Raja Kecil dari Siak
Sultan Abdul Jalil Rahmat Syah, nan namonyo iolah Raja Kecil, adolah pandiri Kasultanan Siak Sri Inderapura. Manuruik hikayat, inyo adolah anak Sultan Mahmud Shah II dari Johor nan mako dari itu inyo manuntuik dan marabuik takhta Johor dari Tengku Bendahara dengan mangumpuakan babagai suku di pasisia timur Sumatera. Sasudahnyo bakuaso ampek taun di Johor, inyo dihalau kalua dari Johor, mundur ka Buantan sarato mandirikan Kasultanan Siak. Dari Buantan, Raja Kecil malemahkan kakuasoan Johor jo babagai sarangan jo mangamankan wilayahnyo nan kayo jo sumber daya alam. [1]
| Raja Kecil | |||||
|---|---|---|---|---|---|
| Sultan Abdul Jalil Rahmat Syah | |||||
 Jirek kubua Raja Kecil | |||||
| Sultan Siak Sri Indrapura na ka-1 | |||||
| Bakuaso | 1723 – 1746 | ||||
| Panaruih | Tengku Buwang Asmara | ||||
| Sultan Johor ka-12 | |||||
| Pandaulu | Abdul Jalil Syah IV | ||||
| Panaruih | Sulaiman Badrul Alam Syah | ||||
| Lahia | Tuan Bujang 1699/1700 Johor, Kesultanan Johor | ||||
| Maningga | 1746 Buantan, Siak Sri Indrapura | ||||
| Pamakaman | Makam Marhum Buantan, Siak Sri Indrapura | ||||
| |||||
| Ayah | Mahmud Syah II (dugaan) | ||||
| Mandeh | Encik Apong | ||||
| Pasangan |
| ||||
| Anak |
| ||||
| Agamo | Islam | ||||
Tulisan sijarah
suntiangSumber-sumber nan utamo perihal Raja Kecil adolah Hikayat Siak jo Tuhfat al-Nafis. Kaduonyo mancaritoan ka Raja Kecil dari suduik pandang nan tantangan, walaupun banyak manyampaikan fakta nan samo. Hikayat Siak jo Tuhfat al-Nafis samo-samo manulih baso Raja Kecil gadang di Pagaruyung di bawah naungan Puti Jamilan, bakuaso di Johor sasudah dirabuik dari Sultan Abdul Jalil Tengku Bendahara, diusir ka Siak jo acok manyarang Johor sasudah itu.[2]
Nan mambedoan kaduonyo iolah dima nan bapihak: Tuhfat an-Nafis mamihak bana ka nan tokoh-tokoh Bugih, dimano Raja Ali Haji adolah katurunan dari bangso itu, sarato mancacek urang Siak jo Minangkabau nan marupokan musuah utamo pado maso itu. Samantaro itu, Hikayat Siak mambela Raja Kecil jo pangikuiknyo sarato maagiah alasan logis ateh babarapo tindakan Raja Kecil taradok urang Bugih. Kadang-kadang, hasia parang dimenangkan dek pihak nan didukuang dek satiok panulih, sarupo pado parang Kedah. [2]
Salain dari itu, Balando juo mancataik kabaradoan Raja Kecil, tarutamo kagiatannyo sabagai urang gadang.[3] Partamo kali namo Raja Kecil dicataik dek VOC adolah kutiko urang Minangkabau manulih ka mareka baso surang anak dari Mahmud Syah datang sabagai wakil Pagaruyung untuak mancari dandam ateh darah ayahnyo.[4] Karano inyo diangkek jo dikirim dek Pagaruyung, Balando maanggap kabaradoan Raja Kecil sabagai bagian dari dunia Minangkabau. [1] Namun, pado suatu saat, wakil Minangkabau dek Raja Kecil digantikan dek "Sultan Maharaja", sahinggo inyo indak manuruik lai. [4] Sabagian gadang carito Raja Kecil dari suduik pandang Barat (Bahaso Balando jo Inggirih) dirangkum dek Elisa Netscher dalam tulisannyo De Nederlands in Johor en Siak 1602 tot 1865.[5] Sumber lain nan mancaritokan tabantuaknyo Kasultanan Siak adolah Syair Raja Siak.
