Nibung
| Nibung | |
|---|---|
| |
| Klasifikasi ilmiah | |
| Kingdom: | Plantae |
| Division: | Magnoliophyta |
| Class: | Liliopsida |
| Order: | Arecales |
| Family: | Arecaceae |
| Genus: | Oncosperma |
| Species: | O. tigillarium |
| Namo binomial | |
| Oncosperma tigillarium (Jack) Ridl. | |
| Sinonim | |
|
O. filamentosum | |
Nibung (Oncosperma tigillarium) marupokan tanaman sajenis palma (palem) nan tumbuah di rawa-rawa Asia Tenggara bahkan hambia tumbuah di sado wilayah Indonesia. Tanaman nan tamasuak famili Arecaceae mamiliki banyak manfaaik mulai dari batang, buah, hinggo daunnyo. Bahkan Nibung dianggap sabagai simbol samangaik pasatuan dan pasaudaraan masyarakat Riau. Makonyo indak heran jikok Nibung dijadikan flora identitas Riau.[1][2]
Deskripsi suntiang
Tanaman Nibung tamasuak jenis palem lia nan tumbuah barumpun mode bambu. Tanamannyo barupo pohon tinggi luruih jo tajuak nan indak rimbun bana. Tinggi tanamannyo rato-rato antaro 15-20 meter, tetapi dapek mancapai 30 meter. Ukuran diameter batangnyo mancapai 20 cm.[1]
Sabagian gadang pado bagian batang, palapah daun, maupun seludang pabungoannyo ditumbuahi duri-duri. Durinyo babantuak sagitigo runciang, tajam, bawarno itam dan panjangnyo mancapai 5 cm. Batang pohon Nibung babantuak bulek, luruih, dan barueh. Pado satiok buku rueh batangnyo ditumbuahi duri-duri panjang.[1]
Bungo Nibung marupokan bungo majamuak babantuak tandan dan manggantuang dengan bantuak agak panjang. Bungonyo tadiri ateh bungo batino dan bungo jantan nan diapik oleh duo bungo jantan sahinggo panyerbukan tajadi dengan mudah. Bungo iko bawarno ijau katiko mudo dan manjadi warno kuniang jikok alah tuo. Jikok masak, warnonyo barubah manjadi sirah. Dalam satiok buah tadapek sabuah biji.[1]
Tempek tumbuah suntiang
Nibung manyukoi tampek dengan katinggian 0-50 mdpl. Pado umumnyo Nibung tumbuah dan bakambangbiak di daerah utan gambut, utan rawa, atau utan pantai nan marupokan daerah baaia asin. Sifeknyo iko dapek taliek dari tampek-tampek iduiknyo di Riau, samakin jauah dari aia asin, populai Nibung samakin mangetek. Itulah sababnyo rumpun-rumpun Nibung labiah banyak ditamukan di daerah pantai, pasia, atau delta sungai gadang.
Salamo iko Nibung ditamukan tumbuah dan bakambang biak jo anakannyo nan tumbuah di sakita pohon induaknyo. Salain itu, Nibung dapek bakambang biak jo bijinyo. (1)
Manfaaik suntiang
Nibung dapek dimanfaaikan mulai dari batang, buah hinggo daunnyo. Batang Nibung sangaik tahan lapuak sahinggo dapek digunokan untuak bahan bangunan barupo lantai, pipa untuak saluran aia, jambatan, dan sabagainyo. Salain itu, dipakai juo untuak panyangga rumah-rumah nan batampek tingga di daerah pasisia maupun lahan gambut. Batangnyo pun awet dan kuek dari sarangan rayap.
Tamuan arkeologi di daerah Jambi manunjuakan siso-siso panyangga rumah dari batang ini di ateh tanah gambut dari pakampungan abad ka 11 hinggo abad ka 13. Kayunyo dipakai juo untuak sarana manjala ikan di Kalimantan.[3][4]
Daun Nibung digunoaan untuak atok rumah dan anyaman karanjang. Bungonyo digunokan untuak mangharumkan bareh, sadangkan umbut dan kuncuik bungo dapek dibuek sayua. Buahnyo dapek dipakai sabagai pangganti pinang untuk makan siriah dan durinyo nan disabuik “pating” dapek dipakai sabagai paku bangunan sasaji dalam upacaro adaik.[4]
Panyebaran suntiang
Nibung sacaro alami taseba di wilayah Indocina, Thailand, Malaysia, Filipina, dan Indonesia. Tanaman iko taseba juo sacaro alami di Pantai Timur Sumatera mulai dari Sungai Sembilang, Kabupaten Banyuasin, Sumatera Selatan; Muaro Sabak, Kabupaten Tanjuang Jabuang Timur, Jambi; Sungai Indragiri hinggo ka pasisia Pantai Bengkalis, Riau. Dipakirokan Nibung masih tadapek di hilia sungai nan bamuaro ka Pantai Timur Sumatera.[4]
Sebaran Nibung di Sumatera Selatan khususnyo di Kabupaten Banyuasin, hampia sadonyo alah mangalami eksploitasi oleh para penibung, bahkan over eksploitasi nan manyisakan tunggak, tagakan rusak, sarato tagakan nan masih mudo. Hal ikolah nan manyababkan tajadinyo karusakan habitat nan cukuik sarius pado daerah iko.[4]
Rujuakan suntiang
- ↑ a b c d Crawfurd, John (2017). Sejarah Kepulauan Nusantara: Kajian Budaya, Agama, Politik, Hukum dan Ekonomi. 1. Yogyakarta: Penerbit Ombak. pp. 322. ISBN 9786022584698.
- ↑ satuharapan.com, PT Satu Harapan Media |. "Nibung, Pohon Multiguna Maskot Provinsi Riau - Satu Harapan". satuharapan.com (dalam bahasa Indonesia). Diakses tanggal 2022-05-27.
- ↑ Fernando, Akmal Gian; Sulaeman, Rudianda; Darlis, Viny Volcherina (2020-03-13). "KEAWETAN ALAMI BATANG NIBUNG (Oncosperma tigillarium) TERHADAP SERANGAN RAYAP TANAH (Coptotermes curvignathus)". JURNAL ILMU-ILMU KEHUTANAN. 4 (1): 8–13. doi:10.31258/jiik.4.1.8-13. ISSN 2579-5929.
- ↑ a b c d Nurlia, Ari; Siahaan, Hengki; Lukman, A. H. (2013-12-04). "POLA PEMANFAATAN DAN PEMASARAN NIBUNG DI SEKITAR KAWASAN TAMAN NASIONAL SEMBILANG PROVINSI SUMATERA SELATAN". Jurnal Penelitian Hutan Tanaman (dalam bahasa Indonesia). 10 (4): 241–251. doi:10.20886/jpht.2013.10.4.241-251. ISSN 2442-8930.