Palai bada
Palai bada adolah hidangan nan barasa dari Sumatera Barat. Hidangan iko mamakai ikan teri untuak bahan utamonyo, nan dek panduduak satampaik disabuik jo namo "ikan bada" atau "maco bada" (dalam bantuak ikan asin). Di asa daerahnyo, hidangan iko lazim disabuik sabagai "pepes ikan teri" dek karano caro mambuek hidangan iko samo jo hidangan pepes pado umumnyo, iyolah ikan teri bamasak basamo bumbu-bumbu nan dibungkuih dalam daun pisang. Babedo jo pepes pado umumnyo nan bamasak jo caro dikukuih, palai bada iko dibaka bia mandapekan raso nan khas sasudah proses mamasak sabalumnyo.
Untuak mambueknyo, bahan-bahan nan diparaluan antaro lain ikan teri, parutan karambia, dan bumbu-bumbu antaro lain bawang sirah , kemiri, lado sirah , bawang putiah, daun kunyik, kunyik, jo garam. Kalau bahan-bahan alah ado sadonyo, kasadonyo bahan tadi dicampua alah tu dibungkuih jo daun pisang, sasudah tu dibaka di ateh baro api. Kadang pucuak daun kamangi ditambahan pulo bantuak hidangan pepes pado umumnyo buliah manambah aroma khas untuak palai bada nan mambueknyo samakin nikmat[1]. Untuak manyangrai palai ko, mamakan wakatu sakitar limo baleh minik sabalum sabana matang lalu alah siap untuak dipasarkan.
Hidangan iko pado mulonyo marupoan hidangan tradisional masyarakaik Painan, Pesisir Selatan dan marupoan hidangan populer nan sederhana di kalangan masyarakaik satampaik.[1] Kini ko palai bada banyak basobok di sajumlah daerah di Sumatera Barat, utamonyo daerah pasisia atau pantai. Di Padang, palai bada dijua basamo olahan palai atau pepes lainnyo sarato olahan dari sagu khas nan disabuik lompong sagu. Indak hanyo di pasisia, palai bada pun dijua di wilayah perairan aia tawa, contohnyo di wilayah sakitar Danau Maninjau nan samo-samo punyo hidangan sarupo banamo palai rinuak.[2] Palai bada ko kadang dibaok dek urang Minang yang ka baliak ka parantauan[3].
Karano keunikan dari bantuak jo rasonyo, ado surang pencipta lagu banamo M. Gaus malimpahan inspirasinyo takaik palai bada ka dalam lagu jo judul nan samo dan alah dinyanyian jo sajumlah penyanyi tanamo Minangkabau. Elly Kasim jadi nan partamo mandendangkan lagu iko,[4] hinggo tarakhia lagu iko dinyanyian baliak dek penyanyi mudo Ratu Sikumbang taun 2012. Dimano penggalan lagunyo adolah "Jikok jadi tuan ka pasa, tolong balikan si gulo saka. Jikok tuan salero patah cubo makan si palai bada. Urang Rao pai ka danau, ambiak rumpuik si bilang-bilang. Yo kok tuan indak picayo, bali sabungkuih baok pulang"[3].
Galeri
suntiang-
Palai bada karambia -
Palai bada balado
Rujuakan
suntiang- ↑ a b Covesia Travel: Makan Batambuah dengan Palai Bada rang Pasisia Archived 2019-02-18 di Wayback Machine.. 31 Januari 2015. Diakses 18 Februari 2019.
- ↑ Sumbar Satu: Rinuak Menghilang kini Bada nan Dipalai Archived 2019-08-02 di Wayback Machine.. 9 Agustus 2017. Diakses 18 Februari 2019.
- ↑ a b News, Tagar (2017-12-23). "Menikmati Lezatnya Palai Bada Khas Pesisir Selatan". TAGAR (dalam bahasa Indonesia). Diakses tanggal 2021-10-26.
- ↑ Ranahweb: Palai Bada, Nikmatnya Lebih dari Sekedar Lagu Archived 2019-02-18 di Wayback Machine.. 16 Juli 2013. Diakses 18 Februari 2019.