Sipak Tekong

Sipak Tekong adolah pamainan tradisional di Minangkabau, Sumatera Barat. Pamainan sipak tekong ko biasonyo dimainan dek anak-anak pado sore hari. Biasonyo anak-anak ko bamain sipak tekong dihalaman rumah.Sakileh sipak tekong jo "petak umpet" bantuak pamainannyo samo. Pado pamainan petak umpet, yang manjago harus manutuik mato maadok ka dinding sambia basorak "alah" jo "alun" sadang kawannyo mandok. Kalau sipak tekong , salah seorang manyipak tekong, beko yang manjago mangaja tekong tu, samantaro kawannyo mandok. Yang manjago harus maambiak tekong dan malatakannyo ditangah-tangah lingkaran yang alah dibuek ditanah. Kalau ado yang nampak berarti inyo yang manjago salanjuiknyo. Dalam pamainan ko untuak manantuan kalah jo menang yaitu katiko yang acok manjago berarti kalah sadangkan yang indak pernah manjago adolah pamenangnyo.

Alaik

Pamainan ko manggunoan alaik barupo tekong. Tekong adolah kaleng susu yang biasonyo dipakai untuak mangukua bareh di . Tekong yang biasonyo dipakai barupo tekong yang alah bakeh. Bekonyo didalam tekong tu diisi jo batu-batu ketek supayo, tekong tu babunyi wakatu disipak. Kalau indak ado tekong, anak-anak biasonyo manuka jo alaik-alaik lain yang bisa disipak dan mangaluaan bunyi katiko disipak.

Pamain

Biasonyo pamainan sipak tekong ko dimainkan sacaro basamo-samo. Pamainan ko dimainan dek anak laki-laki jo anak padusi sacaro barami-rami.

Caro main

Sabalum pamainan dimulai, yang partamo di karajoan adolah mambuek lingkaran di tanah. Siap tu para pamain manantuan tampek jo bateh-bateh untuak mandok. Salanjuiknyo pamain ba suit, untuak manantuan sia yang ka manjago. Lalu pamain malatak an kaleng ditangah-tangah lingkaran. Salah satu pamain yang ka mandok harus manyipak kaleng sajauah mungkin. Katiko kaleng disipak, yang manjago mangaja dan ma ambiak dan dilatak an baliak ka dalam lingkaran. Basamoan jo yang manjago mangaja kaleng, pamain lain lari untuak mandok. Panjago indak buliah maliaek ka balakang katiko maambiak kaleng. Panjago harus malatak an kaleng di dalam lingkaran dan harus mancari pamain yang mandok. katiko mancari pamain yang manjago harus mamparatian tekong supayo indak disipak dek pamain yang kalua dari tampek mandok. Panjago indak buliah mambaok kaleng katiko mancari pamain yang mandok. Kalau nampkak atau basuo pamain yang sadang mandok, panjago lari baliak ka tekong. Panjago akan basorak manyabuik namo pamain lalu manyabuik sipak tekong sambia malongkah an kaleng, kayak tu sataruihnyo kalau basuo pamain. Pamain yang partamo disabuik an atau disubok an akan manjadi calon panjago salanjuiknyo , kalau indak ado yang manyalamaik an. Pamain lain yang alun basuo dapek manyalamaik an pamaian lain dengan caro manyipak tekong labiah dulu dari yang manjago. Kalau berhasil manyipak duluan, pamain yang alah basuo atau alun bisa mandok baliak. Apobilo indak ado yang manyalamaik an, sasudah sadolah pamain basuo, parmainan diulang baliak dan yang manjago adolah pamain yang partamo basuo dek panjago sabalumnyo.