantaian. Ribuan urang mancari kahidupan baru di wilayah tapalosok Redwood ko, salain itu pandatang baru ko mambutuahan bahan baku untuak rumahnyo. Tajadi panabangan komersial nan dilanjuikan jo ekspansi Amerika disitu. Kayu-kayu sirah dari batang Redwood dibabek untuak kapantiangan komersil. Panipuan lahan marak tajadi manyebabak ribuan hektar tanah hilang sarato kayu sirah nan dibabek ditransfer ka industri swasta.

Pada taun 1960-an, penabangan hutan alah maabiahan ampia 90 persen dari sadolah kayu sirah usali. Baru pado tanggal 2 Oktober taun 1968 Taman Nasional Redwood didirian untuak mangamanan batang Redwoon nan tasiso nan ditandotangani dek Presiden Lyndon B. Johnson. Cagar alam nan baru ko tadiri dari 58.000 hektar lahan nan dilindungi. Pada tahun 1978, Presiden Jimmy Carter manambahan labiah banyak tanah nan tamasuak bagian Taman Nasional Redwood sakitar 39.000 hektar lahan, walaupun mandapek tantangan dari industri kayu. Barulah pado taun 1994, California Department of Parks (CDPR) jo National Park Service (NPS) sapakaik untuak mangalola ampek taman palinduangan sumber daya hutan ko. Kaampek taman tu iolah Taman Negara Bagian Redwood Jedediah Smith, Taman Negara Bagian Del Norte Coast, Taman Negara Bagian Redwoods Prairie Creek, jo Taman Negara Bagian Redwood. Taman Nasional Redwood manjadi situs warisan budayo jo marupoan bagian dari Cagar Biosfer Pasisia California.

Sampai kini ko, komunitas urang Indian Amerika di barat lauik Caifornia sampai kini masih batahan, komunitasnyo yaitu Tolowa, Yurok, Hupa, jo Karuk. Kini wilayah nenek monan Yurok jo Tolowa maliputi tanah jo sumber daya nan takandang dalam Taman Nasional Redwood. Wilayah Yurok baoperasi di muaro Batang Klamath, 40 mil ka hulu, sarato wilayah Tolowa di Del Norte County. Sajumlah aspek budayo India barat lauik California mulai bagabuang. Bahaso panduduak usali pun kini masih iduik jo dipatuturan dek urang tuo sarato dipalajari dek generasi nan labiah mudo.

Tumbuhan

Sequoiadendron giganteum

Dawn Redwood

Dawn Redwood atau namo latinnyo Metasequoia glyptostroboides ko marupoan jinih pohon nan ado di Taman Nasional Redwood. Tumbuahan ko dipakiroan alah punah salamo jutaan taun nan lalu, tapi ditamuan baliak pado tahun 1944 dek saurang rimbawan di wilayah Sichuan-Hubei di Cino. Dawn Redwood mudah dibedaan dari tumbuhan sajinihnyo di California liwaik ukurannyo nan labiah ketek jo dari daunyo nan gugua. Salain tadapek di taman nasional, tumbuahan ko biasonyo dijadian tanaman hias.

Giant Sequoia

Giant Sequoia nan banamo latin Sequoiadendron giganteum marupoan tumbuahan nan pakambangannyo capek jo barumua panjang (sakitar labiah dari 3.000 taun), indak ado pohon nan labiah masif daripado Sequoia raksasa. Di Taman Nasional Sequoia tadapek pohon Sequoia nan paliang masif di bumi, dipakiroan total volumenyo labiah dari 50.000 kaki kubik. Giant Sequoia tatuo nan pernah iduik sampai baumua 3.200-3266 taun lamonyo.

Coast Redwood

Coast Redwood atau nan banamo latin Sequoia sempervirens marupoan jinih pohon nan ado di Taman Nasional Redwood. Tinggi pohon ko bisa mancapai 380 kaki jo leba batang 9 meter. Coast Redwood ko dapek iduik 1.200 hinggo 2.000 taun lamonyo.

Binatang

Sturnella neglecta

Taman Nasional Redwood punyo karagaman ekologi nan diakui dek sadolah dunia, sarupo banyak tadapek jinih binatang nan baragam di taman ko. Taman jo sumber daya nan ado di taman tu alah ditetapan pulo sabagai Situs Warisan Dunia. JInih binatang nan ado di taman ko barupo singa laut California, anemon laut hijau raksasa, elang botak, rusa Roosevelt, dan tentu saja, siput pisang.

Di taman ko tadapek pulo jinih buruang nan baragam. Manuruik catatan Taman Nasional Redwood, tadapek 280 spesies buruang di taman ko, sapatigo dari 800 spesies buruang nan ado di Amerika Serikat. Jinih buruang nan ado di taman ko barupo marbled murrelet (Brachyramphus marmoratus), western meadowlark (Sturnella neglecta), American dipper (Cinclus mexicanus), belted kingfisher (Meaceryle alcyon), California brown pelicans (Pelicanus occidentalis), western snowy plovers (Charadrius nivosus), aspian terns (Hydroprogne caspia) jo pigeon guillemots (Cepphus columba).

Salain jinih-jinih buruang, tadapek pulo jinih ikan nan iduik di sungai taman ko. Tadapek duo sungai gadang, tigo anak sungai, jo sajumlah kolam. Di sungai tu iduik ikan usalinyo sarupo salmon jo ikan trout mudo.

Jinih karagaman ekologi nan lain di taman ko adolah tadapeknyo spesies mamalia darek jo lauik. Taman Nasional Redwood ko marupoan rumah baragam jinih mamalia darek. Tadapek 66 spesies mamalia darek jo 13 spesies kalalawa sarupo Virginia oppossum (Didelphis virginiana), Marsh shrew (Sorex bendirii), American shrew-mole (Neurotrichus gibbsii), Big brown bat (Eptesicus fuscus), Chipmunk (Tamias sp.) jo lain sabagainyo. Untuak mamalia lauiknyo, tadiri dari spesies Harbor Seal (Phoca vitulina), Paus abu-abu (Eschrichtius robustus), Paus bungkuk (Megaptera novaeangliae), Harbor Porpoise (Phocoena phocoena) jo lain sabagainyo.

Galeri

• 
  Jamur madu di Taman Naional Redwood
• 
  Taman Nasional Redwood katiko musim dingin
• 
  Daun semanggi di Taman Nasional Redwood
• 
  Pantai tasambunyi di Taman Nasional Redwood

Rujuakan

Catatan Kaki

Daftar Pustaka

• Puspasari (2012). "Ada Pohon Raksasa di Taman Nasional Ini". detik.com. Diakses tanggal 22 Desember 2019. 
• "Area History". National Park Service. 2016. Diakses tanggal 22 Desember 2019. 
• "Redwood Visitor Guide" (PDF). Redwood National and State Park. 2019. Diakses tanggal 24 Desember 2019. 
• "Coast Redwood". Save the Redwoods League. Diakses tanggal 24 Desember 2019. 
• "Animals". National Park Service. 2019. Diakses tanggal 25 Desember 2019. 
• "Birds". National Park Service. 2019. Diakses tanggal 25 Desember 2019.