Musajik Rayo Ampek Lingkuang
Musajik Rayo Ampek Lingkuang talatak di Nagari Balah Hilia, Kecamatan Lubuk Alung, Kabupaten Padang Pariaman, Indonesia. Musajik iko bamulo tagak pado tahun 1850. Lokasinyo kurang labiah 1 km dari Jalan Raya Padang–Bukittinggi.[1]
Musajik iko tagak di lahan salueh 2.500 meter persegi. Bangunannyo tabuek dari campuran bata, mortar, jo batu dengan atok babahan seng. Bantuak Musajik Rayo Ampek Lingkuang punyo kamiripan jo musajik-musajik saisuak lainnyo di Minangkabau. Hal iko ditandoi dengan bangunan utamo nan denahnyo bujur sangkar, atoknyo babantuak limas balenggek-lenggek, jo lantai nan dinaiakan.
Musajik iko banamo "Ampek Lingkuang" dek ado ampek kaum di sinan nan ikuik basarayo dalam pambangunan musajik. Ampek kaum nan tun iyolah Balah Hilia, Singguliang, Sungai Abang, jo Koto Buruak. Mereka bamupakaik managakan musajik di daerah Balah Hilia untuak mamudahan masyarakaik baibadah dalam manjalanan kewajiban agamo.
Walaupun umua musajik tagolong tuo, Musajik Rayo Ampek Lingkuang masih manjadi tampek kagiatan agamo sampai kini, takah acara mauluk (maulid nabi) jo majelis taklim sarato tampek musyawarah masyarakaik satampek.[2]
Rujuakan suntiang
- ↑ admin (2015-11-22). "Musajik Ampek Lingkuang". padangpariamankab.go.id (dalam bahasa Indonesia). Diarsipkan dari versi asli tanggal 2019-05-09. Diakses tanggal 2019-12-29.
- ↑ "Musajik Raya Ampek Lingkuang, Sejarah Nagari Lubuk Alung". Harian Singgalang. 7 Agustus 2012.