Margaret Murray

Margaret Alice Murray (13 Juli 1863 - 13 November 1963) adolah saurang pakar kabudayoan Mesir (egiptolog), arkeolog, antropolog, sijarawan jo pakar folklor nan lahia di Calcutta, Bengal Presidency. Baliau pernah pulo katiko mudonyo manjadi saurang perawat. Baliau mulai mampalajari bidang egiptologi di University College London (UCL) pado tahun 1894. Ekspedisi baliau dalam panggalian Petrie di Abydos, Mesir pado tahun 1903-1903 nan manamuan kuil Osireion jo panalitian tantang pemakaman Saqqara, mambuek baliau tanamo di bidang egiptologi.

Pado tahun 1898-1835, baliau bakarajo di Inggirih sarato manjadi padusi patamo nan manajdi dosen arkeologi di University College London (UCL). ariah Margaret Murray di bidang egiptologi jo arkeologi mambuek baliau tanamo sarato mandapekan gala "The Old Old Woman of Egyptology". Baliau mangambangan pulo minatnyo di folklor nan bamulo dari panggalian situs prasijarah di Malta jo Menorca pado tahun 1921-1931. Dek karano jariahnyo tu, baliau dapek gelar doktor kehormatan pado tahun 1927.

Kahidupan Awal

Maso mudo

Margaret Murray tingga basamo urang tuonyo, sanak padusinyo, jo amak dari ayahnyo di Calcutta. Pada tahun 1870, Margaret jo sanak padusinyo, Mary pindah ka Lambourn, Berkshire tampek pamannyo John. John marupoan saurang pandeta nan tingga basamo istrinyo nan banamo Harriet. Pamannyo mulai mangenalan tantang arkeologi ka Margaret katiko maajaknyo mancaliak monumen lokal disinan. Pado tahun 1873, ibu Margaret mambaok Margaret untuak pindah ka Bonn, Jerman. Disitu lah Margaret barajo bahaso Jerman sampai fasiah. Pado tahun 1875, Margaret pulang ka rumahnyo di Calcutta sampai tahun 1877. Tahun barikuiknyo Margareta pindah jo kaduo urang tuonyo ka Sydenham, London. Disinian Margaret banyak maabiahan wakatunyo di The Crystal Palace. Ayahnyo bakarajo di sabah parusahaan di London.

Pada tahun 1880, Margaret jo kaduo urang tuonyo baliak ka Calcutta jo tingga disinan salamo tujuah tahun. Salamo disitu, Margaret manjadi perawat di Rumah Sakit Umum Calcutta. Baliau pernah talibek dalam pananganan wabah kolera nan tajadi katiko itu. Pada tahun 1887 baliau baliak ka Inggirih ka tampek pamannyo. Baliau mulai manjadi pakarajo sosial nan baurusan jo urang-urang indak mampu disinan. Katiko ayahnyo pensiun, Margaret pindah ka rumah urang tuonyo di Bushey Heath, Hertfordshire inggo kamatian ayahnyo pado tahun 1891. Duo tahun sasudah tu, Margaret malakuan pajalanan ka Madras, Tamil Nadu, tampek Mary jo suaminyo.

University College London

Margaret disuruah dek ibu jo sanak padusinyo untuak mandaftar di jurusan egiptologi nan baru dibukak di University College London (UCL) di Bloomsbury, London. Jurusan tersebut dijalankan oleh arkeolog Sir William Flinders Petrie dan bapusek di Perpustakaan Edwards di UCL's South Cloisters. Margaret mamulai studinyo disinan pado bulan Januari 1894 katiko baumua 30 tahun. Disinan Margaret maambiak studi bahaso Mesir Kuno jo Koptik nan diajaan dek Francis Llewellyn Griffith jo Walter Ewing Crum.

Salamo bakuliah disinan, Margaret mulai dakek jo Petrie, baliau manjadi ilustrator jo pambuek gambar laporan panggalian Petrie katiko di Qift, Koptos. Margaret mancubo mambuek jo malakuan panalitian patamonyo nan bajudul The Descent of Property in the Early Periods of Egyptian History. Panalittian tu ditabikan dalam Prosiding Biblical Archaeology pado taun 1895. Salanjuiknyo Margaret manjadi asisten Petrie, baliau acok pulo maisi jam palajaran linguistik surang diri. Pada taun 1898 baliau diangkek manjadi Dosen nan batugas maaja kelas bahasa di jurusan egiptologi. Dek karano itu lah Margaret manjadi dosen padusi patamo nan manjadi dosen arkeolog Inggirih wakatu itu. Sairiang bajalannyo wakatu, Margaret mulai maaja kelas sijarah, agamo, jo bahaso Mesir kuno. Murid-murid nan diaja Margaret ado nan bajariah di egiptologi pulo sarupo Reginald Engelbach, Georgina Aitken, Guy Brunton, jo Myrtle Broome. Salain manajdi dosen di UCL, Margaret maaja kelas egiptologi pulo di British Museum.

Salamo manjadi dosen arkeolog, Margaret kurang bapangalaman di praktek lapangan, sahinggo pado tahun 1902-1903, Margaret malakuan pajalanan ka Mesir untuak bagabuang jo panggalian Petrie di Abydos. Sajak tahun 1899, Petrie jo istrinyo alah manggali di situs tu nan diambiak aliahnyo dari panyalidikan arkeolog Émile Amélineau. Petrie maajaan caro manggali situs ka Margaret sacaro barulang. Katiko manggali di Abydos, Margaret manamuan Osireion, sabuah kuil nan digunoan untuak panyembahan dewa Osiris nan dibangun dek parintah Firaun Seti I salamo pariode Karajaan Baru. Margaret manulihnyo dalam laporan nan bajudul The Osireion at Abydos pado taun 1904.

Pado taun 1903-1904, Margaret disuruah dek Pterie baliak ka Mesir untuak mamulai panlitian di pamakaman Saqqara dakek Kairo, nan barasa dari zaman Karajaan lamo. Dek karano indak punyo izin untuak manggali situs, Margaret hanyo manyalin prasasti dari sapuluah makam nan alah digali labiah dulu dek Auguste Mariette pado taun 1860-an. Margaret manulihnyo dalam laporan nan bajudul Saqqara Mastabas I pado taun 1905. Kaduo laporannyo tu mambuek pangaruah egiptologi nan kuek dari Margaret.

Rujuakan

Catatan Kaki

Daftar Pustaka

• Brooks (2015). "Margaret Murray, My First Hundred Years". Fembio. Diakses tanggal 4 April 2020. 
• Natalia, Klimczak (2017). "Margaret Murray - Mother of Egyptology, Grandmother of Wicca, or Fairy Godmother?". Ancients Origins. Diakses tanggal 4 April 2020.