Surau Jambatan Basi

Surau Jambatan Basi (panamoan dalam bahaso Indonesia: Surau Jembatan Besi) adolah surau nan didirian dek Syekh Abdullah Ahmad pado taun 1895, nan talotak di lembah kota Padangpanjang sabalah Barat, manuju arah jalan pamandian Lubuak Mato Kuciang. Panamoan surau ko terinspirasi dari sabauh jambatan basi nan baru sajo dibangun dek pamarentahan Balando. Surau Jembatan Besi acok juo disabuik jo singkatan SBJ. Pamiliahan lokasi ko batujuan untuak mamudahan anggota jamaah untuak maambiak wudhu jo basuci, dan juo lataknyo nan indak jauah dari pasa, sampai SBJ rami juo dikunjuangi dek panggaleh pasa. SBJ juo dijadikan tampek maadoan wirid pengajian satiok malam Jum’at, sabalun hari pasar di Padangpanjang yaitu ari Jum’at.

Masjid Zu'ama Jambatan Basi

Pado taun 1905 Syekh Abdullah Ahmad digantikan dek sobaiknyo Daud Rasyidi dek inyo pindah ka kota Padang. Syekh Daud barasa dari Nagari Balingka, sakitar 13 km sabalah selatan Bukittinggi. Pado kapemimpinan Syekh Daud di SBJ, inyo maagiah pelajaran kitab-kitab pado murik-muriknyo nan wakatu itu alah mulai banyak nan datang dari sakitar Padangpanjang.

Pado taun 1907, Syekh Daud ka pai ka Mekah, inyo manyarahan kapamimpinan SBJ ka adiaknyo Syekh Lathif Rasyidi. Indak lamo Syekh Latif mamimpin SBJ, inyo maningga pado taun 1909. Kapamimpinan SBJ kudian dibaliakan pado Syekh Daud dan kudian disarahkan pado Syekh Abdul Karim Amrullah, nan labiah akrab diimbau jo namo H. Rasul.

Dibawah kapamimpinan H. Rasul surau itu samakin maju, baiak dari mutu pandidikannyo maupun dari jumlah muriknyo. Muriknyo indak anyo barasa dari Sumatera Barat tapi juo lua Sumatera Barat saroman nan barasa dari Aceh, Tapanuli jo Malaysia. Pado maso kapamimpinan H. Rasul, SBJ samakin tanamo dan marupoan sumber inspirasi tabantuaknyo Sumatera Thawalib nan kudian manjadi PERMI.