Soenting Melajoe

Sunting Melayu (ejaan asal: Soenting Melajoe) adolah surek kaba perempuan di Hindia Belanda nan parnah tabik di Padang. Isinyo tadiri dari tajuk rencana, sajak-sajak, tulisan-tulisan manganai perempuan, dan riwayaik tokoh-tokoh tanamo. Pimpinan redaksi, redaktur, jo panulihnyo dipacik dek perempuan, walaupun panabikannyo dikelola dek Datuk Sutan Maharaja.

Sunting Melayu tabik patamo kali pado tanggal 12 Juli 1912 dan baranti tabik pado 28 Januari 1921. Dalam ampek halaman satiok edisinyo, Sunting Melayu marekam diskusi jo perdebatan perempuan Hindia Belando tantang pandidikan, kesehatan, agamo, jo budayo.

Sijarah

Roehana Kudus dan Zoebeidah Ratna Djoewita adolah redaktur awal Sunting Melayu. Tagaknyo majalah iko bamulo dari hasrat Roehana untuak mambuek surek kaba nan khusus manampuang aspirasi perempuan. Roehana nan barasa dari Koto Gadang manyampaikan kainginannyo ka Datuak Sutan Maharaja, pandiri surek kaba Oetoesan Melajoe di Padang. Datuk Sutan Maharaja manyanggupi untuak mambantu pacetakan majalah khusus nan ka ditabikan. Namun, maingek Roehana indak bisa pindah ka Padang karano inyo maaja di Kerajinan Amai Setia, Roehana mausulkan supayo inyo cukuik mangiriman tulisan-tulisan dari Koto Gadang. Manyatujui usulan Roehana, Sutan Maharaja manunjuak putrinyo surang, Ratna Djoewita untuak maurus redaksi surek kaba di Padang.

Dalam pajalanannyo, Sunting Melayu maangkek kontributor mereka sabagai rekdatur, di antaronyo Sitti Noermah binti S.M Kajo nan diangkek sabagai redaktur di Padang pado tahun 1917, Amna binti Abdul Karim sabagai redaktur di Bengkulu pado tahun 1917, dan Sitti Djatiah Pasar Djohar sabagai redaktur di Kayu Tanam pada tahun 1919.

Penerbitan

Sunting Melayu tabik sakali seminggu, lebiah acok dari Oetoesan Melajoe nan tabik sakali dalam tigo minggu. Panabikannyo ditangani dek panabik punyo Datuk Sutan Maharaja yoitu pacetakan Snelpersdrukkerij, Orang Alam Minang Kabau.

Pado mulonyo, surek kaba iko tabik satiok Sabtu. Mamasuaki tahun kaduo, tapeknyo edisi ka-2 pado tanggal 8 Januari 1913, Sunting Melayu tabik satiok Kamis. Sajak edisi ka-18, Sunting Melayu tabik satiok Jumat. Satahun kamudian, Sunting Melayu tabik baliak satiok Kamis dan iko balansuang hinggo akhia panabikan. Indak ado panjelasan dari redaksi takait parubahan-parubahan wakatu tabik media ko.

Patamo kali tabik, harago langganan Sunting Melayu adolah f.1,80 satahun atau 0,45 sen per tigo bulan. Harago iko balaku hanyo untuak palanggan di Hindia Belanda, sadangkan untuak palanggan di lua Hindia Belanda adolah f.2,50 satahun. Sairiang jo malonjaknyo harago produksi, mako sajak tahun 1914 harago langganan untuak wilayah Hindia Belanda nan samulo diituang per tahun diubah manjadi per bulan yakni f.0,25. Adopun harago langganan untuak lua Hindia Belanda nan samulo f.2.50 satahun manjadi 4.80 satahun.

Sajumlah parusahaan mandukuang biaya panabikan surek kaba iko jo mamasang iklan. Sunting Melayu mamuek iklan jo harago pasang 5 sen per kato dan sakali muek minimal f.1. Iklan-iklan nan dimuek dalam Sunting Melayu kabanyakan parusahaan kain, antaro lain babarapo pangusaho batiak dari Yogyakarta, saparti Moekari dan Mochamad Hadjad, sarato pangusaho-pangusaho lokal. Tampek pamuatan iklan di lembaran katigo dan ampek. Pado lembaran katigo, ruang iklan acok bagabuang jo berita atau artikel.

Panarimoan

Paputaran Sunting Melayu manjangkau hinggo kalua wilayah Minangkabau baik di dalam maupun lua wilayah Hindia Belanda. Luehnyo sirkulasi media iko satidaknyo tacamin dari daerah asa panulih dalam Sunting Melayu nan barasa dari babagai daerah di Sumatra. Bahkan, ado pambaco dari Johor jo Mesir nan sacara bakala mangiriman tulisan untuak Sunting Melayu.

Manuruik panaliti dari UIN Imam Bonjol Danil Mahmud Chaniago, Sunting Melayu bausaho mamatahan anggapan bahwa perempuan hanyo bakutat pado urusan domestik sajo. Surek kaba iko mandorong perempuan Minangkabau talibek dalam urusan-urusan sosial kamasyarakatan.