Pangek pisang adolah makanan nan barasa dari Solok Selatan, Sumatera Barat. Pangek pisang ko biasonyo tadapek di Pasa Muaro Labuah. Bantuaknyo saroman pisang nan di gulai tapi rasonyo gurih jo manih, dek karano diabuih jo santan pakek sapai kuahnyo kariang. Makanan khas Solok Selatan ko biasonyo dimakan jo lupih katan itam atau nasi lamak. Pangek pisang ko cukuik sulik ditamuan dek karano pangek pisang tamasuak makanan adaik. Biasonyo dibuek untuak acara adaik sarupo pangangkatan datuak, acara batamu rumah, jo baralek.[1] Pangek pisang ko pernah tamasuak ka dalam agenda festival budaya di Halaman Kantor Bupati, acaranyo yaitu lomba mamasak pangek pisang. Lomba masak pangek pisang tu dapek rekor Muri jumlah peserta mamasak pangek pisang tabanyak, sajumlah 146 urang yang manghasilan 1460 porsi pangek pisang.[2]

Caro mambuek suntiang

Pangek pisang manganduang bahan-bahan alami nan murah di sobokan di daerah kampuang-kampuang. Bahan pokoknyo pisang batu, santan, kunyik, garam, jo gulo putiah. Sadolah bahan ko hampia ado di satiok daerah di indonesia.

Caronyo, santan dimasak jo bumbu nan lah di siapan, tu aduak hinggo santan lah nampak manggalagak. Siap tu kubak kulik pisang sarato dibalah duo. Sudah tu masuak an pisang ka santan nan lah manggalagak, nan tarakhia aduak santan jo pisang sampai kuahnyo encer atau kental sasuai jo salero masiang-masiang.[3] Proses mamasak pangek pisang balangsuang sakitar duo jam.

Rujuakan suntiang

  1. "Berbuka dengan Pangek Pisang yang Langka". Tempo (dalam bahasa Inggris). 2012-08-10. Diakses tanggal 2019-11-26. 
  2. MURIWeb. "MURI » Lomba Memasak Pangek Pisang oleh Peserta Terbanyak" (dalam bahasa Inggris). Diakses tanggal 2019-11-26. [pranala nonaktif permanen]
  3. ardiana, ika (23 Mei 2017). "Pangek Pisang, camilan langka dari Solok". Pangek Pisang, camilan langka dari Solok. Diakses tanggal 21 Oktober 2018. [pranala nonaktif permanen]