Lahia jo Awal Hiduik
suntiangKisah Raja Kecil bamulo dari kamatian Sultan Mahmud Syah. Baiak Tuhfat maupun Hikayat Siak mancaritoan[6] baso Mahmud Syah mambunuah bini Megat Sri Rama, sahinggo manimbuakan bangih Megat Sri Rama. Kasampatan iko diambiak dek Datuk Bendahara, Temenggung jo Indera Bungsu, nan sapakaik untuak mambaleh dandam kapado Megat Sri Rama jo manggantian sultan. Datuk Bendahara kudian manghasuik sultan untuak mambunuah panglimo setianyo nan banamo Seri Bija Wangsa jo tuduahan pangkhianatan. Namun, dalam Hikayat Siak, Datuk Bendahara mahukum mati ka Seri Bija Wangsa tanpa pangatahuan sultan. Pado hari Jumaik, Mahmud Syah diangkek (dijulang) ka musajik, dan Megat Seri Rama mandabiah sultan sainggo inyo maningga (mangkat). Dek sabab tu mako inyo digala Marhum Mangkat Dijulang.[6][7]
Dalam Hikayat Siak, Raja Kecil adolah anak dari Sultan Mahmud Syah II (dalam teksnyo disabuik Sultan Abdul Jalil Syah) jo Encik Apong nan "bahubungan seks" pado malam Jumaik sabalun sultan maningga. "Hubungan" nan dimukasuik adolah katiko sultan sadang dalam nafsu dan maninyo mamanca, dan sultan mamarentahkan Encik Apong untuak manalannyo.[6] Dalam Tuhfat, sasudah mancaritoan "di dalam sejarah sebelah Siak", Raja Ali Haji juo mancaritoan "setengah kaul sejarah lain" baso sasudah Mahmud Syah "takkala mangkat baginda itu zakarnya berdiri", jo pajabaik Johor mamarentahkan Encik Apong untuak punyo hubungan seks jo inyo sahinggo "penisnyo jatuah rajo itu." Sasudah itu, Encik Apong dibaok dek urang nan banamo Panglima Bebas ka Pagaruyung.[7]
Tuhfat indak manambahan nasib Encik Epong sasudah itu, lain jo Hikayat Siak. Samantaro masih manganduang, Encik Apong ditanyo dek Bendahara dan mangaku baso janin kandungannyo tu adolah anak Mahmud Syah. Inyo bajanji ka Bendahara baso inyo indak ka mancaliak muko anaknyo sasudah inyo malahiakan.[6] Sasudah malahiakan, Encik Apong manyarahkan bayi tu ka apaknyo, Laksamana, untuak dibaok lari dari Johor. Laksamana mambaoknyo ka Raja Negara di Selat Singapura. Raja Negara mambaok bayi tu ka Muar untuak dipaliharo dek Temenggung Muar, dan gadang samantaro di sinan.[6] Dek indak adonyo anak-anak Mahmud Syah (nan tampak), urang Johor maangkek Tengku Bendahara sabagai sultan Johor bagala Sultan Abdul Jalil. [7]
Sado urang di Johor indak tahu parihal anak Encik Apong sampai inyo baumua tujuah taun, kutiko acok inyo bamain di kuburan Mahmud Syah dan mamakan rumpuik di sinan. Samantaro anak-anak lainnyo muntah darah sasudah makan rumpuik tu, anak tu baiak badannyo. Hal iko manarik paratian urang Johor, tamasuak Yang Dipertuan Muda, adiak dari Abdul Jalil nan manguasoi Johor sasudah Mahmud Syah maningga. Sasudah itu, Laksamana jo Raja Negara malarian anak itu, malalui Nakhoda Malim. Dek Nakhoda Malim, anak tu dibao ka Jambi, dibari namo Tuan Bujang. Sasudah pai ka Jambi, lalu pai ka Pagaruyung. [6]
