Wikipedia

Radang amandel

Artikel ko maagiah informasi dasa tantang topik kasihatan. Informasi dalam artikel ko buliah digunoan anyo untuak panjalehan ilmiah, bukan untuak diagnosis diri dan indak dapek manggantian diagnosis medis.
Paratian: Informasi dalam artikel ko bukanlah resep atau nasihaik medis. Wikipedia bukan pangganti dotor.
Kok Sanak paralu bantuan atau ka barubek bakonsultasilah jo tanago kasihatan profesional.

Radang amandel atau tonsillitis adolah paradangan pado amandel (tonsil palantina) nan talatak pado ulu rangkuangan.[1][2] Paradangan ko dapek disababkan dek virus atau bakteri. Bakteri nan biaso manjadi panyabab radang ko adolah Streptococcus grup A.[1][5][6][8]

Radang amandel
Sakalompok amandel nan maradang di bagian rangkuang nan tatutuik eksudat kakuniangan.
Radang amandel tipe eksudat pado anak umua 16 taun
Palafalan
SpesialisasiPanyakik mamindah (infeksi)
GejalaSakik ulu rangkuangan, damam, amandel manggadang, payah malulua, nodul limfa manggadang sakaliliang liia[1][2]
KomplikasiAbses peritonsil[1][3]
Durasi~ sapakan[4]
PanyababInfeksi virus, infeksi bakteri[1][5][6]
DiagnosisManuruik gejala, usap ulu rangkuangan, uji capek strep (rapid strep test)[1][5]
PangubekanParasetamol (asetaminofen), ibuprofen, penisilin[1][5]
Frekuensi7,5% (dalam 3 bulan)[7]

Panyakik ko tamasuak panyakik mamindah dari urang ka urang malalui udaro. Gejala nan dapek muncua pado pandarito adolah sakik ulu rangkuangan, damam, amandel manggadang, payah malulua, jo nodul limfe manggadang di sakaliliang liia.[1][2] Diagnosis dapek ditagakkan jo pamarasoan usap ulu rangkuang atau uji capek streptococcus (rapid strep test). Untuak mancari tau panyababnyo, dapek dilakukan jo panilaian Centor score.[1][5]

Ado 7,5% urang di dunia nan mangaluahkan sakik ulu rangkuangan. Panyakik ko dapek tajadi pado sadoalah umua. Walau baitu, banyak urang nan dapek cegak tanpa paralu ubek.[7] Samantaro pado pandarito nan paralu ubek, cukuik diagiah parasetamol jo ibuprofen untuak mangurangi raso nyerinyo. Pado pandarito nan disababkan dek bakteri, dapek diagiah antibiotik cando penisilin, sefalosporin, jo makrolida.[1][5][4] Pado anak-anak nan acok barulang sakiknyo, tonsilektomi (amandel diangkek) dapek dilakukan untuak mangurangi bangkik baliak.[9]

Epidemiologi

suntiang

Insiden panyakik tonsilitis pado praktik umum di Inggiris sabanyak 100 per 1000 populasi dalam satahun. Tonsilitis akut labiah acok tajadi pado anak-anak, tapi jarang tajadi pado anak barumua di bawah duo tahun.[10]

Klasifikasi

suntiang

Tonsilitis dapek diklasifikasikan manjadi:[11][12]

  1. Tonsilitis akut
  2. Tonsilitis membranosa
  3. Tonsilitis kronis

Tonsilitis akut

suntiang

Tonsilitis akut ditandoi jo adonyo bangkak jo sirah di daerah amandel (baiak ado atau indak ado eksudat), limfadenopati sakaliliang liia, jo damam di ateh 38,3ºC. Ado duo panyabab tonsilitis akut, yaitu virus jo bakteri.[11][13]

Tonsilitis akut virus mampunyoi gejala sarupo damam pilek biaso nan disaratoi sakik di ulu rangkuang. Pado infeksi virus Haemophillus influenzae dapek tajadi paradangan bananah. Pado infeksi virus coxschakie, dapek tasuo luko-luko ketek pado langik-langik (palatum) jo amandel nan amaik padiah.[11][14]

