Melati van Agam
Melati van Agam adolah film romansa taun 1940 nan disutradarai Tan Tjoei Hock jo diproduseri The Teng Chun. Dibintangi S. Soekarti jo A.B. Rachman, film ko mangisahkan sapasang kakasih mudo banamo Norma jo Idrus. Film ko disangko alah hilang.
Alua
suntiangNorma dikanal di kampuang halamannyo, Fort de Kock (kini Bukittinggi), sabagai saurang nan jalito, dek karano itu inyo dijuluki "Melati dari Agam". Meski inyo jatuah cinto jo Idrus, panambang di Sawahlunto, inyo dipaso manikahi saurang kapalo sakolah banamo Nazzaruddin, jantan nan dianggap labiah sasuai jo kaluarga bangsawan Norma. Norma pun binguang karano suaminyo jauh labiah tuo daripado dirinyo jo Norma surang alah manyatokan Idrus sabagai cinto sajatinyo, bahkan sampai bamimpi mambangun kaluarga basamonyo.
Satalah panikahannyo, Norma pai basamo Nazzaruddin ka Kota Raja, Aceh (kini Banda Aceh), jo manggadangkan anak-anak Nazzaruddin dari panikahan sabalumnyo. Hubungan inyo samakin mamburuak: Nazzaruddin kawalahan manghadapi pamikiran Barat nan dimiliki istrinyo, sadangkan Norma samakin depresi satalah mandanga kamatian Idrus nan patah hati. Norma nan saat itu sadang hamil pulang ka Fort de Kock jo dicaraikan dek Nazzaruddin satalah malahiakan. Nazzaruddin mengira anaknyo mirip Idrus jo manganggapnyo sabagai bukti pasalingkuhan Norma. Akhianyo Norma bunuah diri jo dikubuakan di sampiang Idrus. Nazzaruddin maliek ruh Norma naiak ka surgo sambia bapagangan tangan jo Idrus.[1]
Produksi
suntiangMelati van Agam disutradarai Tan Tjoei Hock untuak Java Industrial Films jo diproduseri dek pamilik parusahaannyo, The Teng Chun. Tan mangadaptasi caritanyo dari novel taun 1922 jo judul nan samo karya Swan Pen (namo pena jurnalis Parada Harahap). Novel itu alah bakali-kali diangkek ka patunjukan pangguang jo film bisunyo pernah dirilis pado taun 1931 dek Tan's Film.[2] Iklan filmnyo manekankan paran Harahap salaku novelis aslinyo. Wakatu itu, industri film sadang manarik diri dari tradisi teater jo jurnalisme nan dianggap sabagai profesi "modern".[3] Aluanyo justru mambandiang-bandiangkan gaya hiduik tradisional jo modern.[4]
Film hitam putiah ko dibintangi S. Soekarti, A.B. Rachman, R. Abdullah, S. Thalib, N. Ismail, Rochani, Lena, jo M. Sani.[2] Soekarti alun pernah barakting sabalumnyo, samantaro lawan mainnyo A.B. Rachman pernah talibat dalam patunjukan teater. Iklan Melati van Agam hanyo bafokus pado latar balakang Soekarti jo mangabaikan Rachman.[3] Sinematografinyo ditangani I. Ch. Chua, sadangkan musiknyo ditangani musisi karoncong M. Sardi.[4]
Rilis jo tanggapan
suntiangMelati van Agam dirilis pado akhia 1940.[2] Sabuah ulasan di De Sumatra Post nan bapusat di Medan mamuji panampilan Soekarti sabagai Norma jo manyabuik Soekarti "tampaknyo punyo bakat nan hebat."[lower-alpha 1][5]
Film ko bisa jadi tagolong film hilang. Antropolog visual Amerika Serikat Karl G. Heider manulih bahwa sadonyo film Indonesia nan dibuek sabalum 1950 indak dikatahui lai kabaradoan salinannyo.[6] Akan tatapi, Katalog Film Indonesia nan disusun JB Kristanto manyabuikan babarapo film masih disimpan di Sinematek Indonesia jo Biran manulih bahwa sajumlah film propaganda Japang masih ado di Dinas Informasi Pemerintah Belanda.[7]
Catatan panjaleh
suntiang
- ↑ Teks asli: "... die groote talenten blijkt te hebben."
Rujuakan
suntiang- ↑ Biran 2009, hlm. 109.
- ↑ a b c Filmindonesia.or.id, Melati Van Agam 1940.
- ↑ a b Biran 2009, hlm. 237.
- ↑ a b Biran 2009, hlm. 200.
- ↑ De Sumatra Post 1941, Deli Bioscoop.
- ↑ Heider 1991, hlm. 14.
- ↑ Biran 2009, hlm. 351.
Sumber
suntiang- Biran, Misbach Yusa (2009) (dalam bahaso Indonesian). Sejarah Film 1900–1950: Bikin Film di Jawa [History of Film 1900–1950: Making Films in Java]. Jakarta: Komunitas Bamboo working with the Jakarta Art Council. ISBN 978-979-3731-58-2.
- Heider, Karl G (1991). Indonesian Cinema: National Culture on Screen. Honolulu: University of Hawaii Press. ISBN 978-0-8248-1367-3. http://books.google.ca/books?id=m4DVrBo91lEC.
- "Melati Van Agam". filmindonesia.or.id (dalam bahasa Indonesian). Jakarta: Konfiden Foundation. Diarsipkan dari versi asli tanggal 14 October 2013. Diakses tanggal 25 July 2012.
- "Deli Bioscoop „Melati van Agam"". De Sumatra Post (dalam bahasa Dutch). Medan. 8 January 1941. hlm. 2. Diarsipkan dari versi asli tanggal 15 October 2013. Diakses tanggal 12 March 2020.
Pranala lua
suntiang- (Inggirih) Melati van Agam di IMDb