Tuan Bujang paliharo dek Puti Jamilan bundo kanduang dari Karajaan Pagaruyung, bak anaknyo surang dek kasihan apaknyo maningga.[1] Sasudah akil balig, inyo marantau ka Batanghari[4] lalu taruih ka Palembang, nan karajaannyo bacakak antaro Sultan Anum jo Sultan Lema Abang.[6] Salamo pajalanannyo, inyo manikah jo anak Dipati Batu Kucing; dalam catatan Netscher, inyo banamo Ence Kecil atau Jenamal.[8] Paraduannyo iko babuah anak laki-laki nan banamo Raja Alam.[6] Lamo inyo marantau, baliaklah inyo ka Pagaruyuang, katiko pulang ditanyo Puti Jamilan “mengapa engkau lama di laut?”, mako jaweklah Pak Bujang “untuk menengok cupak gantang orang.” Puti Jamilan nan mandorong Tuan Bujang marantau, kini ko ka Johor, untuak mambaleh darah ayahnyo. Karajaan Pagaruyung manobatkannyo sabagai Rajo Ketek, manganugerahinyo jo babagai pusako, sarato surek jo meterai mohor Pagaruyung nan mandorong parantau Minangkabau untuak mandukuangnyo katiko dimintak atau untuak maagiah 20 real, jo ancaman bisa kawi.[1]
Marabuik Takhta Johor
suntiangKatiko tibo di Bukit Batu atau Sabah Aur, Raja Kecil basobok syahbandar Johor di sinan dan didando 20 real, sahinggo inyo basumpah ka mambaleh panghinaan ko jo caro maisok darah si syahbandar katiko dirinyo alah bakuaso.[4][6][9] Sudah tu inyo pai ka Bengkalis dan basuo jo pamimpin-pamimpin Minangkabau di sinan sarato manunjuakkan surek dari Pagaruyung. Dek itu, dukungan dari pihak Minangkabau ado di tangan Raja Kecil. Salain itu, baliau juo mancari dukuangan dari Batubara, Tanah Putih jo Kubu, kamudian babaliak ka Bengkalis dan basiap-siap manduduki Johor. Salain dari dukuangan Minangkabau, daerah-daerah iko jo sakitarnyo alah maraso dek kakuasoan Johor, nan salalu diparatian kareh jo sarupo budak.[4]
Parang Johor tajadi salingkuang akhia Februari jo awal Maret 1718. Manuruik Hikayat Siak, salain dari urang Minangkabau, Raja Kecil juo didukuang dek Orang Laut, nan tingga di Selat Melaka, babarapo urang Bugih, sarato babarapo urang tinggi dari karajaan Johor nan mambelok ka inyo. Iko ditambuah pulo jo kondisi pertahanan Johor nan indak banyak malawan baliak.[10] Hikayat Siak manulihan baso mariam Johor indak dapek manembak, malainkan kalua aia darinyo; Carito mariam ko manjadi 'bahan' kharisma Raja Kecil sabagai anak dari Mahmud Syah Mangkat Dijulang.[2][10] Sasudah balabuah di Johor, Raja Kecil mayakinkan babarapo urang Johor; di Hikayat Siak inyo marandam mangkuak rotan ka dalam aia lauik, badoa supayo jikok inyo anak Mahmud Syah aianyo rasonyo segar, dan katiko mereka mancubo aia dari mangkuak itu rasonyo tawa. Kabanyakan nan picayo adolah dari Urang Lauik.[10][6] Manuruik catatan Joao Tavares, saurang kapten Portugis, Raja Kecil juo didukuang dek urang Singapura jo babarapo urang Bugih, jo yakin maajak urang Portugis untuak bagabuang;[4] Dalam Hikayat Siak, pamimpin Bugih ko iolah Daeng Parani jo Daeng Celak.[6]
Sasudah Raja Kecil masuak ka Johor, Yang Dipertuan Muda Johor mambunuah bini jo anaknyo kamudian mangamuak di kota; di Tuhfat al-Nafis inyo mambunuah mareka karano takuik dijadian budak jo gundik dek musuah-musuahnyo.[2][6] Raja Kecil kamudian mambuek pasakutuan jo Abdul Jalil nan caronyo mambaliakannyo sabagai Tengku Bendahara sarato manikah jo anak padusinyo, Tengku Tengah. Namun, Raja Kecil mambatalkan tunangannyo jo inyo karano kanai ati jo adiaknyo, Tengku Kamariah. Raja Kecil dinobatkan sabagai Yang Dipertuan Besar Sultan Abdul Jalil Rahmat Syah.[4][6] Samantaro di Johor, tadanga kaba Encik Apong lah maningga, mako inyo baziarah ka kuburannyo.[6]
