Salam sambah
Salam sambah adolah gestur urang Minang dalam maagiah panghormatan ka urang atau tamu tapandang tanpa kontak fisik. Salam iko umumnyo dilakuan pado wakatu kagiatan nan dihadiri banyak urang, sahinggo indak mamungkinan untuak saling bajabaik tangan. Caronyo yakni mampatamoan kaduo balah tapak tangan dengan jari-jari diarahan ka ateh dan didakekan ka dado. Salam sambah kadang diikuiti jo sikap maanguakan kapalo.[1]
Dalam sastra lisan Minangkabau takah kaba, salam sambah dijalehan dengan caro disusun jari nan sapuluah, ditakuakkan kapalo nan satu atau versi lainnyo ditambahan jo dihunjamkan lutuik nan duo.[2]
Salam sambah sarupo jo salam namaste nan dikenal di banyak tampek di dunia. Wakatu pandemi COVID-19, salam sambah dijadian alternatif caro maagih salam manggantian bajabaik tangan.[3]
Asa mulo
suntiang
Gestur salam sambah marupoan turunan dari sambah (bahaso Indonesia: sembah) nan lazim basobok di Indonesia. Sambah marujuak ka posisi tangan dalam ritual pamujaan dewa-dewa. Gestur iko sarupo jo sampeah di Kamboja jo wai di Thailand. Sado macam gestur nan sarupo sambah asanyo dari namaste di India nan marupoan pusek paradaban Hindu-Buddha. Namaste itu surang dipicoyo barasa dari Añjali Mudra. Walaupun baitu, garakan Añjali Mudra dipakiroan alah dilakukan sakitar 4.000 tahun nan lalu. Hal itu diketahui dari sabuah segel tanah liek paninggalan Paradaban Lambah Indus.[4]
Di Indonesia, paradaban Hindu-Buddha alah mulai menyebarkan pangaruahnyo pado awal abaik patamo. Pado awal abaik ka-4, pamarintahan Hindu alah managakan kakuasaan mereka di Jawa, Sumatra, jo Kalimantan. Pado abaik ka-6 sampai ka-9, pangaruah paradaban Hindu-Buddha kian kuek, sairing jayanyo Karajaan Sriwijaya jo Medang Mataram. Gambar sambah atau Añjali Mudra muncul dalam relief randah candi-candi saisuak di Jawa, takah Candi Borobudur jo Prambanan nan marupoan paninggalan abaik ke-9.[5]
Dalam bahaso Indonesia, kato sambah (nan ditulih sembah) diaratian sabagai parnyataan hormat jo khidmat nan dinyatoan dengan caro manangkuikan kaduo balah tangan lalu maangkeknyo hinggo ka bawah dagu.[6] Sambah sinonim jo kato suhun dalam bahaso Jawa, yakni posisi tangan dalam pamujaan. Manuruik Hamka dalam bukunyo Dari Perbendaharaan Lama, kato suhun ikolah nan diturunan manjadi susuhunan, nan aratinyo urang nan diagih suhun atau urang nan disambah. Mangko dek itu, susuhunan basinonim jo sasambahan. Namun baitu, bunyi kato sambah labiah tadanga mirip jo kato sampeah dari Kamboja dibandiangan kato suhun dari Jawa. Kamiripan iko manunjuakan adonyo kaitan sambah jo sampeah.[7]
Pamakaian
suntiangMeskipun asa mulo salam sambah bakaitan jo sambah nan digunoan untuk pamujaan dewa-dewa, salam sambah di Minangkabau hanyo digunoan sabagai bantuak panghormatan sajo. Panghormatan iko diagiah ka urang atau tamu nan dihormati atau dianggap tapandang, baik dalam patamuan takah rapek atau pamentasan kesenian tradisional Minangkabau. Pado tari pasambahan, salam sambah manjadi pambukak jo panutuik tarian.[1]
Pado maso kini, gestur sarupo salam sambah lazim dijadian sabagai salam panyambutan salamaik datang.[8] Kudian, sangkek pandemi COVID-19, Gubernur Sumatera Barat Irwan Prayitno maimbau masyarakaik manggunoan salam sambah katiko maagih salam manggantian bajabaik tangan. Hal iko dilakukan sabagai bantuak usaho maindari panularan virus akibaik kontak fisik.[3]
Caliak pulo
suntiangRujuakan
suntiang- ↑ a b Edwar Djamaris. 2002. Pengantar Sastra Rakyat Minangkabau. Jakarta: Yayasan Obor. Indonesia. hlm. 43-44.
- ↑ Rasyid Manggis (2015). Kaba Malin Deman. Bukittinggi: Kristal Multimedia.
- ↑ a b "Kenormalan Baru, Gubernur Sumbar Wajibkan Warga Pakai Masker hingga Salam Sambah". Langgam.id. 8 Juni 2020. Diakses tanggal 15 Juni 2020.
- ↑ Chad Greenwood. "Economics of the Indus Valley Civilization" (dalam bahasa Inggirih). Diarsipkan dari versi asli tanggal 26 Desember 2007. Diakses tanggal 14 Juni 2020.
- ↑ Seni. 7-8. Yogyakarta: Institut Seni Indonesia Yogyakarta. 24 Oktober 1999. pp. 127. https://books.google.co.id/books?id=YFxlAAAAMAAJ&dq=%22sembah%22+relief+candi&focus=searchwithinvolume&q=sembah. Diakses pado 14 Juni 2024.
- ↑ "Sembahyang" (dalam bahasa Indonesia). Kamus Besar Bahasa Indonesia (KBBI). Diakses tanggal 14 Juni 2020.
- ↑ Hamka (1982). Dari Perbendaharaan Lama. Cet. II. Jakarta: Pustaka Panjimas. hlm. 244.
- ↑ "The concept of Indonesian hospitality is applied into several icons to delight the five senses" (dalam bahasa Inggirih). Garuda Indonesia. Diakses tanggal 14 Juni 2020.