Puncak batu runciang

Puncak batu runciang marupokan salah satu puncak yang ado di daerah Kota Sawahlunto, tapeknyo ado di Silungkang. Puncak batu runciang babantuak pabukitan yang tadiri dari kapua jo koral. Wisata puncak batu runciang ko manjadi wisata alam alternatip untuak para pangunjuang nan suko wisata alam nan agak manantang. Sakaligus bisa manjalajahi kaindahan dan kaunikan untuak dicaliakan ka pangunjuang.

Untuak manuju ka puncak batu runciang indaklah sulik. Jalan masuak untuak bisa manuju ka puncak batu runciang ado di tapi jalan lintas Solok - Sawahlunto, dan puskesmas silungkanglah nan manjadi patokan jalan masuak ka puncak batu runciang.

Dari jalan masuak ka puncak batu runciang kiro-kiro bajarak 4 kilometer. Pangunjuang diarokan bahati-hati katiko malinteh di jalan iko karano jalannyo nan sampik dan berliku sahinggo bisa manyusahan pangamudi, tarutamo pangamudi oto. Masuak ka puncak batu runciang indak mambayia, pangunjuang hanyo mambayia pitih parkir masuak. Dari pintu masuak ka titiak dima pangunjuang bisa untuk mamanjek dipakiroan sajauah 500 meter. Satibo disitu, pangunjuang bisa mamiliah puncak batu runciang maa yang nio dipanjek untuk bisa bafoto tantunyo.

Diagiah namo puncak batu runciang karano di ateh puncak ado batu-batu gadang yang runciang dan tinggi, sahinggo katiko alah tibo di ateh puncak batu runciang bisa mancaliak pamandangan rimo nan hijau. Supayo bisa sampai ka puncak batu runciang pangunjuang hanyo tingga mamanjek batu kapur jo koral ko karano runciang dan kalau indak hati-hati sangaik babahayo. Tapi, itu sadonyo pasti tabayia lunas jo pemandangan yang disadioan dek puncak batu runciang. Pangunjuang bisa bafoto juo diateh puncak ko. Kalau tampek wisata puncak batu runciang ko dikelola elok-elok  jo serius mungkin sajo destinasi wisata ko bisa basaiang jo destinasi lain yang alah ado di Sumbar. Karano kabiasaan para panikmat patualangan adolah mancari jo mangunjungi sasuatu nan baru dan indak mambosanan.