SMA Negeri 4 Padang

SMA Negeri 4 Padang adolah sikolah manangah ateh negeri nan talatak di Kelurahan Lubuk Begalung Nan XX, Kecamatan Lubuk Begalung, Kota Padang. Sikolah iko baalamaik di Jalan Linggarjati Nomor 1, nan marupokan ujuang dari Jalan Dalam Gaduang nan dimulai dari Simpang Tugu Lubuk Begalung. Basamo SMA Negeri 1 Padang, SMA Negeri 2 Padang, SMA Negeri 3 Padang, SMA Negeri 7 Padang, SMA Negeri 10 Padang, SMA Semen Padang, dan SMA Don Bosco Padang, sikolah iko dicanangkan sabagai sikolah pacontohan (piloting) nan manggunokan Kurikulum 2013 untuak Kota Padang.

Sajak limo tahun tarakhia iko, sikolah iko mangalami paningkaikan prestasi. Pado tahun ajaran 2013/2014, SMA Negeri 4 Padang bahasil maraih paringkek ka-2 nilai akhia ujian nasional tingkek SMA sa-Sumatra Barat. Salamo tigo tahun baturuik-turuik (2011-2013), SMA Negeri 4 Padang mangirimkan siswanyo sabagai Paskibraka tingkek nasional. Pado tahun 2015, sikolah iko maluluihkan 175 siswa SMA Negeri 4 Padang malalui jalur SNMPTN 2015. Hasil kaluluihan SNMPTN ditahun 2015 marupokan nan tatinggi di Sumatra Barat. Bagitu pulo luluihan 2016 dan 2017 nan diserap paguruan tinggi mancapai 97%. Prestasi di bidang akademik dan non akademik dalam kurun wakatu 2014 sampai jo 2017 mangalami kanaikan nan cukuik signifikan jo diterapkannyo "tradisi Senin berprestasi". Tradisi Senin Berprestasi adolah program tahunan nan diguliakan dek Kapalo Sikolah Abinul Hakim, S.Pd., M.Si., di mano satiok hari Senin katiko upacara ado panyarahan piala, medali, atau sertifikat juara nan diraih siswa dalam babagai macam ajang lomba tingkek kota, provinsi, nasional, maupun Internasional. Tradisi Senin Baprestasi mampunyoi motto Go! Fight! Win!