Paradilan agamo Indonesia

Paradilan agamo di Indonesia adolah sarangkaian limbago pangadilan, kapaniteraan, jo panyalasaian sengketa untuak urang nan baragamo Islam di Indonesia. Limbago pangadilan pado paradilan agamo adolah Pengadilan Agama (PA) pado tingkek partamo dan Pengadilan Tinggi Agama (PTA) pado tingkek bandiang; samantaro untuak pakaro kasasi dari PTA ditangani dek Mahkamah Agung (MA).

Gedung Pengadilan Tinggi Agama Ambon.

Sumber hukum

Paradilan agamo di Indonesia diatur dek Undang-Undang Nomor 7 Tahun 1989 tentang Peradilan Agama (alah diubah dek Undang-Undang Nomor 3 Tahun 2006 dan Undang-Undang Nomor 50 Tahun 2009). Duo limbago utamo nan malaksanakan kakuasaan kahakiman di lingkungan paradilan agamo adolah Pengadilan Agama jo Pengadilan Tinggi Agama, nan manaungi pulo Pengadilan Arbitrasi Syariah. Untuak Provinsi Aceh, Undang-Undang Nomor 3 Tahun 2006 mangatur limbago Peradilan Syari'at Islam nan basumber pado Undang-Undang Nomor 18 Tahun 2001 tentang Otonomi Khusus bagi Propinsi Daerah Aceh sebagai Propinsi Nanggroe Aceh Darussalam, sainggo limbago Pengadilan Agama di Aceh dinamokan Mahkamah Syar'iyah dan Pengadilan Tinggi Agama dinamokan Mahkamah Tinggi Syar'iyah.

Hukum materil

Kabanyakan dari pakaro nan ditangani dek paradilan agamo basumber dari katantuan-katantuan nan ado pado Instruksi Presiden Nomor 1 Tahun 1991 tentang Kompilasi Hukum Islam (KHI) sarato Peraturan Mahkamah Agung Nomor 2 tahun 2008 tentang Kompilasi Hukum Ekonomi Syariah (KHES).

Di Aceh, Mahkamah Syar'iyah jo Mahkamah Tinggi Syar'iyah bapadoman pado Qanun Nomor 10 Tahun 2002, nan mammpalaweh kawenanga paradilan agamo indak sajo pado urusan-urusan perdata Islam, namun juo untuak urusan ahwal syahsiyah (hukum kaluarga), muamalah (hukum perdata), jo jinayah (hukum pidana).

Hukum acara

Hukum acara nan mangatur tata cara pasidangan di paradilan agamo diatur dek Pasal 54 UU Peradilan Agama 1989, nan babunyi:

"Hukum acara yang berlaku pada pengadilan dalam lingkungan Peradilan Agama adalah hukum acara perdata yang berlaku pada pengadilan dalam lingkungan Peradilan Umum, kecuali yang telah diatur secara khusus dalam undang-undang ini."

—Pasal 54 UU Peradilan Agama 1989.

Dek adonyo katantuan Pasal 54 ko, hukum acara nan dipakai pado sidang paradilan agamo sacaro umum adolah nan ado pado peradilan perdata pado umumnyo, yaitu Herziene Indonesich Reglement (HIR) (Staatsblad No. 44 Tahun 1941) nan balaku untuak Pulau Jawa jo Madura; di lua Jawa dan Madura cando Ambon, Aceh, Minangkabau, Palembang, jo Kalimantan, balaku Reglement Voor de Buitengewesten (RBg) (Staatsblad No. 227 Tahun 1927).

Salain itu, untuak sidang-sidang tatantu, balaku pulo undang-undang nan iko:

• Undang-Undang Nomor 1 Tahun 1974 tentang Perkawinan sarato Peraturan Pemerintah Nomor 9 Tahun 1975 tentang Pelaksanaan Undang-Undang Nomor 1 Tahun 1974 tentang Perkawinan: untuak pakaro-pakaro nan terkait pakawinan urang Islam;
• Undang-Undang Nomor 14 Tahun 1985 tentang Mahkamah Agung, nan taakhia diubah dek Undang-Undang Nomor 3 Tahun 2009: untuak caro maajukan kasasi dari tingkek Pengadilan Tinggi Agama/Mahkamah Tinggi Syar'iyah ka Mahkamah Agung.

Kawenangan

Sacaro umum, paradilan agamo punyo duo macam kawenangan (competentie), yaitu kawenangan relatif (relative competentie) jo absolut (absolute competentie). Kawenangan relatif ado pado pangadilan pado lingkungan paradilan nan samo atau wewenangnyo baubuangan pado wilayah hukum, samantaro kawenangan absolut ado pado jinih pakaro dan sengketa kekuasaan antaro pangadilan.