Walaupun inyo bausaho untuak mampatahankan aliansi tu, Rajo Ketek indak dapek mampatahankannyo labiah lanjuik. Pambatalan tunangan jo Tengku Tengah marupoan salah satu titiak balik hubungan aliansi.[4] Alun lai, Daeng Parani manuntuik janji dari Raja Kecil untuak manjadi Raja Muda tapi akhianyo ditulak, jo alasan mareka datang kutiko rombongan Raja Kecil alah salasai manyarang Johor.[6] Tengku Tengah kamudian manikah jo Daeng Parani dan dijanjikan jabatan tinggi jikok mareka dapek malapehan Raja Kecil jo maangkek Raja Sulaiman, kakak Tengku Tengah, sabagai Yang Dipertuan dari Johor. Mereka menculik Tengku Kamariah lalu lari ka Pahang. Dengan baitu, Raja Kecil kahilangan kakuasoan dek kaum bangsawan Melayu jo Bugih.[4] Raja Kecil jo pandukuangnyo mundur, partamo ka Kapulauan Riau, kamudian pado bulan Januari 1719 ka Pulau Guntung.[4] Samantaro dalam panjagoan mareka, Tengku Kamariah malahiakan Tengku Buwang.[6]
Samantaro di Pulau Guntung, inyo basurek jo VOC, nan dalam catatan mareka bagala "Raja Kecil nan mamarintah Pulau Guntung jo syahbandar Sri Sultan Pagaruyung".[4][10] Namun, VOC manarimo surek pulo dari Pagaruyung baso "Sultan Gagar Alam" (dalam catatan VOC, anak Puri Jamilan) alah manunjuak Sultan Maharajo untuak manggantian Raja Kecil jo maimbaunyo untuak baliak ka Pagaruyung, sarato manjamin jalua dagang ameh di pantai timur sumatera.[4] Raja Kecil indak namuah patuah, nan baitu mangumpuakan Orang Laut di Riau untuak mandukuangnyo baliak, jo mamburu Sultan Maharajo jo kaampek Orang Kaya pangikuiknyo, nan akhianyo kalah jo lari ka padalaman Sumatera. Raja Kecil basurek baliak ka VOC baso inyo alah maamankan rute Petapahan dan akan babaliak ka Johor dari Pulau Guntung. Pasukan pandukuang Raja Kecil kamudian manyarang Riau, tapi mancaliak kakuatan urang Bugih, Raja Kecil mundur ka padalaman Sumatera.[6] Jo pambunuahan Tengku Bendahara di pihak Siak - baiak sabalun maninggaan Johor atau samaso barado di Riau - Rajo Sulaiman nan pernah manguasoi Johor diangkek manjadi sultan dan mangabek persatuan jo urang Bugih jo maagiah mareka jabatan Raja Tua jo Raja Muda.[4][6][7]
Yang Dipertuan Besar Siak
suntiangRaja Kecil pado taun 1722 manaruko padalaman pasisia timur Sumatra dan mandapekan sabuah daerah banamo Buantan. Dari situlah, di tapi Sungai Siak, inyo mandirian sabuah "negeri" baru, nan inyo sabagai rajo bagala Sultan Abdul Jalil Rahmat Syah.[4][6] Dari Buantan, inyo mangumpuakan kakuatan untuak manyarang Johor dan berhasil maambiak bininyo dari tangan musuah. Hikayat Siak manulih carito iko sabagai usaho nan barani dek Raja Kecil, dimano inyo dapek manyalamaikan bininyo jo Tengku Buwang anaknyo,[6] samantaro Tuhfat al-Nafis manulih baso Raja Kecil mamintak Rajo Sulaiman untuak mambaliakan bininyo jo sumpah baso inyo akan indak manyarang Johor lai.[7][8] Inyo mambaleh dandam pulo ka syahbandar Johor nan marandahkannyo di Bukit Batu atau Sabah Aur, namun dek pamintaan Orang Asli inyo indak dibunuah, tapi malah jarinyo luko saketek jo darahnyo diisok dek Raja Kecil dalam rangka manabuih sumpahnyo; Hal iko juo manunjuakan panakluakan daerah tasabuik.[6][8] Pado maso iko, Raja Alam basobok jo ayahnyo dan manjadi urang tinggi di istano.[6]