Tonsilitis akut bakterialis mampunyoi gejala barupo sakik ulu rangkuang jo sakik katiko malulua, damam jo suhu nan tinggi, latiah, sakik pasandian, indak salero makan, jo raso sakik di talingo (otalgia). Otalgia disababkan dek nyeri aliah malalui saraf glosofaringeus. Pado pamaersoan, tampak amandel mambangkak, sirah, jo ado detritus babantuak folikel jo lakuna sarato tatutuik membran semu. Detritus adolah kumpulan leukosit, bakteri mati, jo epitel nan talapeh nan maisi amandel (kriptus tonsil), sarato tampak sabagai bercak kuniang atau putiah.[11][14]

Tonsilitis membranosa

suntiang

Pado tonsilitis difteri dapek ditamukan tigo golongan gejala, yaitu gejala umum, lokal, jo efek eksotoksin. Gejala umum adolah gejala nan biaso ado di tonsilitis. Gejala lokal nan tasuo yaitu gejala amandel mambangkak nan tatutuik bercak putiah kumuah nan makin lamo samakin malaweh dan manyatu mambantuak membran semu. Membran semu ko malakek arek jo jaringan tonsilnyo, sainggo kok diangkek mudah badarah. Gejala lainnyo nan marupokan efek dari eksotoksin bakteri difteri adolah gejala karusakan jaringan tubuah. Pado jantuang ka tajadi miokarditis inggo jantuang payah mamompa darah (decompensatio cordis). Kudian di saraf kranial ka tajadi kalumpuahan otot langik-langik muluik jo otot untuak barangok. Samantaro pado ginjal nan tajadi adolah albuminuria, ado kanduangan albumin pado urin.[11][14]

Angina Plaut Vincent atau stomatitis ulsero membranosa mampunyoi gejala cando damam inggo 39ºC, sakik kapalo, badan lamah, dan kadang-kadang ado gangguan pencernaan, raso padiah di muluik, hipersalivasi (banyak baliua), sarato gigi jo gusi nan mudah badarah. Pado pamaresoan ka tasuo membran putiah kaabuan di ateh tonsil, uvula, dindiang ulu rangkuang, gusi, sarato prosesus alveolaris, muluik babaun (foetor ex ore), jo kelenjar submandibular manggadang.[11][14]

Infeksi mononukleosis marupokan tonsilofaringitis ulsero membranosa bilateral (radang amandel-ulu rangkuang batukak jo bamembran di kaduo sisi) nan ditandoi jo membran semu nan mudah diangkek tanpa ado pardarahan nan diikuti jo kelenjar gatah baniang liia, katiak, jo lipek pao (inguinal) nan manggadang.[11][14]

Tonsilitis kronik

suntiang

Pado pamaresoan ka tampak amandel manggadang jo lapisan lua nan indak marato, kriptus manggadang (co balubang-lubang), sarato kriptus nan tarisi detritus. Kriptus nan maleba disababkan dek paradangan barulang nan mangikih mukosa jo jaringan limfoid pado amandel nan mambuek jaringan limfoid tagantikan jo jaringan paruik. Hal iko mambuek amandel tampak bakaruik jo kriptus maleba. Gejala lainnyo adolah raso mangganja di ulu rangkuangan, raso kariang di ulu rangkuang, inggo angok babaun.[11][14]

Tatalaksana

suntiang

Tatalaksana radang amandel antaro lain:[11]

  • Istirahaik cukuik
  • Makan makanan lunak jo mailakan makanan nan mairitasi
  • Manjago muluik barasiah
  • Agiah ubek topikal cando ubek kumua antiseptik
  • Agiah ubek minum sistemik:

Pado radang amandel dek virus, ubat nan diagiah adolah ubek antinyeri jo antivirus (kok gejala mambarek). Antivirus nan dapek diagiah cando metisoprinol. Samantaro pado radang amandel dek bakteri, dapek diagiah antibiotik Penisilin G Benzatin jo amoksisilin atau eritromisin.[11]

