Monumen Pajuangan Rakyaik Kuranji

Monumen Pajuangan Rakyaik Kuranji adolah monumen nan dibuek untuak maingek pajuangan rakyaik Kuranji pado maso parang kemerdekaan. Ado banyak tugu parjuangan di daerah Kuranji, diantaronyo; Monumen Makam Pahlawan Kuranji nan di buek sajak taun 1977, monumen Tugu Perintis Kemerdekaan di Jl. Dr. Mohammad Hatta di laman Kantua Camaik Kuranji nan di buek taun 1985, monumen tugu Dewan Parjuangan Rakyaik Padang Luar Koto di tapi jalan Belimbing di buek taun 2001, tugu bantuak kapalo proyektil mortir dan kubu Pasukan Harimau Kuranji di Simpang Kuranji (taun ndak diketahui), dan bangunan babantuak tugu bambu runciang di Surau Batu Kalumbuak dirasmian taun 2001. Banyaknyo tugu di Kuranji manandokan banyaknyo parjuangan rakyaik Kuranji untuak manjago kadaulatan RI pado maso itu.

Sijarah

Banyaknyo sanjato nan di pakai dek Sakutu atau Balando, alun tantu dapek mangalahkan sumangaik juang rakyaik nan di jajahnyo. Kondisi alam manantukan panjajah indak dapek manguasai Sumatera Barat sapanuahnyo. Kuranji samanjak dahulu di sabuik Pauh, punyo dataran nan gadang, rimbo, di paga bukik barisan, di bateh jo batang aia gadang (Batang Kuranji), jo batang aia nan ketek-ketek lainnyo. Balando dulu manyabuk Kuranji basis lintas baliak (terugval) karano pertahanan nan balapih-lapih dek alamnyo. Ditambah pulo dek karakter urang Kuranji/Pauh nan kareh, tageh, indak nio di gaduah, tapi masyarakaik itu manyarang kalau alah maraso tagaduah.

Sajak abaik 20, kiro-kiro taun 1902, Kota Padang indak pernah aman karano di gaduah urang Pauah (Kuranji) jo Koto Tangah. Indak suko jo Balando alah jadi bioaso, tapi dek pasukan nan saketek, indak dapek mausia Balando hanyo dapek mambuek indak sanang jo takuik di bunuah.

Rusli Amran di bukunyo, " Padang Riwayatmu Dulu" (1986).