Kawenangan relatif

Kawenangan relatif paradilan agamo adolah tantang pakaro gugatan dan/atau pakaro pamohonan, contohnyo:

• Pamohonan untuak izin poligami diajukan pado PA nan wilayah hukumnyo pado rumah kadiaman pamohon;
• Pamohonan pambatalan pakawinan diajukan pado PA nan wilayah hukumnyo tampek pasangan itu kawin atau tampek tingganyo;

Kawenangan absolut

Pengadilan Agamo berwenang untuak mamareso, mamutuih, dan manyalasaian pakaro di tingkek partamo antaro urang-urang nan baragamo Islam di bidang:

• Pakawinan, tamasuak:

• • Poligami (izin baistri labiah dari saurang);
  • Dispensasi pakawinan (izin untuak bakawin di bawah umua buliah kawin);
  • Izin kawin bagi nan di bawah umua buliah kawin kok urang gaek/wali dalam keluarga dalam satu garis luruih ke ateh babeda pandapek;
  • Pancagahan pakawinan;
  • Panulakan pakawinan dek Pegawai Pencatat Nikah pado Kantor Urusan Agama;
  • Pambatalan pakawinan;
  • Gugatan kalalaian kawajiban suami pado istri;
  • Carai dek sebab talak dan gugatan carai;
  • Panyalasaian harato basamo;
  • Panguasaan anak (hadlanah);
  • Panafkahan anak dek urang gaek laki-laki kok urang gaek padusi indak mampu;
  • Sah atau indaknyo surang anak;
  • Pancabutan kuaso urang gaek;
  • Perwalian;
  • Penetapan asal-usul anak;
  • Panulakan diagiahnyo katarangan untuak kawin campua;
  • Panyatoan tantang sah atau indaknyo pakawinan;
  • Panetapan wali hakim kok tajadi wali adlal;
  • Panggantian mahar nan ilang sabalun disarahkan.

• Warisan, tamasuak:
  • Panantuan ahli waris;
  • Panantuan harato paninggalan;
  • Panantuan bagian masiang-masiang ahli waris;
  • Pambagian harato paninggalan;
  • Panetapan pangadilan terkait warisan.
• Wasiat
• Hibah
• Wakaf
• Zakat
• Infak
• Sadakah
• Ekonomi syariah, tamasuak pakaro-pakaro nan terkait bank syariah, limbago kauangan mikro syariah, asuransi syariah, reasuransi syariah, reksa dana syariah, obligasi syariah, Surat Berharga Berjangka Menengah Syariah, sekuritas syariah, pambiayaan syariah, pagadaian syariah, dana pensiun limbago kauangan syariah, dan bisnis syariah

Kawenangan absolut di Aceh

Limbago Mahkamah Syar'iyah dan Mahkamah Tinggi Syar'iyah di Aceh mangatur kawenangannyo sacaro khusus sasuai otonomi daerah, yaitu:

• Ahwal syahsiyyah (hukum kaluarga): sadoalah hal nan diatur di UU Peradilan Agama 1989 kacuali tantang wakaf, hibah, jo sadakah;
• Muamalah (hukum perdata), maliputi:

• • Jua bali jo utang piutang;
  • Modal (qiradh);
  • Bagi hasil tani (musaqah, muzara'ah, jo mukhabarah);
  • Kuaso (wakilah);
  • Kongsi (syirkah);
  • Pinjam-maminjam (ariyah);
  • Sita harato (hajru);
  • Hak langgeh (syuf'ah);
  • Gadai (rahnu);
  • Pambukaan tanah (ihya'u al-mawat);
  • Pambukaan lahan tambang (ma'adin);
  • Barang tamuan (luqathah);
  • Bank;
  • Sewa-manyewa (ijarah);
  • Takaful;
  • Urusan paburuahan;
  • Harato rampasan;
  • Wakaf;
  • Hibah;
  • Sadakah;
  • Hadiah.

• Jinayah (hukum pidana), nan tabagi tigo antaro:
  • Hudud, nan maliputi zina, panuduahan zina (qadhaf), mancilok, marampok, minum-minuman baralkohol, narkotika, murtad, jo pambarontakan (bughat);
  • Qishah atau diyat, nan maliputi pambunuahan jo panganiayaan;
  • Ta'zir, nan maliputi judi, khalwat, jo maninggakan sumbayang fardhu sarato puaso di bulan Ramadhan.

Rujuakan

Daftar pustaka

• Katz, June S.; Katz, Ronald S. (1975). "The New Indonesian Marriage Law: A Mirror of Indonesia's Political, Cultural, and Legal Systems". The American Journal of Comparative Law. 23 (4): 653–681. 
• Cammack, Mark (1989). "Islamic Law in Indonesia's New Order". International and Comparative Law Quarterly. 53 (38). 
• Cammack, Mark (1997). "Indonesia's 1989 Religious Judicature Act: Islamization of Indonesia or Indonesianization of Islam?". Indonesia. 63. 
• Cammack, Mark; Feener, R. Michael (2012). "The Islamic Legal System of Indonesia". Pac. Rim L & Pol'y. 21 (1). 
• Tri Wahyudi, Abdullah (2018). Hukum Acara Peradilan Agama: Dilengkapi Contoh Surat-surat Dalam Praktik Hukum Acara di Peradilan Agama. Surakarta: CV. Mandar Maju. ISBN 978-979-538-473-1. 
• Warman, Kurnia; Isra, Saldi; Tegnan, Hilaire (2018). "Enhancing Legal Pluralism: the Role of Adat and Islamic Laws Within the Indonesian Legal System" (PDF). Journal of Legal, Ethical, and Regulatory Issues. 21 (3).