Monumen Pamudo Syarif
Monumen Pamudo Syarif didasain dek Drs. Nasbahri C. Koto

Monumen Pamudo Syarif adolah monumen nan dibangun untuak mangana pajuangan Mohammad Syarif. Pamudo Muhammad Syarif ko panduduak Koto Marapak, Kota Padang. Tagaknyo monumen ko untuak mangana baa bagaknyo Mohammad Syarif manantang panjajah Balando, nan akia iduiknyo dihukum mati di panjaro Balando di Muaro Padang. Monumen ko didasain dek Drs. Nasbahri C. Koto.[1]

SijarahSuntiang

Monumen Pamudo Syarif dibangun pado taun 1984 untuak mangana pamudo nan bajaso mambela banso, khususnyo di Padang dari kaum panjajah. Pamudo Syarif sabana gigiah dalam pajuangan mampatahankan kamardekaan nan diawali jo tasebanyo kaba barito kakalahan Japang jo Proklamasi Kamardekaan RI. Ado babarapo urang Balando nan sabalun ko ditawan Japang di Bangkinang nan alah tibo ka Kota Padang. Mareka maadokan ubuangan jo panduduak nan lah tapicayoi, dan manyusun daftar itam urang nan bakarajo samo jo Japang sarato ka dituntuik sabagai kolaborator Japang. Samantaro tu dalam kondisi nan lain Sekutu dan NICA jo kaki tangannyo alah batindak kajam. Urang-urang tu balinduang di baliak alasannyo nan ka malucuik pasanjatoan Japang sarato manjamin pamulangan tantara Japang.

Karano alasan ko akianyo pamudo-pamudo pajuang di Padang maadokan patamuan dek raso muak mancaliak Sekutu nan mamihak, ditambah lai kajadian "Bumi Angkat" iyolah mambarondong gaduang-gaduang jo rumah etnis nan ado di kota Padang. Raso banci pamudo alah mamuncak inggo pado akianyo pamudo-pamudo pajuang ko manyamoratokan satiok urang nan bakulik putiah adolah urang Balando atau kaki tangannyo.

Urang-urang Balando nan datang dari Bangkinang atau Balando-Indo dari Bangkinang, nyo sampai ka Padang dek manompang jo tantara Sekutu. Tibo di Padang nyo basikap angkuah dek maraso Balando alah manguasoi Padang sapanuahnyo, bahkan ado pulo nan sampai maambiak aliah tugeh aparatur pamarintahan jo mancacek pribumi. Akianyo kondisi ko samakin mambuek berang pamudo-pamudo. Sainggo tajadilah tindakan mangganggu katanangan urang-urang Balando, dalam tindakan ko juo tajadi pambunuahan bakeh urang Balando sacaro diam-diam. Akianyo urang Balando maraso ndak aman dek tarancam kaamanannyo. Lalu nyo bakumpua di suatu tampek di kampuang cino.akibek mamanehnyo situasi di koto Padang, rame nan mamampaekan situasi ko untuak adu domba jo provokasi.

Gerakan-gerakan nan tabantuakSuntiang

BPPISuntiang

BPPI (Balai Panarangan Pamudo Indonesia) adolah sabuah gerakan nan batujuan manyampaikan barito kamardakaan Indonesia nan batampek di Pasa Gadang.

Lasykar HizbullahSuntiang

Laskar Hizbullah adolah sabuah gerakan nan dibantuak dek pamudo-pamudo dari organisasi Islam di Pasa Ilia

PRISuntiang

Mulo dari pambantuakan PRI (Pamudo Republik Indonesia) adolah di tanah Jao nan dikatuai dek Pandeka Samuik. Sakitar bulan Oktober 1945, PRI pun kudian dibantuak di Koto Marapak. Pambantuakan ko ateh anjuran katuo BPPI, Ismail Lengah. Pambantuakan ko diadokan di rumah Munir Remi (salah satu anggota PRI). Dari sikolah sipak tarajang Pamudo Syarif nampak amaik manantang kadatangan Balando jo kaki tangannyo. Dalam rapek tu diputuihan basonyo katuo PRI Mohammad Syarif, wakia katuo Abdullah Busai dan Sekretaris Yahya. Di ma anggotanyo adolah Sikaman, Baharuddin, Sintot, Daud Malin Maradjo, Kaharuddin Ogo, dan Budjang.

