Matoari

Matoari atau Surya adolah bintang di pusek Tata Surya. Bantuaknyo ampia samparono bulek nan tadiri dari plasma paneh bacampua medan magnet.[1][2] Diameternyo sakitar 1.392.684 km,[3] kiro-kiro 109 kali diameter Bumi, dan massanyo (sakitar 2×1030 kilogram, 330.000 kali massa Bumi) mawakili kurang labiah 99,86 % massa total Tata Surya.[4]

Sacaro kimiawi, sakitar tigo parampek massa Matoari tadiri dari hidrogen, sadangkan sisonyo didominasi helium. Siso massa tasabuik (1,69%, sapangkek jo 5.629 kali massa Bumi) tadiri dari elemen-elemen barek sarupo oksigen, karbon, neon, basi, dan lain-lain.[5]

Matoari tabantuak sakitar 4,6 miliar taun nan lalu dek paluruahan gravitasi suatu wilayah di dalam sabuah awan molekul gadang. Sabagian gadang materi bakumpua di tangah, samantaro sisonyo mamipih manjadi cakram baredar nan kudian manjadi Tata Surya. Massa puseknyo samakin paneh jo padek inggo akhianyo mamulai fusi termonuklir di intinyo. Dipakirokan baso hampia sadoalah bintang lain tabantuak jo proses sarupo. Klasifikasi bintang Matoari, manuruik kelas spektrumnyo, adolah bintang deret utamo G (G2V) dan acok digoloangkan sabagai katai kuning dek radiasi tampaknyo labiah intens dalam porsi spektrum kuniang-sirah. Walau rononyo putiah, dari pamukoan Bumi Matoari tampak kuniang dek pambauran cahayo biru di atmosfer.[6] Manuruik label kelas spektrum,G2 manandokan suhu pamukoannyo sakitar 5778 K (5505 °C) jo V manandokan baso Matoari, layaknyo bintang-bintang lain, marupokan bintang deret utamo, sainggo energinyo diciptakan dek fusi nuklir nukleus hidrogen ka dalam helium. Di intinyo, Matoari mamfusi 620 juta ton metrik hidrogen satiok datiak.

Dulu, Matoari dipandang astronom-astronom sabagai bintang ketek dan indak pantiang. Kini, Matoari dianggap labiah tarang daripado sakitar 85% bintang di galaksi Bima Sakti nan didominasi katai sirah.[7][8] Magnitudo absolut Matoari adolah +4,83. Akan tatapi, sabagai bintang nan paliang dakek jo Bumi, Matoari adolah benda paliang cerah di langik jo magnitudo tampak −26,74.[9][10]

RujuakanSuntiang

  1. "How Round is the Sun?". NASA. 2 October 2008. Diakses tanggal 7 March 2011. 
  2. "First Ever STEREO Images of the Entire Sun". NASA. 6 February 2011. Diakses tanggal 7 March 2011. 
  3. Emilio, Marcelo; Kuhn, Jeff R.; Bush, Rock I.; Scholl, Isabelle F., "Measuring the Solar Radius from Space during the 2003 and 2006 Mercury Transits", arXiv, diakses tanggal 2012-03-28 
  4. Woolfson, M (2000). "The origin and evolution of the solar system". Astronomy & Geophysics 41 (1): 1.12. doi:10.1046/j.1468-4004.2000.00012.x. 
  5. Basu, S.; Antia, H. M. (2008). "Helioseismology and Solar Abundances". Physics Reports 457 (5–6): 217. doi:10.1016/j.physrep.2007.12.002. Bibcode2008PhR...457..217B. 
  6. Wilk, S. R. (2009). "The Yellow Sun Paradox". Optics & Photonics News: 12–13. http://www.osa-opn.org/Content/ViewFile.aspx?id=11147. 
  7. Than, K. (2006). "Astronomers Had it Wrong: Most Stars are Single". Space.com. Diakses tanggal 2007-08-01. 
  8. Lada, C. J. (2006). "Stellar multiplicity and the initial mass function: Most stars are single". Astrophysical Journal Letters 640 (1): L63–L66. doi:10.1086/503158. Bibcode2006ApJ...640L..63L. 
  9. Burton, W. B. (1986). "Stellar parameters". Space Science Reviews 43 (3–4): 244–250. doi:10.1007/BF00190626. Bibcode1986SSRv...43..244.. 
  10. Bessell, M. S.; Castelli, F.; Plez, B. (1998). "Model atmospheres broad-band colors, bolometric corrections and temperature calibrations for O–M stars". Astronomy and Astrophysics 333: 231–250. Bibcode1998A&A...333..231B.