Taun-taun awal badirinyo Siak ditandoi jo konflik antaro Raja Kecil jo Johor. Raja Kecil acok manggaduah kakuasoan Johor nan caronyo manyarang kapulauan Riau jo sakitarnyo, samantaro Johor bausaho managakkan kadaulatannyo di pasisia timur Sumatera (tarutamo Bengkalis jo sakitarnyo) sarato mahalang Raja Kecil. Hasia dari sarangan-sarangan tasabuik acok indak pasti, karano baiak Hikayat Siak maupun Tuhfat al-Nafis mangaku babagai kamanangan untuak pihak nan didukuangnyo.[2][4] Raja Kecil pado mulonyo juo basakutu jo VOC nan manyadiokan mariam jo bubuak mesiu sabagai imbalan pitih real jo galigo, tapi pasakutuan itu barakhia pado taun 1727.[4] Parang nan paliang dicaliak dek Hikayat Siak jo Tuhfat al-Nafis adolah parang Kedah, dimano Daeng Parani mati dek mariam Raja Kecil. Hasia parang juo indak pasti:[2] Hikayat Siak manyatoan baso Raja Kecil manang basamo rajo Kedah lalu babaliak ka Siak,[6] samantaro Tuhfat al-Nafis manyatoan baso pasukan Bugih mangamuak satalah kamatian Daeng Parani sahinggo itu Raja Kecil mundua ka Siak.[7] Di tangah kacau balau ko, Raja Kecil punyo bini surang lai nan baranak Tengku Sahak jo Tengku Putih; Raja Kecil punyo anak salapan urang kasaluruhannyo.[4][6] Raja Kecil manyarang Johor untuak tarakhia kalinyo pado taun 1735.[4]
Samantaro di Buantan Raja Kecil manyusun pamarintahannyo. Pandukuang Rajo Ketek dapek bamukim jo bakambang biak di tanahnyo, tapi tanah nan ado iolah hak milik urang asli.[8] Inyo manunjuak pulo babarapo pandukuangnyo sabagai Orang Besar-besar; Limbago iko kudian bakambang manjadi Datuk Empat Suku.[4] Kaduo anak Raja Kecil mambantu apaknyo pulo dalam mahadang Johor di Selat Melaka, tarutamo sasudah inyo baranti manyarang baliak. Raja Alam pado taun 1737 mambangun benteng di Riau sarato manyarang sabuah kapa Bugih sarato maambiak mariamnyo. Walau akhianyo inyo mundur, Raja Alam malemahkan kakuasoan Johor jo manduduki babarapo daerah di Johor sarato mangganggu palayaran mareka. Tengku Buwang malemahkan wilayah Linggi jo sakitarnyo, lalu pado bulan Mei 1740 manyarang urang Bugih di Muar.[4]
Akhia Hiduik
suntiangRaja Kecil taibo kutiko Tengku Kamariah maningga dek panyakik nan alah lamo ditangguangnyo. Inyo acok baziarah ka kuburan bininyo itu bahkan lalok disampiang kuburannyo. Nan mode iko manjadi-jadi bara taun lai manjalang akhia hiduiknyo. Kutiko ditanyo sia nan ka manggantiannyo, Raja Kecil manjawek "barang siapa yang hidup, itulah anak kita" [4][6][7] Orang Besar-besar kudian mamiliah Tengku Buwang, nan marupoan anak gahara (katurunan Bangsawan Melayu), daripado Raja Alam nan marupokan anak dari kaluarga lokal nan tanamo. Raja Alam dijadian Yang Dipertuan Muda, nan aratinyo inyo ka manggantian Tengku Buwang sabagai panaruihnyo.[4][6] Walau baitu, basalisiahnyo Raja Alam jo Tengku Buwang indak juo salasai. Raja Alam mangumpuakan kakuatan di Batubara,[4][6] tampek parantau Minangkabau banyak bamukim.[11] Kota itu bahkan bisa basaiang jo padagangan Bengkalis.[4]
Di tangah-tangah patikaian antaro kaduo anaknyo itu, Raja Kecil maningga sakitar taun 1746[5] dan dikubua di Buantan, dakek kubua Tengku Kamariah. Kubua itu kini manjadi salah satu warisan budayo Kabupaten Siak.[12]
Rujuakan
suntiang- ↑ a b c d Andaya, Leonard Y. (2019). Selat Malaka: sejarah perdagangan dan etnisitas. Jakarta: Komunitas Bambu. ISBN 978-623-7357-04-9.
