Singgang ayam

Singgang ayam marupokan salah satu kuliner khas dari Sumatera Barat. Walau indak satanamo randang, namun singgang ayam punyo keunikan dan cita raso nan indak kalah nikmatnyo. Saroman umumnyo kuliner Sumatera Barat, singgang ayam punyo cito raso padeh dan kayo akan bumbu rempah.

Dalam proses mambueknyo, singgang ayam harus malalui 2 kali proses. nan patamo adolah proses parabuihan bumbu. Proses iko batujuan supayo singgang ayam punyo cito raso nan masuak hinggo ka dalam dagiang. Dalam proses iko, sadoalah bumbu bantuak santan, daun salam, daun limau, daun kunyik, garam, dll dimasuakan basamo jo potongan ayam. Bahan-bahan itu dirabuih basamoan hinggo bumbu mangental dan mangariang. Untuak proses nan kaduo adolah proses pamanggangan. Disiko ayam nan alah dirabuih samo bumbu-bumbunyo akan dibaka atau dipanggang di ateh baro api. Proses iko batujuan supayo aroma bumbu kalua dan manyatu manjadi kasaatuan raso nan nikmat.

Bahan-bahan nan digunokan untuak mambuek singgang ayam antaro lain, 800 ml santan, 2 lembar daun salam dan limau, 1 lembar daun kunyik, 2 buah asam kandih, 1 sdt garam, 5 buah bawang sirah dan putiah, 5 buah kemiri, 2 cm potongan langkueh, 2 cm potongan jahe, 1 ikua ayam nan dipotong-potong.

Untuk mambueknyo, partamo masuakan kasado bahan-bahan kacuali potongan ayam ka dalam pariuak jo api sadang sambia diaduak-aduak hinggo agak mangental. Lalu masuakan ayam, masak hinggo bumbu mangental dan maresap. Jiko alah mangental, angkek lalu sisihkan. Sasudah itu, baka ayam di ateh panggangan sampai bumbu maresap sambia dioles-oles jo siso bumbu nan ado. Angkek lalu hidangankan.

Sadangkan untuak proses panyajiannyo agak rumik dibandiangkan randang. Karano pado zaman dahulu di Sumatera Barat, singgang ayam hanyo disajikan jiko ado pesta atau acara gadang. Ikolah kanapo singgang ayam teraso istimewa. Zaman dulu urang Sumatera Barat biaso mamotong unggeh atau paliharoannyo jiko ado acaro gadang atau pesta. Namun kini, singgang ayam indak hanyo disajikan katiko ado acaro gadang atau pesta. Singgang ayam biaso disajikan untuak lauk makan dan dipajua balikan.

Rujuakan

Eka Rosalina, Afridian Wirahadi Ahmad dan Anda Dwi Haryadi. "Strategi Pengembangan Makanan Unggulan Minangkabau Berdaya Saing Global". 

Indah Ariyani, Nur. "STRATEGI ADAPTASI ORANG MINANG TERHADAP BAHASA, MAKANAN, DAN NORMA MASYARAKAT JAWA".