Patok Kapalo Ula
Patok Kapalo Ula adolah pamainan dari Minangkabau bajeniah non-lomba, nan mampartaruihkan kemiri atau kalereng sabagai pasangan. Adopun peralatan nan digunokan adolah kalereng. Pamaianan iko bisa dimainkan di halaman nan data, oleh tigo sampai limo urang pamain.[1]
Pamainan dimuloi dengan para pamain maliekan sajumlah kalereng masing-masing. Kemudian, dibuek garih dengan panjang labiah kurang sameter di tanah. Di ujuang salah satu garihnyo dibuek lingkaran ketek dengan diameter 10 cm nan disabuik kapalo ula, samantaro ujuang nan lain disabuik ikua. Bajarak kurang labiah ampek meter dari garih tasabuik, ado garih yang disabuik padan untuk tampek pemain mamulai lemparan.[1]
Dalam pamainan iko, sadolah pamain harus manyapakati bara jumlah pasangan (ta-an). Sadolah ta-an tasabuik dijajaran sapanjang garih dengan jarak labiah kurang satu satangah atau duo kali gadangnyo kalereng. Sabuah ta-an dilatakkan di titiak tangah lingkaran kapalo. Sabalum pamainan dimulai suit talabiah dahulu. Sia pamanangnyo, inyo nan mamulai pamainan dulu.[1]
Salanjuiknyo, satiok pemain diharuskan malemparan ta-an nan sajaja di garih manggunakan salah satu kalerengnyo sabagai kolok. Apobilo surang pamain bahasia manganai salah satu ta-an, mako sadolah ta-an nan sajaja ka arah ikua, manjadi milik inyo. Bilo inyo bahasiL manganai ta-an dalam lingkaran kapalo, mako sadolah ta-an jadi milik inyo. Bilo ta-an nan dikanaian indak kalua dari lingkaran, mako lemparan dinyatokan gagal dan harus ditampekan di posisi samula. Lemparan nan mengenai labiah dari satu ta-an dinyatokan gagal. [1]
Bilo sadolah pemain alah salasai malempar dari padan dan ta-an masih ado di garih, mako pamainan dilankuikan, yaitu malempar dari titiak dima kolok baranti. Salanjuiknyo balaku paraturan nan ditetapkan. Lemparan nan indak malewati garih kapalo ula dinyatokan mati dan indak buliah malanjuikan pamainan untuk putaran tasabuik. Biasonyo pamainan akan barakhir katiko sabagian pamain alah kahabisan kalereng.[1]