RAPWISuntiang

RAPWI (Rescue Allied Prissoners of War and Interneers) adolah satu organisasi nan dibantuak Balando untuak panyalamaikan tawanan parang jo interniran nan sabalunnyo tawanan Japang. Tawanan Japang tu di Kota Padang ditampuang di Hotel Orange (Hotel Inna Muara kini), Hotel Central (di jalan Jend. Sudirman kini), jo Rumah Sakik Gantiang. Rumah Boderwijk ko digunoan untuak nan indak tatampuang di tigo tampek tadi.

Datiak-datiak Pamudo Syarif tatangkokSuntiang

Tantang panangkoan Pamudo Syarif ado 2 versi. Versi partamo, Pamudo Syarif usai kajadian pangapungan urang Balando tu labiah acok indak sadang di Koto Marapak, tapi masih di Koto Padang. Sudah tu basebaran barito kok gaeknyo sakik, dek Pamudo Syarif anak tungga, panuruik jo panyayang, makonyo inyo basagiro pulang ka rumah gaeknyo dan ruponyo barito tu adolah kicuah nan dibuek surang tukang tunjuak (kaki tangan Balando dari banso surang) nan sadang maintai dan sagiro malapor pado tantara sakutu baso Pamudo Syarif sadang di rumahnyo. Kajadian ko tajadi pado 26 November 1945. Adopun untuak varsi kaduo, manuruik katarangan dari sekretaris PRI Rantiang Koto Marapak, Yahya, suatu siang, inyo basamo Pamudo Syarif pai ka toko di Pasa Jao untuak mambali ubek gata-gata. Pulang dari sinan, pamudo-pamudo ko lansuang ka rumah Syarif dan sempat makan basamo. Sasudah makan Yahya pai, sadang Pamudo Syarif ko lah takalok. Sangkek tu lah rumah Pamudo Syarif dikapuang, lalu pamudo Syarif dibaok ka pinjaro Muaro Padang.

Sasudah tatangkokSuntiang

Sasudah Pamudo Syarif tatangkok, Balando malapehan 20 urang pamudo koto Marapak nan dianggap indak talibaik. Adopun nan masih ditahan basamo Pamudo Syarif adolah Daud Malin Maradjo, Budjang (sopir), Amin, Raba'in, Syahbuddin, jo Papang. Di panjaro pamudo Syarif di interogasi jo diseso inggo bangkak-bangkak sakujua badannyo jo biru labam.

PantunSuntiang

Katiko eksekusi tembak mati, pamudo Syarif ko indak amuah manutup mato do. Namun, pamintaannyo tu ditulak dek tantara sakutu. Pamudo ko tatap manantang paluru nan manambuih dadonyo. Sabalun tatembak Pamudo Syarif ko ndak lai maajuan pamintaan tarakhia do, salain dari muluiknyo kalua sabarih pantun.

Di ateh pisang di bawah jantuang

Di tangah-tangah pokok kapalo

Bia ditembak atau digantuang

Asa Indonesia tatap mardeka.

Pamudo SyarifSuntiang

Riwayaik iduikSuntiang

Pamudo Syarif adolah anak tungga dari Abdul Moeis jo Nurliah. Pamudo Syarif lahia di koto Marapak. Pamudo Syarif tumbuah gadang dari kaluarga padagang. Ayahnyo adolah padagang kaliliang nan alah badagang dari Jambi inggo ka Singapura. Pamudo Syarif ko panah disikolahan jo gaeknyo di Sikolah Taman Sari, talatak sakitar kampus Fakultas Hukum Unand kini.

SipaikSuntiang

Pamudo Syarif ko dalam pagaulan sahari-hari dikana bajiwa sosial nan tinggi. Barani maambiak kaputusan, sarato kuek agamonyo. Dipiliahnyo Pamudo Syarif sabagai katuo adolah dek patimbangan sipaik sosial jo integritasnyo salamo ko, sipaik santiang bailmunyo, manguasoi administrasi organisasi, jujua, wibawa, gagah, elok basonyo, pandai mamimpin, indak sombong, barasa dari kaluarga tapandang, amuah bakompromi, sarato tuluih mambela tanah aia.

RujuakanSuntiang

  1. Adaz, Marshalleh (2017). Nilai Sejarah Tugu Monumen di Kota Padang. Dinas Perpustakaan dan Kearsipan: Padang. pp. 54.