Rumah Gadang 21 Ruang

Rumah Gadang 21 Ruang marupokan sabuah Rumah Gadang nan talatak di Jalan Rayo Kapalo Koto, Jorong Kapalo Koto, Nagari Abai, Sangir, Solok Selatan. Sacaro umum bangunannyo talatak dalam bantang lahan nan data, barado di lahan pamukiman panduduak, jo arah hadok ka Barat. Rumah gadang panjang talatak di Nagari Abai mampunyoi 21 ruang. Jikok diukua panjangnyo malabihi lapangan sipak bola, diraso layak dimasuakan rekor MURI sabagai rumah adaik tapanjang.

Deskripsi Historis

Rumah Gadang ko diwariskan sacaro turun- tamurun. Bangunannyo punyo Datuak Simajolelo nan basuku Malayu Sigintir. Manuruik ahli waris karajaan rumah gadang 21 ruang ado kaitannyo jo rumah gadang suku Melayu nan ado di Muara Labuah. Bangunan rumah gadang dibangun sacaro gotong royong nan dikomandoi dek niniak mamak jo caro mahimpun potensi kaum nan ado. Rumah Gadang 21 Ruang ko indak digunoan sabagai hunian, tapi hanyo digunoan pado saaik upacara-upacara tatantu, sarupo: upacara adaik, acara baralek dari katurunan rumah gadang nan ado anggota kaluarga nan maningga mayatnyo disamayamkan di rumah gadang ko. Di rumah gadang 21 ruang ko masih malastarian kasenian Batombe. Kasenian Batombe dilakukan katiko pangangkatan datuak acara baralek jo pambangunan rumah gadang.

Deskripsi Arkeologis

Rumah Gadangko disabuik sabagai namo Rumah Gadang 21 ruang, karano mampunyoi biliak sabanyak 21 biliak. Dindiang bagianmuko tabuek dari semen sadangkan tulang untuak malakekan semen tabuek dari batuang nan dianyam. Dindiang bagian balakang tabuek dari batuang nan dianyam. Dindiang biliak tabuek dari papan, lantai bangunannyo papan, sarato atok tabuek dari seng nan babantuak gonjong. Bagian tangah bangunan ditopang dek tiang nnan bajumlah 21 tiang. Tiang bagian sabelah kanan pintu masuak bajumlah 5 buah tiang nan ciek tiang dakek anjuang sabalah kanan pintu masuak diagiah ragam hias pakai motif, bagian bawah tiang dibuek sagi lapan. Makasuik dari bantuak tiang sagilapan dikaikan jo undang -undang lapan nan tamasuak adaik istiadaik nao ado di Solok Selatan. Bangunan ko mampunyoi ciek pintu masuak, didalam ruangan tadapek duo buah anjuang nan biasonyo digunoan untuak tampek duduak datuak-datuak atau nan dituoan di rumah gadang.

Bangunan rumah gadang ko mampunyoi konstruksi rumah pangguang, baatok seng galombang, jumlah gonjong 15 buah (7 di kiri, 7 di kanan, jo 1 di bagian muko). Rumah Gadang ko baratok ijuak. Arah hadok bangunan ka barat, sacaro kasaluruahannyo tabuek dari bahan kayu, hanyo dindiang nan bagian bawah bangunan (kolong) rumah gadang tabuek dari semen. Di bagian muko rumah gadang tadapek anjuangan jo janjang bajumlah 5 buah tabuek dari semen.