Itiak pulang patang

Itiak pulang patang adolah motif babantuak barisan itiak nan pulang ka kandang sacaro harmonni dan salareh dari tampek inyo mancari makan. Biasonyo itiak dilapeh dari kandangnyo pado pagi hari, satalah itu mereka pai ka sungai manacari makan .Pado patang nyo, inyo alah kanyang baliak ka kandang jo bairiangan jo langkah nan gontai, indak takaja kaja. Maknanyo sabagai motif adolah kelegaan satalah manyalasaikan karajo nan barek. Dapek pulo dimaknai satio kawan, kompak dan basatu dalam masyarakaik. latak ukiran nyo di rumah gadang adolah di bagian dalamnyo.

Asa

Bardasarkan namonyo, ukiran Itiak Pulang Patang tamasuak kadalam kategori ukiran nan ta inspirasi dari namo hewan iyolah ‘Itiak’. Namo ukiran ko tabagi dalam tigo kato nan partamo adolah ‘Itiak’, nan kaduo adolah ‘Pulang’, nan katigo adolah ‘Patang’. ‘Itiak’ adolah itik, ‘Pulang’ adolah baliak dari pajalanan atau daerah tujuannyo, dan ‘Patang’ mampunyoi duo arti iyolah kapatang jo sanjo hari. Dalam konteks ko, ‘Patang’ artinyo adolah sanjo hari. Jadi Itiak Pulang Patang bararti itik nan baru baliak dari pajalanannyo di wakatu sanjo.

Filosofi

Makna filosofis ukiran Itiak Pulang Patang baragam. Variasi nyo tajadi dek adonyo suduik pandang masyarakaik Minangkabau nan babeda-beda. Ukiran  Itiak Pulang Patang mampunyoi arti filosofis nan sangaik mandalam dek dipangaruhi falsafah urang Minangkabau. Kasadaran bahwasannyo manusia ko adaloh bagian dari alam nan manimbulkan pamahaman tantang manusia dan segalo macam isi alam nan saliang badampiangan dan mambutuhkan satu samo lainnyo. Dibutuhkan kasarasian antaro satu samo lainnyo sahinggo kahidupan bajalan sebagaimano mestinyo, iko marupokan makna pertamo dari Itiak Pulang Patang.

Makna keduo nan ado dalam ukiran iko adolah tantang tata pargaulan dalam kahidupan sahari-hari antaro individu dalam masyarakat. Dalam konteks ko, labiah dititik barekkan pado pargaulan anak gadih Minangkabau. Bagi masyarakaik Minang parampuan sangaik ditinggikan posisinyo sabagai Bundo Kanduang. Saorang gadih baliak sabalun laruik malam layaknyo itiak nan baliak ka kandang bilo hari alah patang jo sandirinyo. Aib akan mambuek kaluarga dan lingkuangan anak gadih manjadi malu bilo hal ko diabaikan dek  anak gadih. Nilai moral ko nan diinginkan disampaian dalam  ukiran Itiak Pulang Patang.

Makna katigo dalam tatanan pamarintahan. Dalam hal kasalarasan dan kaharmonisan dalam tatanan pamarintahan, layaknyo pado keteraturan barisan itiak nan baliak kakandang katiko hari alah patang. Tata pamarintahan nan diterapkan kapado masyarakaik Minangkabau adolah tata pamarintahan nan rapi dan ditata sasuai jo aturan-aturan nan jaleh dari kasapakatan dari niniak mamak.

Makna kaampek adolah hubuangan sinergis kapado sistem kakarabatan antaro mamak jo kamanakan. Kamanakan sanantiaso maikuti kabijakan mamaknyo salamo indak batantangan jo agamo islam dan hukum adaik

Makna kalimo mangenai kateguhan dalam manjalankan prinsip-prinsip hiduik. Sikap hiduik urang Minang nan salalu teguh pandirian dan konsekuen dalam manjalani prinsip-prinsip hiduik nan alah dihayati dan dijalani sajak dahulunyo. Barisan itiak nan taratur dan taarah mancerminkan kakonsekuensian dan kateguhan pandirian sarato prinsip hiduik urang Minang dalam mangisi kahidupannyo baik jo agamo ataupun  ilmu pangatahuannyo.

Makna kaanam mangenai kabersamaan jo kakompakan dalam masyarakat. Dalam manghadapi masalah-masalah masyarakaik Minangkabau mangutamakan pamacahan masalah jo musyawarah mupakaik. Apobilo alah didapek kato mupakaik, mako apopun kaputusan tu akan dijalankan sacaro kompak basamo-samo. Indak kan ado itiak nan mamisahan diri dari rombongan atau barisan. Barisan itiak akan tatok basamo dan mampartahankan formasinyo sampai nyo tibo di kandang. Jadi, sabalun tujuan hidupnyo tacapai, sakalompok urang Minang nan alah tarikek jo satu komitmen basamo indak kan pernah malapehan ikatan ka basamoannyo.