Rujuakan

suntiang
  1. ↑ a b c d e f g h i j "Pharyngitis-Tonsillitis in Children and Adults" (PDF). Institut national d'excellence en santé et en services sociaux (INESSS) (dalam bahasa Inggris). Institut national d'excellence en santé et en services sociaux (INESSS). March 2016. Diarsipkan dari versi asli (PDF) tanggal 22 October 2020. Diakses tanggal 22 November 2020. 
  2. ↑ a b c "Acute Tonsillitis". NCIthesaurus. Diakses tanggal 3 November 2020. 
  3. ↑ Klug TE, Rusan M, Fuursted K, Ovesen T (August 2016). "Peritonsillar Abscess: Complication of Acute Tonsillitis or Weber's Glands Infection?". Otolaryngol Head Neck Surg (Review). 155 (2): 199–207. doi:10.1177/0194599816639551. PMID 27026737. 
  4. ↑ a b Spinks A, Glasziou PP, Del Mar CB (November 2013). "Antibiotics for sore throat". Cochrane Database Syst Rev (Review) (11): CD000023. doi:10.1002/14651858.CD000023.pub4. PMC 6457983  . PMID 24190439. 
  5. ↑ a b c d e f Windfuhr JP, Toepfner N, Steffen G, Waldfahrer F, Berner R (April 2016). "Clinical practice guideline: tonsillitis I. Diagnostics and nonsurgical management". Eur Arch Otorhinolaryngol (Practice guideline). 273 (4): 973–87. doi:10.1007/s00405-015-3872-6. PMC 7087627  . PMID 26755048. 
  6. ↑ a b Lang 2009, p. 2083.
  7. ↑ a b Jones 2004, p. 674.
  8. ↑ Ferri 2015, p. 1646.
  9. ↑ Windfuhr JP, Toepfner N, Steffen G, Waldfahrer F, Berner R (April 2016). "Clinical practice guideline: tonsillitis II. Surgical management". Eur Arch Otorhinolaryngol (Practice guideline). 273 (4): 989–1009. doi:10.1007/s00405-016-3904-x. PMID 26882912. 
  10. ↑ Georgalas, Christos C.; Tolley, Neil S.; Narula, Anthony (2009-10-26). "Tonsillitis". BMJ clinical evidence. 2009. ISSN 1752-8526. PMC 2907808  . PMID 21718574. 
  11. ↑ a b c d e f g h i j Soepardi EA, Iskandar N, Bashiruddin J, Restuti RD. Buku ajar ilmu kesehatan telinga hidung tenggorok kepala dan leher. Edisi ke-7. Jakarta: Fakultas Kedokteran Universitas Indonesia. 2016.
  12. ↑ Maulana Fakh, Ivan; Novialdi, Novialdi; Elmatris, Elmatris (2016-08-11). "Karakteristik Pasien Tonsilitis Kronis pada Anak di Bagian THT-KL RSUP Dr. M. Djamil Padang Tahun 2013". Jurnal Kesehatan Andalas. 5 (2). doi:10.25077/jka.v5i2.536. ISSN 2615-1138. 
  13. ↑ Maulana Fakh, Ivan; Novialdi, Novialdi; Elmatris, Elmatris (2016-08-11). "Karakteristik Pasien Tonsilitis Kronis pada Anak di Bagian THT-KL RSUP Dr. M. Djamil Padang Tahun 2013". Jurnal Kesehatan Andalas. 5 (2). doi:10.25077/jka.v5i2.536. ISSN 2615-1138. 
  14. ↑ a b c d e f Maulana Fakh, Ivan; Novialdi, Novialdi; Elmatris, Elmatris (2016-08-11). "Karakteristik Pasien Tonsilitis Kronis pada Anak di Bagian THT-KL RSUP Dr. M. Djamil Padang Tahun 2013". Jurnal Kesehatan Andalas. 5 (2). doi:10.25077/jka.v5i2.536. ISSN 2615-1138. 
Klasifikasi
Sumber lua
Diambiak dari "https://min.wikipedia.org/w/index.php?title=Radang_amandel&oldid=2498076"