Sitti Nurbaya atau Sitti Nurbaya: Kasih Tak Sampai adolah roman nan ditulih dek Marah Rusli nan kudian ditabikkan dek Balai Pustaka pado taun 1922. Roman Sitti Nurbaya adolah roman kaduo nan tabik salapeh roman Azab dan Sengsara, nan manandoan awal pakambangan sastra moderen Indonesia. Marah Rusli tarinspirasi dari pangalaman iduiknyo surang sarato mamasuakan pangaruah budayo Minangkabau jo budayo Eropa nan sangkek tu Indonesia tangah dijajah dek Kolonial Balando.[1]

Sitti Nurbaya
Pangarang Marah Rusli
Judul asali Sitti Nurbaya: Kasih Tak Sampai
Nagara Indonesia
Bahaso Bahaso Malayu
Genre Novel
Panabik Balai Pustaka
Tanggal tabik 1922
Jinih media Cetak (kulik kareh & lunak)
Jumlah laman 291 (cetakan ka-45)
ISBN 9789794071670 (cetakan ke-45)
Nomor OCLC 436312085

TokohSuntiang

  • Sitti Nurbaya iolah tokoh protagonis utamo nan rancak lai babudi baso. Sitti nio manjadi istri Datuk Maringgih dek manolong abaknyo nan barutang ka Datuak Maringgih, walaupun sabananyo mancintoi Samsul.
  • Samsul Bahri iolah tokoh protagonis utamo nan coga. Samsul mancintoi Sitti sapanuah hati.
  • Datuak Maringgih iolah tokoh utamo antagonis. Saurang datuak nan sipaiknyo pandangki jo cangok. Walaupun datuak indak disukoi dek urang, datuk mambela masyarakaik jo malawan panjajah Balando.
  • Sulaiman iolah tokoh pambantu, abaknyo Sitti Nurbaya nan dihoromati dek urang, karano kasantunannyo.
  • Sutan Mahmud iolah tokoh pambantu, abaknyo Samsul Bahri. Sutan Mahmud iolah saurang pangulu nan dihoromati sarato disanjuang dek kaumnyo.

SinopsisSuntiang

Nurbaya jo Samsul alah saliang tau sadari ketek, dek urang tuo kaduonyo adolah konco palangkin. Sangkek ka gadang, Nurbaya jo Samsul saliang mancintoi, itu diungkapkan wakatu Samsul pai ka Batavia untuak malanjuikan studinyo.

Sulaiman nan sadang naiak usahonyo dibuek bangkrut dek Datuak Maringgih nan pandangki jo takuik tasaingi kakayoannyo. Sulaiman pun nan alah bangkrut akhianyo tapaso barutang ka Datuak Maringgih. Namun, Sulaiman indak talok mambayia. Lalu Datuak mamintak supayo Sitti manjadi istri mudonyo untuak manabuih utang abaknyo. Sitti pun tapaso manjadi istri mudonyo.

Sitti mangirim surek ka Samsul untuak maagiah tahu baso kaduonyo indak bisa basamo lai. Samsul pun pulang kampuang wakatu sikolah perai. Kaduonyo pun basobok, lalu tampak sadang bacumbu kasiah dek Datuak Maringgih. Datuak pun berang dek istrinyo bacumbu jo laki-laki lain. Akhianyo Samsu diaduan ka Abak Samsul. Abak Samsul nan malu mausia Samsul dari rumah inggo indak dianggap manjadi anaknyo lai. Amak Samsul nan indak tarimo anaknyo diusia, akhirnyo jatuah sakik.

Lamo-kalamoan Sitti muak jo parangai datuak nan kasa. Sitti pun lari dari rumahnyo untuak manuruikan Samsul di Batavia, salapeh Sulaiman maningga dek tajarambok dari janjang. Datuak nan mangataui Sitti pai, manuduah Sitti mambaok lari haratonyo ka Batavia. Sitti tapaso baliak ka Padang untuak manyalasaian masalah.

Sasudah Sitti baliak ka Padang, Datuk tega baniaik buruak ka Sitti jo maracuninyo. Itu dilakuan dek datuak sakik hati jo Sitti. Sitti pun maningga basamoan jo Amak Samsul nan maningga juo dek sakik.

Samsul mandarito sabab kaduo padusi nan dicintainyo, yaitu Sitti jo amaknyo alah maningga. Inyo pun mancubo mambunuah diri jo pistol, tapi tatap iduik. Kudian Samsul manjadi prajurit kolonial jo mangganti namonyo jo Mas –kabalikan dari Sam- tujuannyo supayo inyo bisa tabunuah di medan parang. Namun inyo salamaik taruih inggo manjadi prajurit nan dibanggakan. Samsul pun diangkek manjadi letnan.

Suatu hari, Samsul ditugaskan ka Padang untuak manumpas palawanan nan dipimpin Datuak Maringgih. Palawanan itu untuak mamprotes pamarintah Balando nan manaiakan pajak rakyaik. Dalam paparangan Samsul basuo Datuak. Inyo pun balago jo Datuak. Akhianyo Datuak mati jo Samsul taluko dek sanjato datuak.

Usai parang, Samsul basuo jo abaknyo untuak mamintak maaf ateh kasalahannyo. Abaknyo pun mamaafkan jo manyasa. Lalu Samsul pun maningga. Kudian manyusua pulo abaknyo maningga.[2]

AdaptasiSuntiang

 
Jambatan Sitti Nurbaya, Padang, Sumatera Barat

Roman Sitti Nurbaya tanamo dek masyarakaik Indonesia. Kudian babarapo stasiun televisi maadaptasi roman iko manjadi sinetron, yaitu pado taun 1991 jo 2004. Pamarintah Kota Padang manjadian namo Sitti Nurbaya sabagai namo jambatan dek Marah Rusli maambiak babarapo tampek di Padang sabagai latar carito.[3]

Rancananyo roman Sitti Nurbaya ka diadaptasi baliak manjadi film jo manjadian Padang sabagai lokasi syuting. Pamarintah Kota Padang rancananyo ka mambuek Kampuang Sitti Nurbaya di Gunuang Padang nan disitu ado rumah Sitti Nurbaya, rumah Datuak Maringgih, rumah Samsul Bahri, jo fasilitas lainnyo. Kok paralu ka dibuek bagai Museum Sitti Nurbaya.[4]

RujuakanSuntiang

  1. Negara, Fadjrin Kurnia@Kementerian Badan Usaha Milik. "Kementerian BUMN". http://bumn.go.id/ (dalam bahasa Inggris). Diakses tanggal 2019-11-05.  Hapus pranala luar di parameter |website= (bantuan)
  2. Rusli, M. (Marah), 1898-1968. (1992). Sitti Nurbaya : kasih tak sampai (edisi ke-Cet. 21). Jakarta: Balai Pustaka. ISBN 9794071676. OCLC 30848999. https://www.worldcat.org/oclc/30848999. 
  3. Kaya, Indonesia. "Sang Surya Tenggelam di Jembatan Siti Nurbaya - Situs Budaya Indonesia". IndonesiaKaya (dalam bahasa Indonesia). Diakses tanggal 2019-11-13. 
  4. antaranews.com (2019-07-02). "Padang jadi lokasi syuting film "Sitti Nurbaya"". Antara News. Diakses tanggal 2019-11-13.