- ↑ a b c d e f Hashim, Muhammad Yusoff (1988). "Di Antara Fakta dan Mitos: Tradisi Pensejarahan di Dalam Hikayat Siak atau Sejarah Raja-Raja Melayu". Sejarah: Journal of the Department of History. 1 (1): 63–116. doi:10.22452/sejarah.vol1no1.3. ISSN 2756-8253.
- ↑ Coolhaas, W.P. (1964). "Generale Missiven der V.O.C.". Journal of Southeast Asian History. 2 (7). doi:10.1017/S0217781100003318.
- ↑ a b c d e f g h i j k l m n o p q r s t u v w x Barnard, Timothy P. (2003). Multiple Centres of Authority: Society and Environment in Siak and Eastern Sumatra, 1674-1827. London: Brill. ISBN 978-90-04-45435-4. https://brill.com/display/title/23422.
- ↑ a b Netscher, Elisa (2002). Belanda di Johor dan Siak 1602-1865. Diterjemahkan oleh Wan Ghalib. Pekanbaru: Pemerintah Daerah Kabupaten Siak dan Bina Pusaka.
- ↑ a b c d e f g h i j k l m n o p q r s t u v w x y z aa Hashim, Muhammad Yusof (1992) (dalam bahaso ms). Hikayat Siak: Sejarah mengenai raja-raja Melayu Kerajaan Siak Sri Inderapura. Kuala Lumpur: Dewan Bahasa dan Pustaka, Kementerian Pendidikan, Malaysia. ISBN 978-983-62-2728-7. https://books.google.co.id/books/about/Hikayat_Siak.html?hl=id&id=NggXAAAAIAAJ&redir_esc=y.
- ↑ a b c d e f g Haji, Raja Ali (2002). Tuhfat Al-Nafis Sejarah Riau-Lingga dan Daerah Takluknya 1699-1864. Kuala Lumpur: Yayasan Khazanah Melayu. https://pustaka.kebudayaan.kemdikbud.go.id/index.php?p=show_detail&id=11519.[pranala nonaktif permanen]
- ↑ a b c d Van Anrooij, H.A. Hijmans (2016). Het Rijk van Siak. Jakarta: CV Mulia Indah Kemala. ISBN 978-602-1096-93-2. https://repository.uin-suska.ac.id/10376/2/Het%20Rijk%20Van%20Siak.pdf.
- ↑ Van Anrooij, H.A. Hijmans (2016). Het Rijk van Siak. Jakarta: CV Mulia Indah Kemala. ISBN 978-602-1096-93-2. https://repository.uin-suska.ac.id/10376/2/Het%20Rijk%20Van%20Siak.pdf.
- ↑ a b c d Andaya, Leonard Y. (1972). "Raja Kechil and the Minangkabau Conquest of Johor in 1718". Journal of the Malaysian Branch of the Royal Asiatic Society. 45 (2 (222)): 51–75. ISSN 0126-7353.
- ↑ Dobbin, Christine (2008). Gejolak ekonomi, Kebangkitan Islam, dan Gerakan Padri : Minangkabau 1784-1847. Jakarta: Komunitas Bambu. ISBN 979-3731-26-5.
- ↑ Khairiah (2014). "Menelusuri Jejak Arkeologi di Siak" (PDF). Sosial Budaya: Media Komunikasi Ilmu-Ilmu Sosial dan Budaya. 11 (1): 34–54.